U 2016 hodzie Jeŭrasajuz pavialičyć finansavuju padtrymku Respubliki Biełaruś u dva razy, paviedamiła žurnalistam 31 sakavika ŭ Minsku kiraŭnik pradstaŭnictva ES u Biełarusi Andrea Viktaryn.Siońnia ŭ minskim hateli «Reniesans» adbyłasia cyrymonija padpisańnia miemarandumaŭ ab uzajemarazumieńni pamiž Prahramaj raźvićcia AAN i vykankamami 30 piłotnych rajonaŭ, jakija pieramahli ŭ konkursnym adbory sumiesnaha prajekta ES i PRAAN «Spryjańnie raźvićciu na miascovym uzroŭni ŭ Respublicy Biełaruś».
Pavodle słoŭ Viktaryn, sioleta Jeŭrasajuz vydzielić Biełarusi 29 młn jeŭra. Srodki pojduć na rašeńnie prablem, źviazanych ź mihracyjaj, rehijanalnym raźvićciom i ekanamičnym raźvićciom krainy ŭ cełym. Jašče kala 7 młn jeŭra płanujecca vydatkavać na ekanamičnaje raźvićcio rehijonaŭ. «Kančatkovy pamier sumy jašče abmiarkoŭvajecca», — dadała jeŭrapiejski dypłamat.
«Hałoŭnaje — nie ličby, a arhanizacyja supracoŭnictva pamiž miascovaj uładaj, hramadzianskaj supolnaściu, inšymi partniorami z metaj ustojlivaha raźvićcia rehijonaŭ. Važna taksama, kab inicyjatyva raźvivałasia źnizu», — padkreśliła Andrea Viktaryn.
Pavodle infarmacyi pres-słužby pradstaŭnictva AAN u Biełarusi, padpisanyja miemarandumy «stanuć simvałam hatoŭnaści 30 piłotnych rajonaŭ aprabavać terytaryjalna-aryjentavany padychod (TOR) da raźvićcia małych haradoŭ i sielskich terytoryj».
«U dalejšym, u piłotnych rajonach płanujecca pravieści maštabnuju pracu pa stvareńni miascovych inicyjatyŭnych hrup pa płanavańni TOR, jakija abjadnoŭvajuć intaresy orhanaŭ ułady, niekamiercyjnych arhanizacyj i biźniesu ŭ raspracoŭcy pryjarytetaŭ raźvićcia rajonaŭ. Členy miascovych supolnaściaŭ buduć mieć mahčymaść uziać udzieł u navučalnych mierapryjemstvach i pajezdkach u krainy ES pa vyvučeńni vopytu ŭ śfiery ŭstojlivaha terytaryjalnaha raźvićcia. U kancy 2016 — pačatku 2017 hoda projdzie bujny konkurs miascovych inicyjatyŭ, u miežach jakoha kožny rajon zmoža atrymać da 70 000 jeŭra na rašeńnie prablem miascovaha značeńnia», — paviedamlała pres-słužba pradstaŭnictva AAN napiaredadni padpisańnia miemarandumaŭ.
Kola Łukašenka syhraŭ na rajali na «Dni narodnaha adzinstva». Jaho tata pierad hetym pryhraziŭ Treciaj suśvietnaj vajnoj34
Kamientary