«Biełavija» ŭviała dadatkovy płatny servis pa pieraafarmleńni pamyłkova zapoŭnienych kvitkoŭ

Avijakampanija «Biełavija» ŭviała dadatkovy płatny servis pa pieraafarmleńni pamyłkova zapoŭnienych biletaŭ, paviedamiła načalnik adździeła rekłamy i kamunikacyj avijakampanii Volha Hierasienka.

«Kali pasažyr ubačyŭ pamyłku ŭ proźviščy abo imieni i choča paźbiehnuć prablem u čas rehistracyi na rejs, jon moža pa svaim žadańni pieraaformić bilet na płatnaj asnovie», — adznačyła načalnik adździeła. Košt takoj pasłuhi składaje 30 jeŭra i spahaniajecca za kožnaje pieraafarmleńnie avijabileta.

Volha Hierasienka raskazała, što časam pasažyry afarmlajuć avijabilety łacinskimi litarami, pierakładajučy proźvišča z ruskaj movy. U toj ža čas pry rehistracyi na rejs pradjaŭlajecca pašpart, u jakim proźvišča napisana ŭ biełaruskim varyjancie. «Naprykład, pradstaŭniku našaj avijakampanii budzie zrazumieła, što heta adzin i toj ža pasažyr, ale pry vylecie z-za miažy na rehistracyi mohuć uźniknuć prablemy. Jak by tam ni było, kančatkova rašeńnie ab nieabchodnaści pieraafarmleńnia bileta prymaje sam pasažyr. Čałaviek moža pakinuć bilet z pamyłkami, ale jon pavinien być hatovy da taho, što rehistracyja na rejs moža zaniać bolš času», — rastłumačyła jana.

Pasłuha «Dobraachvotnaje pieraafarmleńnie avijabileta ŭ suviazi sa źmianieńniem pola imia pasažyra ŭ avijabilecie» praduhledžvaje pieraafarmleńnie avijabileta z metaj karekcyi pola imia pasažyra ŭ avijabilecie, kab danyja ŭ avijabilecie i pašparcie adpaviadali adno adnamu. Pry hetym pieraafarmleńnie avijabileta na inšaha pasažyra zabaroniena.

Na sajcie avijakampanii adznačana, što pieraafarmleńnie avijabileta ŭ suviazi sa źmianieńniem pola imia pasažyra na nazvanych vyšej umovach mahčyma ŭ vypadku, kali ŭ avijabilecie źmieščany tolki palotnyja siehmienty, aformlenyja na ŭłasnyja rejsy «Biełavija». Kali ŭ avijabilecie źmieščany palotnyja siehmienty inšych avijakampanij, pasažyram treba źviarnucca ŭ słužbu padtrymki klijentaŭ kampanii, jakaja aformiła avijabilet, dla ŭdakładnieńnia ŭmoŭ pieraafarmleńnia.

Zbor u pamiery 30 jeŭra nie spahaniajecca z udzielnikaŭ prahramy «Biełavija Lidar» (załatoha i siarebranaha ŭzroŭniaŭ), z pasažyraŭ, jakim mienš za 2 hady, za pieraafarmleńnie avijabiletaŭ, dzie źmieščany tolki palotnyja siehmienty biźnies-kłasa (pry kambinacyi ŭ bilecie taryfaŭ ekanamičnaha i biźnies-kłasa zbor spahaniajecca).

Razam z tym, biełaruski avijapieravozčyk paviedamlaje, što pieraafarmleńnie bileta ŭ suviazi sa źmianieńniem proźvišča abo imia vykonvajecca biaspłatna na padstavie dakumienta, jaki paćviardžaje heta źmianieńnie. Takim dakumientam moža być paśviedčańnie ab šlubie, razvodzie, źmianieńni imia. «Pašpart nie źjaŭlajecca dakumientam, jaki paćviardžaje źmianieńnie proźvišča abo imia», — źviarnuli ŭvahu ŭ avijakampanii.

• 0
• 0
• 0
• 0
• 0
• 0
• 0
• 0