Natalla Piatkievič uznačalić turystyčny biznes Alaksandra Šakucina
Były pamočnik prezidenta Natalla Piatkievič uznačalić kampaniju «Šanter», jakaja budzie zajmacca turystyčnym biźniesam.
Infarmacyju pra heta paćvierdziŭ adzin z uładalnikaŭ kampanii Alaksandr Šakucin.
Upieršyniu ab hetym prajekcie stała viadoma padčas sustrečy Šakucina z Alaksandram Łukašenkam. Sienatar tady anansavaŭ budaŭnictva niekalkich novych abjektaŭ, u pryvatnaści, sanatoryja na 240 miescaŭ i haścinicy na 150 miescaŭ. Alaksandr Šakucin adznačyŭ, što ŭ bližejšy čas budzie prezientavany novy prajekt — turystyčnaja kampanija, jakaja maje ŭ svaim składzie palaŭničuju haspadarku.
Palaŭničuju haspadarku «Čyrvony bor» (Vierchniadźvinski rajon, Viciebskaja vobłaść) raźvivaje Mikałaj Varabiej, adzin z partnioraŭ Šakucina pa mašynabudaŭničym chołdynhu «Amkador» i «Salea», banku «Absalutbank», a taksama naftatrejdaru «Interservis». Mienavita «Interservis» aranduje ziemli na terytoryi adnajmiennaha respublikanskaha łandšaftnaha zakaźnika. Vosieńniu minułaha hoda tam byŭ pabudavany turystyčny kompleks premijalnaha siehmienta.
Tut źjavilisia vip-katedžy i draŭlanyja domiki z soniečnymi batarejami i hieatermalnym aciapleńniem. U «Čyrvonym bary» ŭźviali restaran, kinazału, kanfierenc-zału, trenažornuju zału, łaźniu i inšyja abaviazkovyja atrybuty takoha kompleksu.
Ale razynka kompleksu — pryrodnaja. U śpiecyjalna zaharodžanych valjerach možna ŭbačyć zubroŭ, aleniaŭ, łasioŭ, kazul i mufłonaŭ. Akramia taho, naviedvalniki mohuć panazirać za ptuškami. Vakoł pryrodnaha kompleksu šmat azior lednikovaha pachodžańnia, dzie možna rybačyć i kupacca.
Dla prasoŭvańnia hetaha abjekta «Interservis» stvaryŭ kampaniju «Šanter». Jana taksama abjadnaje niekalki abjektaŭ adpačynku «Amkadora». U pryvatnaści, sanatoryj «Praleska», jaki raźmieščany na bierazie Minskaha mora, bazu adpačynku «Rudakova» na Naračy, dziciačy łahier «Damanava» ŭ Maładziečanskim rajonie. Haścinicu płanujecca pabudavać u składzie dziełavoha kompleksu, ŭčastak pad budaŭnictva jakoha vyłučany na supraćlehłym baku ad «Minsk-Areny».
«Abjekty buduć padvierhnutyja surjoznaj madernizacyi. U cełym my płanujem vydatkavać na realizacyju hetych prajektaŭ bolš za $100 miljonaŭ», — raspavioŭ staršynia rady dyrektaraŭ chołdynhu «Amkador» Alaksandr Šakucin. Pavodle jaho słoŭ, «my chočam zajmacca ekspartam pasłuh, prynosić u krainu valutnuju vyručku». «Užo da nas jeduć turysty nie tolki z Rasii, ale i z cyvilizavanaj Jeŭropy — Aŭstryi, Hiermanii. My chočam pakazać, što i ŭ Biełarusi šmat dobrych miescaŭ dla adpačynku. Darečy, nazva kampanii «Šanter» rasšyfroŭvajecca jak «Šykoŭny Adpačynak Na TErytoryi Radzimy», — reziumavaŭ Šakucin.
Kamientary