Jeŭrapiejski sajuz znachodzicca ŭ krytyčnaj situacyi, zajaviła kancler FRH Anhieła Mierkiel na niefarmalnym samicie krain ES, jaki adkryŭsia ŭ piatnicu ŭ Bracisłavie.
Udzielniki sustrečy abmiarkoŭvajuć kroki, jakija nieabchodna budzie raspačać paśla vychadu ź Jeŭrasajuza Vialikabrytanii.
Pa słovach Anhieły Mierkiel, jeŭrapiejskija krainy musiać prademanstravać, što jany zdolnyja ŭmacavać biaśpieku na kantyniencie, a taksama efiektyŭna supracoŭničać ŭ ekanomicy i ŭ śfiery abarony.
Adnak pamiž krainami ES zastajucca hłybokija roznahałośsi z nahody taho, jak zabiaśpiečyć ekanamičny rost i što rabić z napłyvam mihrantaŭ.
U stalicu Słavakii pryjechali pradstaŭniki 27 krain. Upieršyniu samit ES prachodzić bieź Vialikabrytanii, žychary jakoj prahałasavali na refierendumie za vychad z abjadnanaj Jeŭropy.
Pradstaŭniki dziaržaŭ pasprabujuć vyrašyć, što treba mianiać u palitycy sajuza paśla sychodu brytancaŭ.
Napiaredadni samitu staršynia Jeŭrapiejskaj rady Donald Tusk zaklikaŭ lidaraŭ ES zirnuć na prablemy supolnaści «ćviaroza i sumlenna».
U Bracisłavie nie płanujecca prymać jakija-niebudź rašeńni abo padpisvać dakumienty — jak tłumačać čynoŭniki ES, sustreča budzie bolš padobnaja na «mazhavy šturm» i abmien dumkami za začynienymi dźviaryma.
Publikujecca ŭ miežach śpiecyjalnaj rubryki «Naviny Hiermanii»
Kamientary