Apazicyja abjadnałasia, patrabuje vybaraŭ z udziełam Statkieviča
«Mikoła Statkievič — kandydat u prezidenty Biełarusi jašče ź minułaj vybarčaj kampanii», — zajaviŭ viadomy paet i apazicyjny palityk Uładzimir Niaklajeŭ 28 žniŭnia na pres-kanfierencyi ŭ Minsku.
Akramia Niaklajeva, u pres-kanfierencyi ŭdzielničali Mikałaj Statkievič, staršynia Abjadnanaj hramadzianskaj partyi Anatol Labiedźka i sustaršynia arhkamiteta pa stvareńni partyi «Biełaruskaja chryścijanskaja demakratyja» Pavieł Sieviaryniec.
«Ja pryjšoŭ padtrymać Statkieviča kandydatam u prezidenty. Jon — kandydat jašče z 2010 hoda.
Vyzvaliŭšy jaho jak palitviaźnia, ciapierašni biełaruski režym sam pryznaŭ jaho palitviaźniem, što b ni było napisana ŭ papierach ab vyzvaleńni. A značyć, sam režym, pryznaŭ, što Statkievič pazbaŭleny prava abiracca niezakonna», — zajaviŭ Niaklajeŭ, paviedamlaje BiełaPAN.
«I pakul jamu nie budzie viernuta heta prava, nijakija vybary nie mohuć ličyć zakonnymi.
I tym bolš — pryznanymi mižnarodnaj supolnaściu. I nichto z pradstaŭnikoŭ demakratyčnaj hramadskaści nie moža ŭdzielničać u hetych vybarach, kali tolki jon nie zdradnik i nie staŭ na bok režymu», — padkreśliŭ Niaklajeŭ.
Pa słovach palityka, jaki sam byŭ kandydatam u prezidenty na vybarach 2010 hoda, jon vyrašyŭ padtrymać Statkieviča, jaki sprabuje abjadnać apazicyjnyja siły.
Statkievič padziakavaŭ Uładzimiru Niaklajevu za jaho słovy i vykazaŭ udziačnaść žurnalistam. Pavodle jaho słoŭ, kali b nie padtrymka ŚMI, jon by nie vyjšaŭ na volu, piša Tut.by.
«Nas abjadnała supolnaja acenka vybaraŭ i supolnaja pazicyja ŭ dačynieńni da taho, što adbyvajecca. Pierš za ŭsio my aceńvajem toje, što adbyvajecca, jak sfalsifikavanyja vybary. Jany byli sfalsifikavanyja nie na etapie pratakołaŭ, a na etapie farmiravańnia biuleteniaŭ», — adznačyŭ były palitviazień.
Jon taksama pryznaŭsia, što nie vieryć u Łukašenku, jaki vystupaje za niezaležnaść — «abaraniać krainu z aŭtamatam u rukach jon [Łukašenka] nie budzie».
«Kali Biełaruś zdaść Rasii zdaść lehitymny z punktu hledžańnia mižnarodnaj supolnaści prezident, my nie zmožam hetamu supraćstajać», — ličyć Statkievič.
«Naša hałoŭnaja pazicyja — ihnaravać vybarčaje šou. Havorka nie idzie pra bajkot, mienavita pra ihnaravańnie šou pad nazvaj «vybary».
My budzie patrabavać spynić hetuju kampaniju, i pravieści narmalnyja demakratyčnyja vybary. Mahčyma, hetaja kampanija raściahniecca dla nas na hady, ale my svajoj mety dasiahniem », — padkreśliŭ Mikałaj Statkievič.
Žurnalisty pacikavilisia ŭ palitykaŭ, ci budzie apazicyja vystupać adzinym frontam i ci jość u ich prahrama dziejańniaŭ.
«Dva hałoŭnyja punkty: Biełaruś, jaje suvierenitet i niezaležnaść. I my zajaŭlajem, što Łukašenka nie źjaŭlajecca harantam niezaležnaści. My ščylna pracujem ź mižnarodnaj supolnaściu — kali ciapier nie pravieści pracu pa delehitymizacyi vynikaŭ vybaraŭ, to Łukašenka ŭpieršyniu stanie lehitymnym prezidentam paśla 1996 hoda», — adkazaŭ na pytańnie Anatol Labiedźka i skazaŭ, što sprava nie abmiažoŭvajecca tolki hetaj vybarčaj kampanijaj.
Apazicyja vystupaje za novyja svabodnyja vybary.
«Ja b chacieŭ viedać, kab kandydat Łukašenka patłumačyŭ, kudy jon nas viadzie. Nas nie puskajuć na sustrečy vybarščykaŭ z Łukašenkam, ale my chočam viedać. Ja navat hatovy sam arhanizavać hetuju sustreču, i hatovy harantavać jaho biaśpieku na hetaj sustrečy. Budu adpraŭlać zaprašeńnie — kali zamiest siabie jon dašle chłopcaŭ z dubinkami, my atrymajem adkaz na pytańnie, što nas čakaje dalej», — u svaju čarhu zaŭvažyŭ Mikałaj Statkievič.
«Łukašenkaŭska-jarmošynskaja stratehija adčuvaje kryzis, tamu jaje treba ihnaravać. Kali ŭčastki buduć paŭpustymi — heta budzie i naš vynik. Upeŭnieny, što ludziej buduć hnać pałkaj na vybary, bo hrošaj na piensii i zarobki niama», — dadaŭ Labiedźka.
«Režym źniaŭ abmiežavańni na prodaž ałkaholu. Biełarusy, vas źbirajucca spaić! Treba ź ćviarozaj hałavoj abjadnoŭvacca i baranić niezaležnaść i svabodu», — adznačyŭ Pavieł Sieviaryniec.
-
U žodzinskaj paliklinicy abviarhajuć, što ŭ ich u rehistratury pamior mužčyna
-
Biełarus, jaki haładaŭ u Kłajpiedzie z-za niemahčymaści vyvieźci aŭtamabil, ciapier pratestuje za akijanam
-
U Hrodnie ŭvadnačas zakryli pałovu kijoskaŭ, dzie možna nabyć kvitki na hramadski transpart. U aŭtaparku prablemy nie bačać
Saša Filipienka raskazaŭ, čamu nie płanuje pisać pa-biełarusku i jak Biełaruś moža stać padarunkam Rasii ŭ vajnie62
Kamientary