Na tarhi vystaŭleny kaścioł va Uździe, dzie chryścili baćku Janki Kupały
Elektronnyja tarhi na placoŭcy «BUTB-Majomaść» projduć nie ŭpieršyniu. Ale histaryčnyja budynki z małatka pradajuć nie tak časta.
U hety raz Uździenski rajonny vykanaŭčy kamitet pasprabuje pradać Kryžaŭźvižanski kaścioł va Uździe, pabudavany jašče ŭ 1798 hodzie rasiejskim hienierałam Kazimiram Zavišam. Kaścioł atočany kamiennaj aharodžaj z bramaj, a ŭ pačatku XX stahodździa da jaho prybudavali cahlanuju apsidu.
U 1843 hodzie ŭ hetym chramie chryścili Daminika Łuceviča - baćku Janki Kupały. Jak i mnohija relihijnyja budynki, u saviecki čas hety architekturny pomnik nieahatyčnaha stylu byŭ pieraprafilavany ŭ rajonny Dom kultury. U hetym statusie jon i zastajecca da hetaha času.
Ahulnaja płošča pamiaškańniaŭ biez sklapoŭ — 534 kvadratnyja mietry. U budynku jość elektryčnaść, aciapleńnie, vadapravod i kanalizacyja.
Zachavałasia adrestaŭravanaja aharodža z ujaznoj bramaj z butu i čyrvonaj cehły, a ŭ apsidzie ciapier raźmiaščajecca kacielnia.
Budynak dvuchpaviarchovy. Na pieršym paviersie budynka raźmieščany hladzielnaja zała źmiaščalnaściu 240 miescaŭ, harderob i składskoje pamiaškańnie. Na druhim paviersie faje i 7 rabočych kabinietaŭ. Razam z budynkam pakupniku pieradajecca ŭ arendu na 99 hadoŭ ziamielny ŭčastak płoščaj 0,3973 ha.
Pačatkovy košt łota - 259 438 410 rubloŭ, ci krychu mienš za 13 tysiač dalaraŭ.
Darečy, metavaje pryznačeńnie budynka źmianiać možna — hałoŭnaje, kab padčas rekanstrukcyi ci ramontu byŭ zachavany jaho źniešni vyhlad i «historyka-stylistyčnyja asablivaści». Heta značyć, pieramožca tarhoŭ zmoža adkryć tam, naprykład, kaviarniu, mini-hatel, restaran abo ofisy. Pry źmienie metavaha pryznačeńnia budynka, kab vykarystoŭvać jaho dla raźmiaščeńnia administracyjnych, hramadskich, handlovych, žyłych, zabaŭlalnych abjektaŭ, pradpryjemstvaŭ pa absłuhoŭvańni nasielnictva i inšych vytvorčaściaŭ, raźmiaščeńnie jakich dapuskajecca ŭ zonie žyłoj zabudovy, možna budzie źmianić metavaje pryznačeńnie i ziamielnaha ŭčastka.
Tarhi projduć 26 krasavika na placoŭcy «BUTB-Majomaść».
Takarčuk: Moža, za Jahorava prahałasavać, jaki budzie Łukašenku nohi całavać? Jazyki paadryvać by hetym hałasunam4
Kamientary