Biełaruś znoŭ u dziasiatcy krain z najhoršaj situacyjaj u halinie svabody presy
Mižnarodnaja pravaabarončaja arhanizacyja Freedom House znoŭ adniesła Biełaruś u dziasiatku krain i terytoryj z najhoršaj situacyjaj u halinie svabody presy. Śviežyja analityčnyja źviestki ŭtrymlivajucca ŭ dakładzie «Svaboda presy — 2016», apublikavanym na aficyjnym sajcie arhanizacyi.
Freedom House pryvodzić ahulny rejtynh dla 195 dziaržaŭ i čatyroch asobnych terytoryj — Hankonha, Kryma, Samaliłenda, Zachodniaha bieraha Iardana i siektara Haza.
Biełaruś apynułasia na šostym miescy z kanca, atrymaŭšy status krainy ź niesvabodnaj presaj. Horš, čym u Biełarusi, situacyja tolki ŭ Paŭnočnaj Karei, Turkmienistanie, va Uźbiekistanie, u Krymie i Erytrei.
Pravaabaroncy składajuć rejtynh na asnovie acenak pravavoha, palityčnaha i ekanamičnaha asiarodździa, dzie čym mienšaja atrymanaja kolkaść bałaŭ, tym lepš. Tak, situacyja z palityčnym asiarodździem u Biełarusi krychu źmianiłasia ŭ stanoŭčy bok, atrymaŭšy 34 bały z 40. Dla paraŭnańnia, u dakładzie za 2015 hod Freedom House acaniła biełaruskaje palityčnaje asiarodździe na 36 bałaŭ.
Pravavoje i ekanamičnaje asiarodździe ŭ Biełarusi za hod nie źmianiłasia — adpaviedna 29 i 28 bałaŭ z 30.
Źviestki pa Biełarusi ŭ novym dakładzie ab situacyi sa svabodaj presy padadzienyja tolki ŭ statystyčnaj tablicy i adznačanyja na interaktyŭnaj karcie. Asablivych zaŭvah ŭ tekście dakłada pra Biełaruś niama.
Kamientary