Były pravadyr ukrainskaj arhanizacyi «Pravy siektar», deputat Dźmitro Jaraš zajaviŭ ab vychadzie z arhanizacyi i ab stvareńni novaha hramadska-palityčnaha ruchu.

«Pryniaŭ važnaje rašeńnie. Dziakuj svaim bajavym pabracimam za davier!» — napisaŭ jon na svajoj staroncy ŭ Facebook i padaŭ spasyłku na videa na staroncy «Siektar praŭdy».

«Ja razam z majoj kamandaj sychodžu z Nacyjanalna-vyzvolnaha ruchu «Pravy siektar». My inicyjujem stvareńnie novaha hramadska-palityčnaha ruchu, ustanoŭčy źjezd jakoha płanujecca na luty. Pracujem ciapier nad jaho raźvićciom, kancepcyjaj dziejnaści, prahramnymi pryncypami», — havorycca ŭ zajavie Jaraša.

«Niezaležnaść, spraviadlivaść i dabrabyt» nazyvajucca ŭ jakaści bazavych kaštoŭnaściej novaha ruchu.

Jon taksama abviaściŭ, što 5-j i 8-j bataljony Dobraachvotnickaha korpusa «Pravy siektar» i miedycynski bataljon «haśpitaljeraŭ» rearhanizoŭvać u Dobraachvotnickuju ŭkrainskuju armiju, jakaja budzie adnoj sa struktur stvaranaha novaha ruchu. Jaraš paabiacaŭ ciesnuju supracu ź dziaržaŭnymi siłavymi strukturami.

Što da «Pravaha siektara», dyk Jaraš adznačyŭ, što jon paŭstaŭ «jak revalucyjnaja struktura — padčas revalucyi i dziela revalucyi».

«Hetaja revalucyja nie była skončanaja, i zaviaršeńnie jaje — stvareńnie Ukrainskaj samastojnaj sabornaj dziaržavy — ź niezaležnych ad nas pryčyn, hałoŭnaj siarod jakich źjaŭlajecca vajna z rasijskim ahresaram, adkłałasia ŭ časie. Tamu ja liču, što na siońnia PS jak revalucyjnaja struktura vykanaŭ svaju misiju, i vykanaŭ jaje pa poŭnaj», — adznačyŭ Jaraš.

«Ciapier nastaŭ čas zasiarodzicca na dziaržaŭnych rečach. Naš ruch vyras, adužeŭ i pierachodzić na novy etap svajho raźvićcia. Ciapier my chočam paŭstać nie jak vuzka-funkcyjanalny, a jak ahulnanacyjanalny patryjatyčny ruch, z metaj abjadnać usich patryjotaŭ Ukrainy. Biez radykalizmu na miažy z marhinesam, ale i bieź libieralnaj demahohii», — padkreśliŭ Jaraš.

«Naša zadača — dvuadzinaja: zachavać isnujučuju dziaržava jak płacdarm dla atrymańnia nacyjanalnaj dziaržaŭnaści i pravieści ŭ joj revalucyjnyja źmieny, jakija zabiaśpiečać ŭkrainskaha narodu svabodu, spraviadlivaść i dabrabyt», — adznačyŭ Jaraš.

Jaraš dadaŭ, što ruch «nie admaŭlajecca ad revalucyjnaha šlachu, ale kateharyčna admaŭlaje psieŭdarevalucyjnuju dziejnaść, jakaja pahražaje isnavańniu dziaržavy Ukraina i plamić reputacyju patryjotaŭ».

«My apazicyjnyja da dziejučaj ułady, ale nie ličym metazhodnymi kryvavyja (i asudžanyja na parazu) bunty suprać jaje», — adznačyŭ Jaraš.

Vychadziec z uschodu Ukrainy, Jaraš staŭ papularnym u asiarodździ revalucyjnaj moładzi ŭ časie Jeŭramajdanu.

Kali Rasija zachapiła Krym i častku Danbasa, Jaraš pajšoŭ na front, byŭ paranieny.

Deputatam Viarchoŭnaj Rady jaho abrali ad Dnieprapiatroŭskaj vobłaści.

Jak palityk, Jaraš kateharyčna asudžaŭ zrastańnie častki miascovych struktur «Pravaha siektara» ź miascovymi kłanami i kryminalitetam, jak toje adbyłosia, u pryvatnaści, u Zakarpaćci. Sam Jaraš staić na pamiarkoŭna-dziaržaŭnickich pazicyjach. Jahonaja ideałohija blizkaja da jeŭrapiejskich kansiervataraŭ i chryścijanskich demakrataŭ. Pry hetych jahonyja struktury zachoŭvajuć atrybutyku «pravadyryzmu», ułaścivuju arhanizacyjam ukrainskich nacyjanalistaŭ pieršaj pałovy XX st.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?