Janukievič aštrafavany na 35 bazavych vieličyń za ŭdzieł u akcyi na Dzień Voli

Sud Savieckaha rajona Minska 29 krasavika aštrafavaŭ staršyniu Partyi BNF Alaksieja Janukieviča na 35 bazavych vieličyń (7 młn 350 tysiač rubloŭ) za ŭdzieł u akcyi 25 sakavika z nahody Dnia Voli.

«Sud paličyŭ, što ja ŭdzielničaŭ u niesankcyjanavanym mitynhu kala kinateatra «Kastryčnik «, choć heta miesca było dazvolena dla zboru ŭdzielnikaŭ akcyi, — paviedamiŭ Janukievič. — Na ich dumku, niesankcyjanavanym mitynham źjaviłasia masavaja prysutnaść hramadzian i vykrykvańnie łozunhaŭ, pryčym ja vykrykvaŭ ich praz hukaŭzmacnialnuju aparaturu».

Usiaho sud Savieckaha rajona Minska razhladaje administracyjnyja spravy ŭ dačynieńni da 12 udzielnikaŭ akcyi ŭ Dzień Voli.

Jak paviedamlajuć pravaabaroncy, aštrafavanyja kaardynatar kampanii «Jeŭrapiejskaja Biełaruś» Maksim Viniarski (35 bazavych vieličyń), člen Abjadnanaj hramadzianskaj partyi Mikałaj Kazłoŭ (40 bazavych vieličyń), aktyvisty apazicyi Kasia Ludvih (25 bazavych vieličyń) i Jaŭhien Batura (30 bazavych vieličyń).

Taksama siońnia razhladajucca administracyjnyja spravy ŭ dačynieńni da sustaršyni arhkamiteta partyi «Biełaruskaja chryścijanskaja demakratyja» Vitala Rymašeŭskaha, namieśnika staršyni ruchu «Za Svabodu» Alesia Łahvinca, aktyvistaŭ apazicyi Dźmitryja Daškieviča, Alesia Makajeva, Mikałaja Kołasa, Dźmitryja Palijenki, Dźmitryja Silčanki.

Nahadajem, Minharvykankam dazvoliŭ praviadzieńnie ŭ stalicy 25 sakavika akcyi z nahody Dnia Voli ŭ farmacie: zbor udzielnikaŭ kala kinateatra «Kastryčnik», šeście pa vulicy Surhanava da płoščy Banhałor, mitynh u parku Družby Narodaŭ. Adnak niekatoryja palityki i aktyvisty pierad pačatkam dazvolenaha šeścia ŭziali ŭdzieł va ŭskładańni kvietak da pomnika Janku Kupału ŭ adnajmiennym skviery, praviali tam mitynh i prajšli kałonaj pa praśpiekcie Niezaležnaści da kinateatra «Kastryčnik», što nie było dazvolena Minharvykankamam.

Za ŭdzieł u niesankcyjanavanych mierapryjemstvach 25 cakavika ŭžo asudžanyja apazicyjnyja palityki Uładzimir Niaklajeŭ i Anatol Labiedźka — kožny ź ich aštrafavany na 50 bazavych vieličyń (10,5 młn rubloŭ).

• 0
• 0
• 0
• 0
• 0
• 0