Čyž damoviŭsia ab sustrečy na miažy z kampańjonam Japryncava-małodšaha. A paśla taho advieźli ŭ KDB

Kiraŭnik fiederacyi spartyŭnaj baraćby Rasii i ciapierašni saŭładalnik «Trajpła» Michaił Mamijašvili, jaki maje dačynieńnie da napisańnia lista ŭ Kamitet dziaržbiaśpieki na svajho daŭniaha tavaryša Uładzimira Japryncava, mierkavaŭ, što toj adpravicca ŭ KDB na paru hadzin, a nie budzie zatrymany nadoŭha. Pra heta raspavioŭ padčas dopytu ŭ sudzie ŭ piatnicu abvinavačvany Alaksandr Arabian.

Pavialičyć

Abvinavačany raspavioŭ, što ŭviečary 11 žniŭnia 2015 hoda jon daviedaŭsia pra zatrymańnie Uładzimira Japryncava i jaho syna Kaźbieka. Na nastupny dzień jon datelefanavaŭsia Juryju Saviaku, jaki ŭžo viedaŭ pra heta («Ja nie ŭjaŭlaŭ tady, što jon moh być datyčnym da hetaha», — udakładniŭ Arabian) i adkazaŭ Arabianu, maŭlaŭ, «heta žach, treba niešta rabić».

«U Michaiła Hierazijeviča [Mamijašvili], kali ja prylacieŭ da jaho 13 žniŭnia [u Maskvu], stan byŭ prykładna taki ž, jak va Uładzimira Japryncava, kali jamu Kaźbiek pryznaŭsia [u maštabach finansavych prablem]… Ja nie ŭjaŭlaŭ tady, što heta jany z Saviakom pisali zajavu [na Japryncava-starejšaha]. My byli z Mamijašvili ŭdvaich u kabiniecie. Pryjšoŭ Aksienćjeŭ, pačaŭ pavodzić siabie nie vielmi adekvatna, kazaŭ, što heta vy padstroili, što Vova ŭsio skraŭ, pišy, maŭlaŭ, zajavu», — raspavioŭ abvinavačvany.

Jon udakładniŭ, što ŭ dziŭnaj advolnaj formie na patrabavańnie Aksienćjeva napisaŭ u «FSB Biełarusi», što jon i Kaźbiek ŭziali hrošy, paśla čaho kredytor «psichanuŭ i vyjšaŭ». «Michaił Hierazijevič skazaŭ: ty što, durań ci što? I skamiačyŭ papieru. Aburaŭsia, čamu adrazu nie skazali [pra pamiery daŭhoŭ i prablemy praz straty na «Foreksie»], my b usio vyrašyli, nie čužyja, maŭlaŭ, ludzi… A ciapier treba z Anzoram (Iosifam Aksienćjevym) vyrašać, jamu addać. Michaiłu Hierazijeviču pry mnie patelefanavaŭ Juryj Alaksandravič [Čyž]. Mamijašvili pačaŭ harłapanić na jaho: «nachren ty ŭsio heta zrabiŭ? U sensie navošta. Maŭlaŭ, ty ž kazaŭ, što Vova na paru hadzin [ŭ KDB]», — raspavioŭ Arabian.

Potym Mamijašvili zrabiŭ niekalki zvankoŭ i skazaŭ, što ŭ vyšuku Arabiana niama, paraiŭšy «jechać u Jerevan, a ŭ Minsk lepš nie sovacca».

29 vieraśnia Arabian ŭ Maskvie znoŭ sustrakaŭsia z Saviakom i Mamijašvili. «Uviečary płanavali sustreču ź niejkim śpiecyjalistam. Michaił Hierazijevič zadaŭ pytańnie, čym dapamahčy. Potym ja pajechaŭ u hatel, źbiraŭsia lacieć. My ź im paviačerali ŭ restaranie, kala Kramla, pahavaryli, potym jon vyjšaŭ pahavaryć. Jon viarnuŭsia chvilin praz 40, skazaŭ, što telefanavaŭ Juryj Alaksandravič [Čyž], choča, maŭlaŭ, sa mnoj sustrecca na miažy. Ja razumieŭ, što kali jedu, to nazad nie viartajusia. Mamijašvili namiaknuŭ, što Čyž maje dačynieńnie da hetaha. My sieli ź jaho [Mamijašvili] ludźmi ŭ mašynu, pajechali. Michaił Hierazijevič pa darozie niekalki razoŭ telefanavaŭ. Na miažy nas sustreła mašyna Čyža, 0708 džyp, pajechali ŭ Drazdy da jaho. Heta ranicaj było [30 vieraśnia]. Ale kiroŭca skazaŭ, što Jura sustrakacca nie budzie, my sieli ŭ mašynu i pajechali ŭ KDB», — raspavioŭ Arabian detali svajho zatrymańnia. «Pakul razmaŭlali ŭ Maskvie z Saviakom i Mamijašvili, pretenzij da mianie ci Kaźbieka nijakich nie było. U ich było pytańnie adno, kab Vova vyjšaŭ», — dadaŭ jon.

• 0
• 0
• 0
• 0
• 0
• 0