Twitter błakuje viadomych ukrainskich błohieraŭ. Jak nie dać siabie zabanić?

Pavodle novych praviłaŭ servisu ŭžo zablakavanyja dziasiatki viadomych ukrainskich błohieraŭ. Ale za tyja samyja parušeńni nie čapajuć prarasiejskich.

30 śniežnia papularnaja sacsietka Twitter paviedamiła pra abnaŭleńnie praviłaŭ servisu, skiravanych suprać abrazaŭ i zaklikaŭ da hvałtu. Ale ŭviadzieńnie novych praviłaŭ pryviało da blakirovak mnohich ukrainskich, praŭkrainskich i antypucinskich akaŭntaŭ.

Pad blakavańnie patrapili @persident_urk, @olegnovikovkh, @pv_petrychenko, @lvivzradko, @banderenko, @reggaemortis1, @tukvasociopat, @SPaWN_ua. Pryčym niekatoryja z hetych akaŭntaŭ mieli navat bolš za 400 000 padpisantaŭ.

Pavialičyć

Hałoŭnaja pryčyna banu — zaklik da hvałtu suprać separatystaŭ, jakija zabivajuć ukraincaŭ. Ale blakujuć pavodle novych praviłaŭ čamuści za tvity hadavoj daŭnaści — navat za cytaty — i tolki ludziej z praŭkrainskaj i antypucinskaj pazycyjaj. Za tyja samyja parušeńni nie vydalajuć trolaŭ z Rasiei, jakija zaklikajuć «vyrazać» ukraincaŭ i raźmiaščajuć žudasnyja fota zabitych ukrainskich sałdataŭ.

Pavialičyć

Samaje cikavaje, što na skarhi na hetyja tvity trolaŭ techničnaja padtrymka vielmi časta navat nie adkazvaje. Ale razam z tym kožny dzień vydalaje niekalki bujnych praŭkrainskich akaŭntaŭ. Na blakavańnie akaŭntaŭ upłyvaje masavaść skarhaŭ, i padobna na toje, što niejkaja arhanizacyja typu «Olhino» mahła nastvarać tysiačy botaŭ, kab tyja dzień i noč šukali daŭnija tvity, jakija parušajuć praviły servisu, i skardzilisia ŭ techničnuju padtrymku.

«Miarkujučy pa adsutnaści adkrytaha kaardynacyjnaha centru, vierahodna, praces pošuku tvitaŭ, jakija parušajuć praviły, i adpraŭki skarhaŭ adbyvajecca ŭ aŭtamatyčnym režymie, z vykarystańniem botaŭ», — piša na Facebook pra blakavańnie praŭkrainskich akaŭntaŭ rasiejski błohier Kiryła Michajłaŭ, jaki letaś pierajechaŭ va Ŭkrainu.

Na sytuacyju ŭžo adreahavaŭ navat pasoł Ukrainy ŭ Finlandyi, jaki źjaŭlajecca aktyŭnym karystalnikam tviteru. Jon apublikavaŭ zvarot da techpadtrymki kampanii z prośbaj źviarnuć uvahu na blakavańnie ŭkrainskich akaŭntaŭ. Pasoł taksama prapanuje rabić skrynšoty, jakija b dazvolili dakazać złamysny charaktar banaŭ ad rasiejskich trolaŭ.

Što zrabić kab ciabie nie zablakavali?

1. Źmianić u naładach twitter movu na anhielskuju. Takim čynam usie skarhi buduć iści ŭ zachodniuju techpadtrymku, a nie ŭ rasiejskuju, bo błohiery padazrajuć, što rasiejskamu servisu nielha daviarać.

2. Źmianić u naładach krainu. Lepš ZŠA ci niejkuju eŭrapiejskuju.

3. Pryviazać svoj numar telefona da akaŭntu twitter.

4. Vydalić usie svaje tvity. Kab heta zrabić, vam patrebna spačatku spampavać archiŭ usich svaich tvitaŭ na poštu. Heta robicca ŭ naładach. A potym spampavać prahramu Twitter Archive Eraser z dapamohaj jakoj vy možacie vydalić absalutna ŭsie svaje tvity. Spasyłka na prahramu: http://martani.github.io/Twitter-Archive-Eraser/

5. Prytrymlivacca novych praviłaŭ, nie pisać nijakich słovaŭ, jakija mohuć być pryčynaj blakavańnia. Nie zaklikać da hvałtu, navat u žartaŭlivaj formie.

6. Nie adkazvać trolam. Šmat chto ź ich specyjalna vas pravakuje, kab potym paskardzicca na vašyja tvity.

Blakavańni ŭkrainskich błohieraŭ užo adbyvalisia ŭ Facebook pavodle padobnaha scenaru. Paŭhoda tamu prezydent Ukrainy Piatro Parašenka źviartaŭsia da stvaralnika Facebook Marka Cukierberha z prośbaj ab adkryćci ŭkrainskaha padraździaleńnia kampanii dziela baraćby ź blakavańniami z palityčnych matyvaŭ. Cukierberh admoviŭ u adkryćci padraździaleńnia, ale masavyja blakavańni praz peŭny čas spynilisia.

• 0
• 0
• 0
• 0
• 0
• 0
• 0
• 0