Rasija atrymała srodki, jakija zabiaśpiečvajuć niejtralizacyju vajennych abjektaŭ u krainach Uschodniaj Jeŭropy biez vykarystańnia terytoryi Biełarusi. Takim čynam, u Maskvy na siońnia niama vostraj nieabchodnaści raźmiaščać tut, u pryvatnaści, svaju avijabazu.

25 krasavika VMF Rasii pačaŭ u Kaśpijskim mory vučeńni z bajavymi strelbami, u tym liku z rakietnych kompleksaŭ «Kalibr-NK». Heta zbroja prahrymieła ŭ ŚMI paśla letašnich udaraŭ pa abjektach terarystyčnaj hrupoŭki «Isłamskaja dziaržava» (ID). Najaŭnaść u Rasii takoj zbroi stała faktaram, upłyŭ jakoha na stratehičnuju situacyju va Uschodniaj Jeŭropie vymušanyja ŭličvać vajennyja analityki usich krain rehijonu.

Pa majoj viersii, hety faktar paŭpłyvaŭ i na pytańnie raźmiaščeńnia rasijskaj avijabazy ŭ Biełarusi. Možna skazać, što biełaruskamu kiraŭnictvu pašancavała.

Nahadaju, jašče ŭ listapadzie minułaha hoda načalnik apieratyŭnaha ŭpraŭleńnia Hałoŭnaha štaba Pavietrana-kaśmičnych sił Rasii Alaksandr Lapkin vystupiŭ z zajavaj, jakuju možna było rascanić jak paćvierdžańnie, što pytańnie stvareńnia rasijskaj avijabazy ŭ Biełarusi praktyčna vyrašanaje.

Rasijski hienierał zajaviŭ, što skład hetaha padraździaleńnia i jaho arhanizacyjna-štatnaja struktura ŭžo zaćvierdžanyja. A mienavita: na aeradromie ŭ Babrujsku płanujecca dysłakavać eskadryllu ŭdarnych źniščalnikaŭ (12 adzinak) i viertalotnaje źviano (4 transpartna-bajavyja viertaloty Mi-8).

Naziralniki adznačali: akramia procidziejańnia polskaj avijacyi, zadačaj hetaj avijahrupoŭki pavinien byŭ stać udzieł u niejtralizacyi budučych abjektaŭ JeŭraSRA na terytoryi toj ža Polščy. U Maskvie rasceńvajuć ich jak vielmi surjoznuju ryzyku dla rasijskich stratehičnych sił strymlivańnia.

Akramia taho, z publikacyj tamtejšych ŚMI vynikała, što pytańnie raźmiaščeńnia avijabazy ŭ Biełarusi razhladałasia rasiejskaj kirujučaj elitaj jak test dla Alaksandra Łukašenki.

Miž tym čas išoŭ, ale, niahledziačy na masu zručnych padstaŭ «prycisnuć chvost» biełaruskamu kiraŭnictvu, Maskva praktyčna pierastała aficyjna padymać temu avijabazy. Bolš za toje, 9 lutaha prezident Akademii hieapalityčnych prablem, były vysoki čynoŭnik Minabarony Rasii hienierał-pałkoŭnik Leanid Ivašoŭ zajaviŭ rasiejskamu infarmacyjnamu ahienctvu EADaily, što farmalnaja adsutnaść avijabazy nijak nie pieraškadžaje raźvićciu vajennaha supracoŭnictva dźviuch dziaržaŭ.

«Kali Alaksandru Ryhoraviču ideja raźmiaščeńnia avijabazy nie asabliva padabajecca i jon razhladaje heta jak niejkaje ŭščamleńnie svajho suvierenitetu, to jurydyčnaha afarmleńnia vajennaj bazy nie treba. Prosta treba raźvivać adzinuju abaronnuju prastoru. A jana jość — pracuje sumiesnaja kalehija ministerstvaŭ abarony, uzajemadziejničajuć hienieralnyja štaby, u chodzie vučeńniaŭ, kamandna-štabnych hulniaŭ adpracoŭvajucca pytańni zabieśpiačeńnia biaśpieki jak Biełarusi, tak i našaha zachodniaha stratehičnaha kirunku, uklučajučy i prybałtyjski. A kali ŭžo sapraŭdy paŭstanie pahroza, to pieradysłakavać šerah častak, i nie tolki avijacyjnych, budzie nieskładana», — skazaŭ Ivašoŭ.

A 26 lutaha pasoł Rasii ŭ Biełarusi Alaksandr Surykaŭ niečakana zajaviŭ, što Maskva vyrašyła ŭsio ž taki vyłučyć Minsku praź Jeŭrazijski fond stabilizacyi i raźvićcia kredyt u 2 młrd dołaraŭ. Pryčym nie było nijakich prykmiet taho, što rašeńnie pryniata na ŭmovach «kredyt u abmien na bazu».

Zrazumieła, što Rasija va ŭmovach žorstkaha ekanamičnaha kryzisu nie žadaje destabilizavać sacyjalna-palityčnuju situacyju ŭ Biełarusi, adsiul i vyłučeńnie srodkaŭ na «padtrymańnie štanoŭ». Ale jak tady być ź niejtralizacyjaj abjektaŭ PRA ŭ Polščy, jakija tak niervujuć Maskvu?

Adkaz na hetaje pytańnie daŭ ministr abarony Biełarusi Andrej Raŭkoŭ. Vystupajučy 22 kastryčnika na sieminary-praktykumie dla kiraŭnikoŭ centralnych biełaruskich ŚMI, Raŭkoŭ zajaviŭ, što sensu ŭ rasijskaj avijabazie na biełaruskaj terytoryi pakul niama. Pa słovach ministra, bolš efektyŭnymi mohuć być srodki paražeńnia, «jakija mohuć svoječasova ŭ patrebnym miescy» nanieści ŭdar pa abjektach patencyjnaha praciŭnika.

Ryzykniem vykazać zdahadku, što kiraŭnik biełaruskaha vajennaha viedamstva mieŭ na ŭvazie mienavita zbroju typu kryłatych rakiet (KR) 3M-14 nadvodnaha karabielnaha kompleksu «Kalibr-NK», jakimi 5 i 6 kastryčnika 2015 hoda karabli kaśpijskaj fłatylii nanieśli ŭdar pa 11 abjektach ID u Siryi. Pavodle dadzienych Minabarony Rasii, celi byli paražanyja z dakładnaściu da troch mietraŭ. A 8 śniežnia ŭdar pa pazicyjach ID byŭ upieršyniu naniesieny KR «Kalibr-PŁ» z dyziel-elektryčnaj padvodnaj łodki «Rastoŭ-na-Donie» prajektu 636.3 z akvatoryi Mižziemnaha mora.

Pusk kryłataj rakiety kompleksu «Kalibr-PŁ» z-pad vady

Pusk kryłataj rakiety kompleksu «Kalibr-PŁ» z-pad vady

31 śniežnia ŚMI sa spasyłkaj na dakład upraŭleńnia vajenna-marskoj vyviedki ZŠA paviedamili, što ŭ ramkach pieraŭzbrajeńnia VMF Rasija maje namier pašyryć vobłaść užyvańnia KR novaha pakaleńnia «Kalibr». Zrešty, heta paćviardžajecca i dadzienymi rasiejskaha Ministerstva abarony, zhodna ź jakim pastaŭki takoj vysokadakładnaj zbroi va ŭzbrojenyja siły krainy ŭ 2015 hodzie vyraśli ŭ razy.

Takim čynam, ciapier možna, jak pažartavaŭ adzin z błohieraŭ, «z rakietnaha katera, naprykład u Čudska-Pskoŭskim voziery, nakryć bazu NATA dzie-niebudź pad Lisabonam». Kali ž kazać surjozna, to ŭžo ciapier usia terytoryja Polščy (a takim čynam i ŭsie budučyja bazy) traplaje ŭ pole paražeńnia kompleksaŭ «Kalibr», raźmieščanych na rakietnych karablach kaśpijskaj fłatylii i Čarnamorskaha fłotu.

Vysokadakładnaja KR 3M-14 (pa kłasifikacyi ZŠA / NATA — SS-N-30), pavodle dadzienych adkrytych krynic, pryznačana dla paražeńnia stacyjanarnych (małaruchomych) naziemnych i marskich celaŭ. Typavymi celami dla jaje źjaŭlajucca naziemnyja punkty kiravańnia vojskami, składy ŭzbrajeńniaŭ i paliva, aeradromnyja i partovyja zbudavańni.

Rakiety 3M14 ŭ roznaj kanfihuracyi ŭvachodziać u skład rakietnaha kompleksu «Kalibr-NK» dla ŭzbrajeńnia nadvodnych karabloŭ, rakietnaha kompleksu «Kalibr-PŁ» dla padvodnych łodak, mabilnaha naziemnaha rakietnaha kompleksu «Kalibr-M», kompleksu rakietnaj zbroi avijacyjnaha bazavańnia «Kalibr-A ».

Hetyja rakiety abstaloŭvajucca kambinavanaj sistemaj naviadzieńnia. Kiravańnie ŭ palocie — całkam aŭtanomnaje. Bartavaja sistema kiravańnia pabudavana na bazie aŭtanomnaj iniercyjalnaj navihacyjnaj sistemy AB-40E. U skład sistemy kiravańnia rakiety ŭvachodzić radyjovysotamier typu RVE-B i pryjomnik sihnałaŭ sistemy spadarožnikavaj navihacyi (HŁONASS abo GPS). Radyjovysotamier zabiaśpiečvaje palot u režymie abminańnia reljefu za košt dakładnaha vytrymlivańnia vyšyni palotu: nad moram — nie bolš za 20 m, nad sušaj — ad 50 da 150 m (pry padychodzie da celi — źnižeńnie da 20 m).

Palot rakiet prachodzić pa zahadzia zakładzienym maršrucie ŭ adpaviednaści z dadzienymi vyviedki adnosna stanovišča celi i najaŭnaści srodkaŭ SPA. Karekcyja trajektoryi palotu rakiety na maršavym učastku ažyćciaŭlajecca pa dadzienych padsistemy spadarožnikavaj navihacyi i padsistemy karekcyi pa reljefie miascovaści. Palot adbyvajecca pa składanaj trajektoryi, rakieta maje mahčymaść abychodzić mocnyja zony SPA/PRA supiernika ci składanyja pa reljefie ŭčastki miascovaści za košt uvodu ŭ palotnaje zadańnie kaardynataŭ tak zvanych punktaŭ pavarotu maršrutu (da 15 apornych punktaŭ).

Naviadzieńnie na kančatkovym učastku trajektoryi ažyćciaŭlajecca pry dapamozie pamiechaabaronienaści aktyŭnaj radyjołakacyjnaj hałoŭki samanaviadzieńnia ARHS-14, jakaja efiektyŭna vyłučaje słaba prykmietnyja małapamiernyja celi na fonie padściłajučaj pavierchni.

Dalokaść palotu ekspartnaha varyjantu rakiety, jaki markirujecca litaraj «E», abmiežavanaja 300 km. Dla VMF Rasii dalokaść, pa zajavie krynic u Minabarony, składaje 2600 km.

Rakieta 3M-14 abstalavanaja mahutnaj 450-kiłahramovaj fuhasnaj bajavoj častkaj z opcyjaj pavietranaha padryvu. Raspracavany varyjant rakiety z kasietnaj bajavoj častkaj, kamplektavany askiepkavymi, fuhasnymi abo kumulatyŭnymi paražalnymi elemientami dla ŭdaru pa płoščavych i praciahłych celach. Dla ŭzbrojenych sił RF raspracavany varyjant ź jadziernaj bajavoj častkaj.

Takim čynam, majem fakt najaŭnaści ŭ Rasii mahutnaj vysokadakładnaj zbroi niajadziernaha strymlivańnia i paražeńnia addalenych celaŭ. Jana dazvalaje paražać abjekty patencyjnaha praciŭnika praktyčna pa ŭsioj Jeŭropie z ułasna rasijskaj terytoryi. U vyniku raźmiaščeńnie ŭdarnaj avijacyi Rasii ŭ Biełarusi stanovicca nie takim užo aktualnym, tym bolš što sajuźnik upirajecca.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?