Rašeńnie vielmi važnaje dla zachavańnia haradzienskaj daŭniny, bo za apošnija hady šmat davajennych pramysłovych budynkaŭ u horadzie paprostu źniščyli. Naohuł ža, kaflarnyja majsterni stali pieršym abjektam u Hrodnie, jaki ŭnieśli ŭ śpis historyka-kulturnaj spadčyny za apošnija piać hadoŭ.

«Dla horada zaraz kaštoŭnaść ujaŭlaje ŭžo nie toje, što tam było ŭnutry, a sam budynak. Nijakaha abstalavańnia tam užo niama. Jašče ŭ 1970-ch hadach, kali fabryka pierastała funkcyjanavać, usio było zakinuta i praz 40 hadoŭ tam ničoha niama.

U Hrodnie zastałosia vielmi mała budynkaŭ źviazanych z pramysłovaj historyjaj horada. Šmat takich abjektaŭ my stracili ŭ apošnija hady — haradzienskaja elektrastancyja, fabryka ałoŭkaŭ, roznyja kazarmy i h.d. Dziakujučy našym namahańniam dva abjekta ŭdałosia zachavać — fabryku ihralnych kart Łapinych i kaflarnyja majsterni», — kaža historyk Andrej Vaškievič.

Budynki kaflarni jašče ŭ narmalnym stanie, ich možna budzie adramantavać i vystavić na aŭkcyjon, ličyć Vaškievič. Asnoŭnaja častka majsterniaŭ naležyć haradzienskamu budaŭničamu trestu. Častku zajmaje pryvatnaja drukarnia.

Taksama było b łahična ŭnieści ŭ śpis historyka-kulturnaj spadčyny damy pa vulicy Kachanoŭskaha, jakija śpiecyjalna budavalisia dla pracoŭnych fabryki, ličyć historyk. Hetyja damy padobnyja da samoj kaflarni.

Kab padać zajaŭku na ŭniasieńnie, treba sabrać vializnuju kolkaść dakumientaŭ, što adymaje ŭ historykaŭ vielmi šmat času. Časta hetaja praca nie vielmi ŭdziačnaja. Hetak, z 15 dasłanych apošnim časam haradzienskich prapanoŭ pa zaniasieńni ŭ śpis spadčyny, stanoŭčaje rašeńnie pryniali tolki pa kaflarni.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?