Statkievič: Chaču arhanizavać sustreču Łukašenki z vybarščykami na płoščy
Były palitviazień raskazaŭ na pres-kanfierencyi, čamu nie baicca iznoŭ trapić za kraty.
28 žniŭnia Mikałaj Statkievič razam z Uładzimiram Niaklajevym, Anatolem Labiedźkam i Paŭłam Sieviaryncam praviali supolnuju pres-kanfierencyju, na jakoj raskazali pra svaje płany na reštu prezidenckaj kampanii.
Usie jany źbirajucca aktyŭna pracavać nad niepryznańniem vybaraŭ mižnarodnaj supolnaściu, fiksavać fakty falsifikacyi vybaraŭ.
Adnym z zapłanavanych mierapryjemstvaŭ Mikałaj Statkievič nazvaŭ sustreču Łukašenki z vybarščykami «u pryhožym miescy horada, na płoščy». Były palitviazień miarkuje, što kali kiraŭnik krainy zacikaŭleny ŭ pryznańni vybaraŭ ABSIE, jon jak minimum nie budzie razhaniać takuju akcyju.
«Pra 11 kastryčnika nichto nie havoryć — hetaja data ŭžo nie cikavaja. My arhanizujem sustreču z vybarščykami. Choć vybaraŭ i niama, zakon ab ich jość. Ja nie bajusia. Čym bolš vy baiciesia, tym bolš u vas zabirajuć… Kali vy nie supraciŭlajeciesia — vy addajacie prastoru. Zdali ŭsio. Pamiataju, kali viarnuŭsia paśla chimii — zastaŭsia tolki Banhałor. Viartajusia ciapier — užo i Banhałora niama. Kali ŭ Łukašenki takaja składanaja situacyja i jaho prypierła atrymać lehitymnaść, to davajcie skarystajemsia hetym i advajujem sabie prastoru. Jak tolki jon razhonić mirny schod vybarščykaŭ, jakija pryjšli jaho pasłuchać, to jon moža ŭžo i nie pravodzić hetyja vybary. Usia lehitymnaść skončycca. Bajusia ja tolki za blizkich i za Biełaruś», — skazaŭ Statkievič.
Kamientary