«U ich žyćcio nie skłałasia». Jarmošyna pa-chamsku patłumačyła, čamu niezaležnych vyłučencaŭ nie puścili ŭ vybarkamy
U Biełarusi sfarmiravana amal 6000 učastkovych vybarkamaŭ dla praviadzieńnia parłamienckich vybaraŭ. Małaja dola apazicyjanieraŭ u ich tłumačycca tym, što ŭ hetych ludziej niama aŭtarytetu na miescach, zajaviła kiraŭnik CVK Lidzija Jarmošyna na pres-kanfierencyi ŭ Minsku.
Usiaho va UVK vyłučałasia 73 278 čałaviek, prajšło ŭ ich skład 65 857 (90%). Pry hetym «prachodnaść» u skład vybarkamaŭ apazicyi akazałasia ŭ piać razoŭ nižej — 17%.
Usiaho 53 z vyłučanych 303 pradstaŭnikoŭ apazicyjnych partyj patrapili ŭ skład UVK. Atrymlivajecca, što apazicyjanieraŭ u hetych kamisijach, jakija i adkazvajuć za padlik hałasoŭ, budzie pa ŭsioj krainie mienš za 0,1%.
Čamu tak znoŭ atrymałasia?
«My rekamiendavali aceńvać usiu charaktarystyku asoby, jaje miesca ŭ hramadstvie, jaje sacyjalny aŭtarytet. Z hetaha robicca vysnova pra ŭklučeńnie taho ci inšaha čałavieka ŭ skład učastkovych vybarčych kamisij», — zajaviła Jarmošyna.
Jana patłumačyła, što ŭklučeńnie apazicyjanieraŭ u vybarkamy časta zaležyć ad taho, jakuju partyju jany pradstaŭlajuć: «Čaściej za ŭsio zadavalniajucca zajaŭki partyi levych «Spraviadlivy śviet», tamu što heta ludzi, jakija, jak praviła, daŭno i dobra umantavanyja ŭ hramadstva i karystajucca aŭtarytetam».
«Čaściakom u apazicyjnyja partyi iduć ludzi, u jakich žyćcio nie skłałasia, jakija nie zadavolenyja ni svaim žyćciom, ni uładaj. U ich i ŭ hramadstvie čaściakom isnuje kanfrantacyja z tymi, chto ich akružaje», — miarkuje Jarmošyna.
Kamientujučy nietraplańnie ŭ składy vybarkamaŭ navat takich viadomych ludziej, jak byłyja deputaty Viarchoŭnaha Savieta, naprykład, Alaksandra Dabravolskaha z AHP, Lidzija Jarmošyna padkreśliła: «Viadomaść i aŭtarytet — dźvie roznyja rečy. Možna być šyroka viadomym čałaviekam, ale z admoŭnym abajańniem».
* * *
Čytajcie taksama:
Historyja ŭźlotu babrujskaj jurystki Lidzii Jarmošynaj. Padrabiaznaści žyćcia staršyni CVK
«Lacieli vielmi nizka». Łukašenka pryznaŭ pralot dronaŭ nad Biełaruśsiu4
Kamientary