Siamihadovaja Bana Ałabied apublikavała hetuju fatahrafiju ŭ svaim «Tvitary» tydzień tamu. Pierad joj lažyć kniha, na stale siadzić lalka. «Dobraj ranicy z Alepa. Ja čytaju, kab zabyć pra vajnu», — tak padpisanaja hetaja fatahrafija.

Druhi pa vieličyni horad Siryi Alepa raskołaty niaspynnym krovapralitnym kanfliktam. Tym, chto zastaŭsia ŭ horadzie i apynuŭsia ŭ pastcy pamiž siłami paŭstancaŭ i ŭrada, davodzicca štodnia zmahacca za svajo žyćcio.

Bana piša svaje tvity pa-anhlijsku, joj dapamahaje mama, nastaŭnica anhlijskaj. Jana raspaviadaje pra svajo žyćcio va ŭschodniaj častcy Alepa, jakaja ŭtrymlivajecca paŭstancami.

Na adnoj z fatahrafij Bana sa svaimi bratami: piacihadovym Machamiedam i trochhadovym Nuram. U podpisie da fota havorycca: «Pakul nie prylacieli samaloty, malujem z bratami. Nam patrebny mir, kab malavać».

Na karotkim videa troje dziaciej ŭ spalni. «My zaŭsiody budziem razam», — śmiajecca Bana, abdymajučy bratoŭ.

«Bačycie, bomby patrapili ŭ susiedni dom», — havorycca ŭ adnym z tvitaŭ, jon supravadžajecca niajasnym fota razburanaha doma.

«Bomby mohuć adabrać u mianie žyćcio ŭ luby momant».

Rasijskija i siryjskija siły rehularna bambiać Alepa na praciahu mnohich tydniaŭ.

Za apošnija niekalki dzion da akaŭnta Bany @alabedbana dałučylisia tysiačy fałovieraŭ. Jaje mama, Facima, dapamahaje Banie pisać tvity.

U razmovie ź Bi-bi-si Facima kaža, što jaje dačka choča, «kab śviet pačuŭ našy hałasy».

«Jana kaža: «Mama, čamu nam nichto nie dapamahaje?»

Niekatoryja jaje tvity vielmi sumnyja. Ale Bana, jakaja ŭžo straciła siabroŭ padčas bambiožak, pieražyła jašče bolš.

«Ale jana ŭsio bačyła, - kaža Facima, - Jana bačyła, jak zabivajuć jaje siabroŭ, jana bačyła, jak bambiać naš dom. Jana bačyła, jak bambili jaje škołu. Usio heta ŭpłyvaje na jaje».

Ale, niahledziačy ni na što, Facima kaža, što jaje dačce pašancavała. Padčas videazvanka, što ŭvieś čas pieraryvajecca, Bana hladzić na mamu, jakaja dapamahaje joj ź ciažkimi adkazami.

Jana choča stać nastaŭnikam, kali vyraście - «jak mama», i spadziajecca, što zmoža stać nastaŭnicaj anhlijskaj — «jak mama».

Jana nie chodzić u škołu ź minułaha hoda i choča viarnucca tudy. Jak i luboje siamihadovaje dzicia, jana choča hulać ź siabrami.

Soniečnaja batareja daje siamji Facimy trochi elektryčnaści, adnak z-za drennaha internet-złučeńnia i staroj telefonnaj linii razmova pastajanna pieraryvajecca.

Facima kaža, što niedachop praduktaŭ charčavańnia adčuvajecca va ŭsim horadzie, u ich siamji zapasy taksama padychodziać da kanca.

Trochhadovy Nur niadaŭna chvareŭ, jana adviała jaho ŭ balnicu, ale tam skazali, što nijakich lekaŭ nie zastałosia.

Nur adčuvaje siabie lepš — jon čas ad času pierapyniaŭ našuju hutarku, kab abniać mamu.

Z pavieličeńniem kolkaści fałovieraŭ tviter-akaŭnta Bany ich stali vinavacić u tym, što rachunak padrobleny, a Facima vykarystoŭvaje svaju dačku dla prapahandy.

Asablivaj krytycy padviarhajucca tvity Bany, jakija tyčacca siryjskaha prezidenta Bašara Asada i rasijskaha prezydenta Ŭładzimiera Pucina.

Sumnievu padviarhajecca i toje, što Bana dobra vałodaje anhlijskaj movaj.

Baćka Bany - juryst, raniej jon pracavaŭ u jurydyčnaj firmie ŭ horadzie, jaje mama try hady vyvučała anhlijskuju ŭ linhvistyčnym instytucie, taksama jana vyvučała prava va ŭniviersitecie.

Facima kaža, što zajmałasia z Banaj anhlijskaj z tych časoŭ, jak toj spoŭniłasia čatyry hady.

Abvinavačvańni ŭ padmanie joj niepryjemnyja, jana kaža: «Usie słovy iduć z našaha serca, usio heta praŭda».

Jana nie źjaŭlajecca siabram dabračynnaj arhanizacyi, jaje nie padtrymlivajuć nijakija siryjskija srodki masavaj infarmacyi. Ale padčas navučańnia va univiersitecie jana prajšła kurs žurnalistyki i palitałohii i viedaje, jak pryciahnuć da svaich paviedamleńniaŭ ŭvahu.

Padčas našaha videazvanka Facima spytała, ci čujem my, jak laciać samaloty. Jana vyjšła na bałkon i pahladzieła na nieba.

«Hety huł budzie praciahvacca niekalki hadzin, - kaža jana. - Jany skidajuć bomby biez usiakaha žalu».

«My nie terarysty. My nie ID, —kaža Facima. - Tut žyvuć niavinnyja ludzi».

Praz hadzinu paśla zakančeńnia našaj razmovy Facima apublikavała novy videaklip. Facima hladzić napierad, a Bana zatykaje palcami vušy. Udalečyni čutny huk vybuchaŭ.

«Ja bajusia, što mahu pamierci siońnia nočču. Bomby zabjuć mianie», - havorycca ŭ tvicie Bany.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?