Pradstaŭniki apazicyi abmierkavali ź dziaržsakratarom MZS Šviecyi situacyju ŭ Biełarusi i rehijonie

Situacyju ŭ Biełarusi i rehijonie abmierkavali pradstaŭniki apazicyi 31 sakavika ŭ Minsku ź dziaržsakratarom MZS Šviecyi Anikaj Sioder.

Ź biełaruskaha boku ŭ sustrečy brali ŭdzieł staršyni Biełaruskaj partyi levych «Spraviadlivy śviet» Siarhiej Kalakin, Abjadnanaj hramadzianskaj partyi Anatol Labiedźka, Partyi BNF Alaksiej Janukievič i sustaršynia arhkamiteta pa stvareńni partyi «Biełaruskaja chryścijanskaja demakratyja» Pavieł Sieviaryniec.

Jak paviedamiŭ Janukievič, u pačatku sustrečy Sioder padkreśliła, što heta pieršy aficyjny palityčny vizit pradstaŭnika Šviecyi takoha ŭzroŭniu ŭ Biełaruś za apošnija 25 hadoŭ.

Pavodle słoŭ lidara Partyi BNF, na sustrečy abmiarkoŭvałasia sučasnaja palityčnaja situacyja, a taksama pierśpiektyvy jaje raźvićcia ŭ suviazi z parłamienckimi vybarami.

Sa svajho boku Janukievič ŭzdymaŭ temy «bolš doŭhaterminovaha stratehičnaha padychodu da situacyi ŭ Biełarusi i rehijonie». «Ja kazaŭ pra nieabchodnaść raspracoŭki pakrokavaj darožnaj karty ŭ tym, što tyčycca dyjałohu ź biełaruskimi ŭładami. Taksama kazaŭ pra nieabchodnaść ŭžo zaraz raspracoŭvać sumiesna ź jeŭrapiejskimi kalehami pieralik dziejańniaŭ, jak paźbiehnuć tych niehatyŭnych nastupstvaŭ, jakija pieražyvaje Ukraina, u vypadku, kali ŭ Biełarusi pačnucca pieramieny i biełaruski narod zrobić prajeŭrapiejski vybar, ź jakim Rasija nie pahodzicca», — skazaŭ palityk.

Siodier, paviedamiŭ Janukievič, adznačyła, što ŭvaha da Biełarusi ŭ Šviecyi jość i jana «budzie zastavacca jak u kantekście jeŭrapiejskaha partniorstva, tak i ŭ kantekście raspracoŭki palityki ŭ adnosinach da Rasii i susiednich ź joj krain». «Na dvuchbakovym uzroŭni Šviecyja faktyčna razhladaje Biełaruś jak svajho susieda, tamu budzie vialikaja ŭvaha i da palityčnaha pracesu, i da parłamienckich vybaraŭ», — skazaŭ jon.

Sioder znachodzicca ŭ Biełarusi ź vizitam 31 sakavika — 1 krasavika. Jak paviedamiŭ siońnia na bryfinhu pres-sakratar MZS Dźmitryj Mirončyk, zapłanavanyja sustrečy ź ministram zamiežnych spraŭ Uładzimiram Makiejem i jaho namieśnikam Alenaj Kupčynoj.

«Padčas hetych sustreč adbudziecca abmierkavańnie tematyki biełaruska-šviedskich adnosin, dyjałohu pa linii Biełaruś — ES, uzajemadziejańnia ŭ ramkach mižnarodnych arhanizacyj, a taksama pytańnie mižnarodnaha i rehijanalnaha paradku dnia», — skazaŭ Mirončyk.

• 0
• 0
• 0
• 0
• 0
• 0