Siońnia ŭ haziecie «Narodnaja Vola» vyjšła apošniaje intervju doktara i hramadskaha aktyvista sa Słonima Ivana Šehi. Jon lažaŭ u balnicy, ale pahadziŭsia adkazać na pytańni.
Nieabchodnyja dla rehistracyi kandydatam u deputaty tysiaču podpisaŭ urač sa Słonima Ivan Šeha sabraŭ za 4 dni i na praciahu ŭsioj pieradvybarnaj kampanii śćviardžaŭ, što maje vielizarnuju padtrymku vybarščykaŭ. Adnak pavodle vynikaŭ hałasavańnia jamu dastałosia ŭsiaho tolki 13,3 pracenta hałasoŭ. Heta aznačaje, što za doktara Šehu prahałasavali tolki 6213 čałaviek. A pieramahła ŭ Słonimie były deputat Ała Sopikava z prosta ašałamlalnym vynikam — 63,3 pracenta: 29.510 hałasoŭ «za». I jana znoŭ budzie pradstaŭlać rehijon u Pałacie pradstaŭnikoŭ.
— Ivan Ivanavič, jak vy aceńvajecie taki vynik hałasavańnia pa vašaj akruzie?
— Niečakanaściaŭ nie adbyłosia, usio pradkazalna.
I hetyja vybary ŭ parłamient prajšli pa zvykłym dla našaj krainy scenaryi: kaho ŭłada pryznačyła, toj i staŭ deputatam. Adzinaje, što jany zaraz dazvolili, — papracavać z narodam. Maja kamanda praviała kala 30 pikietaŭ, my jeździli pa vioskach, ahraharadkach, sustrakalisia ź ludźmi, mieli šmat kantaktaŭ, i nam nichto nie pieraškadžaŭ. Zapluščvali vočy navat na bieł-čyrvona-biełyja ściahi. A ŭ astatnim — nijakich ruchaŭ napierad. Mahli mnie i 5 pracentaŭ napisać, i 25.
— Vy dumajecie, što za vas bolš ludziej prahałasavała?
— Biezumoŭna. Paśla vybaraŭ mnie telefanavali, prychodzili da mianie vybarščyki, aburalisia: jak ža tak mahło być, kali litaralna siemjami hałasavali za Šehu?! My ž nie ŭ vakuumie žyviom. Słonim — nievialiki horad, usie tut adzin adnaho viedajuć.
— Čamu vy tady nie abskardžvali vyniki hałasavańnia?
— A što b heta dało? Jaki sens? My viedali, na što idziom. Siońnia niama mahčymaści damahčysia prazrystaha padliku hałasoŭ. Ułady kožny raz prydumlajuć, jak nie prapuścić va ŭčastkovyja kamisii pradstaŭnikoŭ apazicyjnych i demakratyčnych struktur. Tamu ja i maja kamanda pryncypova nijakich ekzarcyzmaŭ nie rabili, nie bilisia za miesca ŭ kamisii. Naziralniki ad partyi byli, ale što možna pabačyć za mietr ad stała, dzie ličacca hałasy?.. Ja adrazu kazaŭ, što mianie padlik hałasoŭ u siońniašnich umovach praviadzieńnia vybaraŭ nie cikavić. Dla mianie było hałoŭnaje — kantakty ź ludźmi.
Ale ž pazityŭnyja momanty ad hetych vybaraŭ jość. U parłamiencie buduć ludzi, jakija pradstaŭlajuć intaresy demakratyčnych kołaŭ Biełarusi. Škada tolki i vielmi drenna, što da pracesu tatalnych falsifikacyj dałučyli apazicyju. Mienavita tamu išli haračyja sprečki, pakidać u parłamiencie Hannu Kanapackuju z AHP ci nie. Majo mierkavańnie — hetu mahčymaść treba vykarystoŭvać.
— Ivan Ivanavič, a sa svajoj kankurentkaj Ałaj Sopikavaj sustrakalisia? Moža, ź pieramohaj jaje pavinšavali?
— Vinšavać čałavieka, jakoha pryznačyli deputatam, nie vypadaje.
***
Ivan Šeha, viadomy doktar i hramadski dziejač, zasnavalnik niedziaržaŭnaj ustanovy «Šehamiedkansult», kaardynatar Słonimskaha hramadskaha centra, były deputat rajsavieta, pamior siońnia ranicaj u Słonimie. U apošnich vybarach jon udzielničaŭ, užo majučy ciažkuju formu ankałohii.
Biełaruskaja błohierka pracavała na rasijskaj apazicyjnaj fabrycy botaŭ, a paśla źliła dakumienty?45
Kamientary