Hamielčuka, jaki zhvałciŭ i zabiŭ dźviuch žančyn, pakarajuć śmierciu. Viarchoŭny sud nie źmianiŭ prysud
4 kastryčnika Viarchoŭny sud adchiliŭ apielacyju pa spravie Siarhieja Vostrykava - hamialčanina, jakoha abłasny sud pryznaŭ vinavatym adrazu pa čatyroch artykułach Kryminalnaha kodeksa (zabojstva, zhvałtavańnie, hvałtoŭnyja dziejańni seksualnaha charaktaru i kradziež) i prysudziŭ da rasstrełu.
— Razhlad apielacyi byŭ zakrytym, my prysutničali tolki na abviaščeńni rezalucyjnaj častki prysudu. U dalejšym z boku Siarhieja Vostrykava moža być padadziena prašeńnie ab pamiłavańni prezidentu abo nakiravana skarha ŭ Kamitet pa pravach čałavieka AAN, — paviedamiŭ Andrej Pałuda — pravaabaronca, kaardynatar kampanii «Pravaabaroncy suprać śmiarotnaha pakarańnia ŭ Biełarusi».
Pieršaje złačynstva Siarhiej Vostrykaŭ ździejśniŭ u lipieni 2014 ha. Tady mužčyna akazaŭsia datyčny da źniknieńnia svajoj kalehi - 25-hadovaj Alesi Pancialejevaj. Praz hod u toj ža kampanii źnikła jašče adna supracoŭnica — 27-hadovaja Alaŭcina Mašurykava. Śledčyja ŭstanavili, što hetyja historyi źviazanyja. Jak vyśvietliłasia paźniej, abvinavačany spačatku prapanoŭvaŭ znajomym dziaŭčatam padkinuć ich da pracy, a sam zavoziŭ žančyn u haraž, hvałtavaŭ i zabivaŭ. Cieła svaich achviar jon zakopvaŭ u lesie ŭ Homielskim rajonie.
Usie sudovyja pracesy pa spravie prachodzili ŭ zakrytym režymie. 19 maja Homielski abłasny sud pryhavaryŭ Vostrykava da śmiarotnaha pakarańnia praz rasstreł. Bok abarony prasiŭ dla abvinavačanaha 25 hadoŭ pazbaŭleńnia voli. Z vynikovym prysudam advakat byŭ nie zhodny. Jon adznačyŭ, što Siarhiej Vostrykaŭ supracoŭničaŭ sa śledstvam, raskajaŭsia i ŭ chodzie pasiadžeńnia nieadnarazova prasiŭ prabačeńnia ŭ paciarpiełych.
Svajaki Alaŭciny, adnoj z zabitych dziaŭčat, ličać, što abvinavačany zasłužyŭ vyšejšuju mieru pakarańnia. Baćki Alesi ad znosin z presaj tady admovilisia. Mama dziaŭčyny tolki padkreśliła, što ŭ ich svaja pazicyja pa hetaj spravie.
33-hadovy hamialčanin raniej užo byŭ sudzimy za razboj. U 2007 hodzie, pahražajučy dziaŭčynie nažom, jon skraŭ u jaje hrošy. Za heta Siarhiej Vostrykaŭ atrymaŭ try hady kałonii. Adsiedzieŭ paŭtara, a potym vyjšaŭ daterminova z zamienaj pakarańnia na bolš miakkaje - papraŭčyja raboty.
Siarhiej Vostrykaŭ žanaty, u jaho jość 3-hadovy syn.
Śmiarotny prysud, vyniesieny Vostrykavu, staŭ užo trecim z pačatku hoda.
Kamientary