Biełaruś i Ukraina ŭzhadnili ałharytm dziejańniaŭ pa źniaćci abmiežavalnych mier va ŭzajemnym handli, paviedamlaje pres-słužba biełaruskaha MZS.

28 śniežnia ŭ Minsku adbyłosia druhoje pasiadžeńnie biełaruska-ŭkrainskaj rabočaj hrupy vysokaha ŭzroŭniu pa pytańniach uzajemnaha handlu. Biełaruskuju častku rabočaj hrupy ŭznačaliŭ pieršy namieśnik ministra zamiežnych spraŭ Alaksandr Michnievič, ukrainskuju — namieśnik ministra ekanamičnaha raźvićcia i handlu — Handlovy pradstaŭnik Ukrainy Natalla Mikolskaja.

«U chodzie narady baki ŭzhadnili ałharytm dalejšych sumiesnych dziejańniaŭ pa źniaćci abmiežavalnych mier va ŭzajemnym handli, uklučajučy rašeńnie ŭkrainskaha boku ab uviadzieńni z 20 studzienia 2016 hoda śpiecyjalnaj pošliny ŭ pamiery 39,2% na niekatoryja biełaruskija tavary, jakija ekspartujucca va Ukrainu», — havorycca ŭ paviedamleńni MZS.

Mikolskaja taksama prainfarmavała biełaruski bok ab tym, što 26 śniežnia prezidentam Ukrainy padpisany zakon «Ab mierach pa stymulavańni źniešnieekanamičnaj dziejnaści», jakim z 1 studzienia 2016 hoda admianiajecca dadatkovy impartny zbor, što prymianiaŭsia ŭ tym liku adnosna biełaruskaj pradukcyi.

Adznačajecca, što admiena dadatkovaha impartnaha zboru dazvolić źniać dziejnyja taryfnyja barjery pa dostupie biełaruskaj pradukcyi na ŭkrainski rynak i stvoryć pieradumovy dla pavieličeńnia abjomaŭ ekspartu ajčynnych tavaraŭ va Ukrainu.

U kancy listapada Ukraina paviedamiła ab rašeńni ŭvieści 20 studzienia 2016 hoda pošlinu ŭ 39,2% na impart niekatorych biełaruskich tavaraŭ. Havorka idzie ab pastaŭkach małaka i małočnych praduktaŭ, syroŭ, rybnaj pradukcyi, kandytarskich i chlebabułačnych vyrabaŭ, šakaładu, piva, harełki, soli, kaśmietyki, šampuniaŭ, zapałak, kuchonnaj mebli, šyn, traktaroŭ i niekatorych inšych tavaraŭ. Hetaje rašeńnie pryniata ŭ adkaz na «dyskryminacyjnyja i niedružalubnyja dziejańni» Biełarusi adnosna ŭkrainskich pradpryjemstvaŭ kandytarskaj i pivavarnaj halin.

Miełasia na ŭvazie, što havorka idzie ab pastanovie Savieta ministraŭ Biełarusi № 666 «Ab uviadzieńni dziaržaŭnaj sanitarna-hihijeničnaj ekśpiertyzy na ŭvaznyja tavary» ad 6 žniŭnia 2015 hoda. Na bryfinhu ŭ Minsku 26 listapada pres-sakratar MZS Dźmitryj Mirončyk zajaviŭ, što «narmalny praces vypracoŭki ŭzajemaprymalnych i ŭzajemavyhadnych umoŭ handlu pamiž krainami skandalizujecca, pieravodzicca ŭ płoskaść nieprafiesijnaj publičnaj palemiki». Jon adznačyŭ, što «niama nijakaj dyskryminacyi ŭ sanitarna-hihijeničnaj ekśpiertyzie ŭkrainskaj pradukcyi — heta norma raspaŭsiudžvajecca na vytvorcaŭ z usich krain, jakija nie ŭvachodziać u Jeŭrazijski ekanamičny sajuz».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?