Ci varta biełarusam udzielničać u rasijskich prapahandysckich prahramach?
U efiry rasijskaha Pieršaha kanała źjaviłasia tok-šou «Čas pakaža» pad nazvaj «Susiedzi». Upieršyniu za doŭhi čas abmiarkoŭvali nie tolki Ukrainu, ale i Biełaruś.
Farmalnaja nahoda — vychad dapamožnika pa historyi, napisanaha staršynioj Tavarystva biełaruskaj movy Aleham Trusavym. Rasiejcaŭ aburyła fraza pra toje, što biełarusy jak nacyja źjavilisia na 200 hadoŭ raniej za ruskich.
«Ale my sapraŭdnyja ruskija, a nie tyja, što źjavilisia ŭ 1497 hodzie. Jany — tatary», — začytvali ŭ efiry vytrymki z knihi.
Aleh Trusaŭ admoviŭsia pryjazdžać na zapis prahramy, tamu hołas Biełarusi byŭ pradstaŭleny ŭ asobie historyka Niny Stužynskaj. Taksama ŭ šou była zaprošanaja Kaciaryna Kibalčyč — žurnalistka Pieršaha kanała, jakaja naradziłasia ŭ Biełarusi.
Tema abmierkavańnia pradkazalna źviazałasia da pytańnia, ci nie sprabujuć aŭtary takich padručnikaŭ (viadučy Arciom Šejnin nazyvaŭ ich frykami) razarvać braterskija adnosiny pamiž Rasijaj i Biełaruśsiu.
Nina Stužynskaja adkazvała viadučamu: pryčym tut vy da biełaruskaha padručnika. Jana zapeŭnivała, što nahody dla chvalavańnia niama, pry hetym imknučysia nie iści na kanflikt.
«Ad takoha niedachvalavańnia zahinuła 10 tysiač ukraincaŭ», — paryravaŭ viadučy.
Na vialikim ekranie pakazvali videa z Dnia Voli, dzie maładziony skakali pad kryki «chto nie skača, toj maskal». Rasijskija ekśpierty aburalisia hetymi faktami.
Adnak stvaralniki prahramy padrychtavalisia da prychodu mienavita Stužynskaj: jany pracytavali post u fejsbuku, dzie jana paŭžartam pisała, što ŭ vypadku pieramohi Słuckaha paŭstańnia ŭ słučakoŭ byŭ by jeŭrapiejski zarobak.
U vyniku viadučy (toj samy, jaki raskazvaŭ u efiry, što zabivaŭ ludziej na vajnie) pastaviŭ pytańnie rubam: dla vas Bandera i Šuchievič hieroi? Urešcie Stužynskaja adkazała: «Dla mianie jany hieroi ŭkrainskaha naroda».
Paśla dyskusija kančatkova pieratvaryłasia ŭ kryk, zvykły dla rasijskich hramadska-palityčnych tok-šou. Tema pieraskočyła na palakaŭ i na toje, ci kormić Rasija biełarusaŭ.
Videa možna pahladzieć tut, Biełarusi pryśviečanaja druhaja častka prahramy.
* * *
Na vašu dumku, ci varta biełarusam udzielničać u padobnych rasijskich prahramach?
Apytanka
«Naša Niva» — bastyjon biełaruščyny
PADTRYMAĆČytajcie taksama: Aleh Trusaŭ vydaŭ «Historyju siaredniaviečnaj Jeŭropy» — hutarka
Kamientary