Uładzimir Makiej nie vyklučaje taho, što, moža być, praz 10—15 hadoŭ ES i JEAES stanuć adzinaj ekanamičnaj prastoraj. Pra heta kiraŭnik MZS Biełarusi zajaviŭ u intervju haziecie «Rečpaspalita», stenahrama jakoha była apublikavanaja pres-słužbaj źniešniepalityčnaha viedamstva.
Fota: Vadzim Zamiroŭski, TUT.BY
Kiraŭnik MZS padkreśliŭ, što Jeŭrapiejski sajuz dla Biełarusi ŭjaŭlaje vialikuju cikavaść.
«My zacikaŭlenyja ŭ raźvićci adnosin ź Jeŭrapiejskim sajuzam va ŭsich śfierach i halinach. Dla nas, viadoma, važna naładzić narmalnaje handlova-ekanamičnaje ŭzajemadziejańnie, tamu što my razumiejem, što biez «kiŭka» z boku Jeŭrasajuza nijaki finansavy instytut, nijaki bank abo kampanija nie buduć pracavać ź Biełaruśsiu», — adznačyŭ Uładzimir Makiej.
Jon vykazaŭ škadavańnie, što «taŭro sankcyj, choć i pieravažnaja bolšaść ź ich byli admienienyja», u rozumach niekatorych zachodnich finansistaŭ i palitykaŭ da hetaha času praciahvaje akazvać psichałahičny ŭpłyŭ na Biełaruś.
Ministr taksama adznačyŭ, što Biełaruś hatovaja da dyjałohu ź Jeŭrasajuzam, u tym liku i pa vostrych pytańniach, što tyčacca i śfiery raźvićcia demakratyi, i pravoŭ čałavieka.
Jon taksama vykazaŭ zdahadku, što situacyja va Ukrainie paŭstała šmat u čym u tym liku z-za taho, što raniejšaje ŭkrainskaje kiraŭnictva zanadta chutka imknułasia zblizicca ź Jeŭrapiejskim sajuzam: šerah mier byŭ nierealistyčnym i «im nadavałasia štučnaja dynamika».
«My chočam mieć narmalnyja adnosiny ź Jeŭrapiejskim sajuzam. Heta nie značyć, što my zaŭtra chočam stać siabram Jeŭrapiejskaha sajuza, choć nichto nie viedaje, što budzie praz 10-15 hadoŭ… Jašče raz paŭtarusia: što budzie praz 10-15 hadoŭ, nichto nie viedaje, kali tolki Jeŭrapiejski sajuz zachavajecca, tamu što ciapier ŭ Jeŭrapiejskaha sajuza vielmi šmat prablem», — zajaviŭ Makiej.
Jon taksama nie vyklučyŭ imaviernaść taho, što praz 10-15 hadoŭ Jeŭrapiejski sajuz i Jeŭrazijski ekanamičny sajuz stanuć adzinaj Jeŭrazijskaj ekanamičnaj prastoraj.
«Skazać, što my imkniomsia siońnia ŭ Jeŭrapiejski sajuz, ja nie mahu […]. Ja nie mahu skazać, što ŭsie biełarusy prosta-taki imknucca da taho, kab Biełaruś stała siabram Jeŭrapiejskaha sajuza. I jašče adzin momant. Heta rašeńnie takoha kardynalnaha, pryncypovaha charaktaru. Dla taho kab hetaja ideja saśpieła — ideja zbližeńnia ź Jeŭrapiejskim sajuzam abo niejkaja inšaja ideja, — treba, kab ludzi ŭspryniali hetuju ideju», — skazaŭ kiraŭnik MZS, adkazvajučy na pytańnie, ci mahčymaje ŭstupleńnie ŭ Jeŭrasajuz tolki adnoj Biełarusi.
— Nie ciapier, a praz 15 hadoŭ? — polskija žurnalisty byli nastojlivyja.
«Treba pahladzieć, jak źmienicca Jeŭrapiejski sajuz, jak źmienicca situacyja ŭ rehijonie, ci budzie takim pryciahalnym Jeŭrapiejski sajuz dla Biełarusi. Tamu jašče raz paŭtarusia, nielha vyklučać nijakich scenaryjaŭ raźvićcia», — padkreśliŭ dypłamat.
Jon taksama adznačyŭ, što kali Jeŭrapiejski sajuz choča dasiahnuć niejkich pośpiechaŭ u Biełarusi, nieabchodna razumieć, što jon pavinien vystaŭlać nie tolki pretenzii, prymušać pad naciskam rabić niejkija zachady, prymać sankcyi suprać Biełarusi, jon pavinien pakazać, čamu jon źjaŭlajecca pryciahalnym dla Biełarusi.
Biełaruskaja błohierka pracavała na rasijskaj apazicyjnaj fabrycy botaŭ, a paśla źliła dakumienty?26
Kamientary