Arhanizacyja zaklikała eŭrapiejskuju supolnaść akazać cisk na ŭłady Biełarusi z metaj spynieńnia praśledavańnia žurnalistaŭ.
 |
Mižnarodnaja arhanizacyja «Reparciory biaź miežaŭ» šakavanaja zatrymańniem i źbivańniem žurnalistaŭ padčas demanstracyi ŭ Miensku 25 sakavika, a taksama vobyskami, praviedzienymi 27 sakavika supracoŭnikami KDB u kvaterach žurnalistaŭ, jakija supracoŭničajuć z «Radyjo Racyja», «Eŭrapiejskim radyjo dla Biełarusi» i telekanałam «Biełsat». Pra heta zajaviła ŭ interviju BiełaPAN kiraŭnica adździełu Eŭropy i byłoha SSSR «Reparcioraŭ biaź miežaŭ» Elza Vidal.
«U dačynieńni da krytyki abo sił, jakija sprabujuć asłabić kantrol nad hramadztvam, va ŭładaŭ Biełarusi jość tolki adzin adkaz — represii i nasille», — ličyć E. Vidal.
Jana zaklikała eŭrapiejskuju supolnaść akazać nacisk na ŭłady Biełarusi z metaj spynieńnia praśledavańnia žurnalistaŭ.
«Ja liču, što takija inicyjatyvy, jak «Radyjo Racyja» abo telekanał «Biełsat», nieabchodna abaraniać. Nazirajucca navat sproby ŭładaŭ ŭvieści cenzuru ŭ internecie, što vyklikaje asablivuju zaniepakojenaść», — zaznačyła pradstaŭnica arhanizacyi.
Ranicaj 27 sakavika supracoŭniki Kamitetu dziaržbiaśpieki praviali vobyski ŭ zdymnych kvaterach žurnalistaŭ, jakija supracoŭničajuć z polskim «Radyjo Racyja», «Eŭrapiejskim radyjo dla Biełarusi», polskim telekanałam «Biełsat», a taksama ŭ damach u niezaležnych žurnalistaŭ z Homielu, Viciebsku, Bieraścia, Horadni, Babrujsku j inšych haradoŭ. Byli kanfiskavanyja arhtechnika i roznyja nośbity infarmacyi.
25 sakavika, padčas razhonu niesankcyjanavanaj akcyi z nahody Dnia voli ŭ Miensku, byli zatrymanyja žurnalisty hazety «Naša niva» Andrej Lankievič i Siamion Piečanko. Pry zatrymańni A. Lankieviča mocna źbili, niahledziačy na najaŭnaść u jaho žurnalisckaha paśviedčańnia. Jon abvinavačvaŭsia pa art. 23.34 Kodeksu ab administracyjnych pravaparušeńniach (parušeńnie paradku arhanizacyi abo praviadzieńnia masavaha mierapryjemstva abo pikietavańnia). S. Piečanko byŭ asudžany na 15 sutak aryštu pa analahičnym abvinavačańni.
Kamientary