U 2016 hodzie siaredniaja zarabotnaja płata biełarusaŭ moža źnizicca da 200 dalaraŭ u ekvivalencie. Taki prahnoz zrabiŭ kiraŭnik Navukova-daśledčaha centra Miziesa Jarasłaŭ Ramančuk 14 studzienia ŭ Minsku na pres-kanfierencyi «Vykliki dla biełaruskaha biznesu ŭ 2016 hodzie ŭ kantekście vynikaŭ 2015 hoda. Zadačy. Mahčymaści. Ryzyki».
«Hod budzie takim składanym, što, ja dumaju, horšym scenaryjem stanie skaračeńnie zarpłaty da 200 dołaraŭ u ekvivalencie z ulikam kursavych tendencyj, rezkaha źnižeńnia dachodaŭ ad nafty i naftapraduktaŭ, taho, što častka pradprymalnikaŭ moža zastacca biez pracy», — adznačyŭ Ramančuk.
Dla daviedki: siaredni zarobak za studzień—listapad 2015 hoda skłaŭ 6 młn 656,5 tys. rubloŭ (abo 366,7 dalara ZŠA pa kursie Nacbanka).
Siarod asnoŭnych patrabavańniaŭ, jakija pavinny pradjaŭlać pradstaŭniki biełaruskaha biznesu, ekanamist nazvaŭ roŭnyja ŭmovy haspadarańnia dla dziaržaŭnaha i pryvatnaha biznesu, raźvićcio finansavych rynkaŭ, dyjałohavych placovak pamiž biznesam i ŭładaj, źnižeńnie padatkovaj i rehulatarnaj nahruzki, likvidacyju zaležnaści ad starych technałohij, pašyreńnie śfiery rynkavych adnosinaŭ, skaračeńnie dziaržaŭnych prahram.
Jon ličyć, što dla hetaha nieabchodna pradstaŭnictva biznesu ŭ orhanach dziaržkiravańnia, kab sumiesnymi namahańniami raspracavać antykryzisnuju stratehiju. «Heta pytańnie realnaha vyžyvańnia. U biznesu siońnia piesimistyčny nastroj. Častka biznesu emihryruje (ucioki kapitału ŭ 2015 hodzie paskorylisia), častka biznesu prosta piarojdzie ŭ cień, častka biznesu budzie rehistravacca ŭ Smalensku dla taho, kab tam kancentravać vyručku i tam płacić padatki. Častka prosta spynić dziejnaść. Heta na fonie inviestycyjnaj «zasuchi» stvaraje vielizarnuju niebiaśpieku dalejšaj makraekanamičnaj destabilizacyi, tamu što raźličvać na prytok zamiežnych inviestycyj, ścipła acenieny biełaruskim uradam u 1,5 młrd dalaraŭ u 2016 hodzie, nie davodzicca», — ličyć ekśpiert.
Pavodle jaho słoŭ, 2016 hod stanie «jašče biadniejšym, jašče bolš piesimistyčnym, stvoryć jašče bolšyja ryzyki dla biznesu». «Zamiest taho, kab dyviersifikavać ekanomiku, demanapalizavać jaje, znachodzić novyja rynki i nie zajmać nišy, jakija zajmali stratnyja pradpryjemstvy, biełaruskija ŭłady pavialičvajuć vydatki, pavialičvajuć dziaržinviestycyi. Tym samym abiaskroŭlivajučy biznes za košt uviadzieńnia novych padatkovych i inšych instrumientaŭ, kab damahčysia kampiensacyj słabiejučych dachodaŭ za košt nafty. I heta zamiest taho, kab skazać, što 45% ad VUP na dziaržvydatki — heta šmat, treba zrabić 20—30%. Jany ž padnimajuć padatki, tamu što im nie z ruki skaračać dziaržvydatki», — ličyć ekanamist.
Na jaho dumku, situacyja nahadvaje 1990-ja hady, kali «kraina stajała na rostaniach i vyrašałasia pytańnie: što rabić?» «Ja vielmi nie raju biełaruskaj uładzie zrabić taki ž vybar, što i 20 hadoŭ tamu», — reziumavaŭ Ramančuk.
Kamientary