Ambasada Ukrainy nahadvaje, što dla ŭjezdu ŭ Krym nieabchodny śpiecdazvoł mihracyjnaj słužby
Letaś Ukraina znoŭ adkryła ŭjezd u Krym praz svaju terytoryju. U pryhraničnych rajonach źjavilisia try kruhłasutačnyja aŭtamabilnyja i čatyry čyhunačnyja punkty propusku.
Kali ŭkraincam padčas kantrolu dastatkova pradjavić pašpart, to zamiežnikam (u tym liku biełarusam) u dadatak da hetaha treba mieć na rukach i śpiecyjalny dazvoł mihracyjnaj słužby. Składanaść u tym, što dakumient, pa-pieršaje, nieabchodna aformić zahadzia, pa-druhoje, vydajecca jon tolki ŭ peŭnych vypadkach. Poŭnyja praviły letaś zaćvierdziŭ ukrainski Kabiniet ministraŭ.
Na razavy propusk praz ukrainskija KPP mohuć raźličvać tolki zamiežniki (u tym liku i biełarusy), jakija jeduć u aŭtanomnuju respubliku ŭ hości da svajakoŭ, chočuć naviedać tam miescy pachavańniaŭ členaŭ siamji abo źbirajucca na pachavańnie blizkich. Jašče adna padstava dla atrymańnia dazvołu — nieruchomaść u Krymie.
Šmatrazovyja dazvoły praduhledžanyja tolki dla tych, chto časta vymušany byvać u Krymie pa pracy, z dypłamatyčnymi metami abo dla zabieśpiačeńnia abarony nacyjanalnych intaresaŭ Ukrainy.
Meta vizitu ŭ kožnym kankretnym vypadku treba paćviardžać dakumientalna. A pa dazvoł pryjdziecca zahadzia jechać va Ukrainu.
«Dazvoły na pierasiačeńnie miažy z Krymam afarmlajucca tolki na terytoryi Ukrainy. Dla hetaha zamiežniki pavinny źviarnucca ŭ luby terytaryjalny orhan mihracyjnaj słužby. Padraździaleńni pracujuć va ŭsich abłasnych centrach Ukrainy», — kansultujuć u Dziaržaŭnaj mihracyjnaj słužbie krainy.
Zajavu na atrymańnie dazvołu možna napisać na miescy. Z saboj u mihracyjnuju słužbu treba prynieści pašpart, pierakładzienyja na ŭkrainskuju movu kopii jaho staronak, dzie paznačanyja asabistyja dadzienyja (dla biełarusaŭ — dźvie apošnija staronki), try fatahrafii 3,5ch4,5 sm, dakumient, jaki paćviardžaje, što ŭ vas dastatkova hrošaj na znachodžańnie va Ukrainie (sumu dapamohuć raźličyć ŭ mihracyjnaj słužbie), i, hałoŭnaje, dokaz abjektyŭnaj nieabchodnaści pajezdki ŭ Krym.
Maksimalny termin razhladu dakumientaŭ — 5 pracoŭnych dzion. «Kali śpiecyjalisty nie buduć zahružanyja, to, mahčyma, adkaz budzie hatovy i raniej», — kažuć u mihracyjnaj słužbie.
U pastanovie prapisanyja i mahčymyja pryčyny admovy. Tak, kali śpiecyjalisty viedamstva paličać, što vy ŭjaŭlajecie pahrozu nacyjanalnym intaresam abo biaśpieki Ukrainy, vyjaviać u vas padroblenyja dakumienty abo ŭpeŭniacca, što realnyja mety vašaj pajezdki ŭ Krym nie supadajuć z apisanymi ŭ zajavie, to dazvoł na pierasiačeńnie miažy vam mohuć i nie vydać. Admoŭny adkaz možna atrymać i pry adsutnaści dakumienta, jaki paćviardžaje najaŭnaść dastatkovaj kolkaści finansavych srodkaŭ na znachodžańnie na terytoryi Ukrainy.
«Śpiecyjalny dazvoł vydajecca zamiežnikam i asobam biez hramadzianstva, jakija dasiahnuli 18 hadoŭ. Dadzienyja ab niepaŭnaletnich unosiacca ŭ dakumienty, vydadzienyja ich baćkam abo zakonnym pradstaŭnikam», — havorycca ŭ pastanovie Kabinieta ministraŭ Ukrainy.
Kamientary