U brazilskim horadzie Rya-de-Žaniejra ŭ čaćvier abrynułasia vieładarožka, pabudavanaja da Alimpijskich hulniaŭ. Pavodle infarmacyi haziety O Globo, jakaja pakul nie paćvierdžanaja aficyjna, dva čałavieki zahinuli.
U dadzieny momant na miescy pracujuć ratavalniki. Incydent adbyŭsia paśla taho, jak na kanstrukcyju, jakaja padtrymlivaje vieładarožku, abrynułasia vialikaja chvala. Pavodle śviedčańnia vidavočcaŭ, niekalki čałaviek upali ŭniz, na prybiarežnyja skały, i ich zmyła ŭ mora. Traich paciarpiełych ratavalniki vyciahnuli z-pad zavałaŭ i adpravili ŭ balnicu. Daŭžynia ŭčastka, jaki abrynuŭsia, — kala 50 m.
Vieładarožka «Cim Majia» była aficyjna adkrytaja ŭ siaredzinie studzienia. Heta adzin z abjektaŭ mienavita haradskoj infrastruktury, pabudavany ŭładami da majučaj adbycca ŭ žniŭni ŭ Rya-de-Žaniejra Alimpijady. Jaho daŭžynia składaje kala čatyroch kiłamietraŭ. Asablivym honaram meryi i žycharoŭ Rya-de-Žaniejra staŭ vid, jaki adkryvajecca z hetaj vieładarožki: jana prakładzienaja ŭzdoŭž uźbiarežža i skał na vyšyni kala 10 m, i mnohija haradžanie ličać jaje samaj pryhožaj u śviecie.
Vynieśli prysud dokšyckamu piarevaratniu ŭ pahonach Zhirskamu1
Kamientary