Microsoft prezientavała novyja mahčymaści Windows 10, zamienu Internet Explorer i hałahrafičnyja akulary
Karparacyja Microsoft praviała 21 studzienia vialikuju prezientacyju novych praduktaŭ.
Novuju Windows 10, što była pradstaŭlenaja ŭvosień 2014 hoda, možna pasprabavać užo zaraz u papiaredniaj viersii. U joj jašče bahata niedapracovak, ale bolš za 1,7 młn čałaviek ryzyknuli stać jaje biaspłatnymi teściroŭščykami. Klučavyja pryncypy «dziasiatki» — biaśpieka i ŭniviersalnaść u rabocie jak z nastolnymi kampjutarami, tak i sa smartfonami i płanšetami.
Novaja papiaredniaja viersija «dziasiatki» dla testavańnia vyjdzie na nastupnym tydni, papiaredniaja mabilnaja viersija źjavicca ŭ lutym.
Ciapier Microsoft dzielić «žaleza» nastupnym čynam: adna viersija dla smartfonaŭ i płanšetaŭ z ekranami mieniej za 8 calaŭ, druhaja dla ŭsiaho (płanšety, noŭtbuki, nastolnyja kampjutary), što maje bolšyja ekrany. Dla ŭsich pryład budzie adziny mahazin prahram.
Abnaŭleńnie da Windows 10 budzie biaspłatnym dla pakupnikoŭ Windows 8 i 7 (tolki ŭ pieršy hod paśla vychadu «dziasiatki»), novuju «vindu» atrymajuć i ŭsie smartfony na Windows Phone 8.
Novyja prahramy zapuściacca i na hulniovaj kansoli Xbox One, pašyracca sacyjalnyja funkcyi XBox. A Windows u svaju čarhu bolš ciesna intehrujecca z kansollu. U hulcoŭ na kampjutary i XBox źjavicca mahčymaść hulać razam u adnu i tuju ža hulniu. Źjavicca mahčymaść pieradačy hulni (stryminhu) z XBox na kampjutar ci smartfon.
U «dziasiatcy» źjavicca padtrymka DirectX 12, što značyć bolej efiektyŭnaje vykarystańnie resursaŭ kampjutara i smartfona ŭ hulniach, mienšaje enierhaspažyvańnie i vyšejšuju pradukcyjnaść.
Nastolnaja Windows 10
Interfiejs «dziasiatki» paśpieŭ źmianicca z vosieni. Ciapier mieniu «Pusk» možna razhortvać na ŭvieś ekran. Ekran apaviaščeńniaŭ ciapier nahadvaje taki sa smartfonaŭ. Tudy trapiać novyja paviedamleńni, padziei z kalendara, infarmacyja ad prahram i h.d. Narešcie abjadnanyja «Nałady kampjutara» i «Panel kiravańnia», što dublavali funkcyi ŭ «vaśmiorcy».
Pobač z knopkaj «pusk» źjaviłasia panel hałasavoha asistenta Cortana, jaki budzie ciesna intehravany ŭ nastolnuju Windows 10. Microsoft nazvała hałasavoha asistenta Cortana vašym novym siamiejnikam. Jon (dakładniej, jana — hołas žanočy) budzie zdabyvać usio bolš infarmacyi pra vas, ale taja infarmacyja budzie vam adkrytaja, jaje možna budzie pravić.
Płanšety z ekranami bolš za 8 calaŭ atrymajuć nie mabilnuju, a nastolnuju viersiju «dziasiatki». Dla ich źjaviłasia mahčymaść chutkaha pieraklučeńnia miž płanšetnaj i nastolnaj viersijami interfiejsu.
Mabilnaja Windows 10
Miaža pamiž vialikimi smartfonami i maleńkimi płanšetami ścierłasia kančatkova. Usio, što maje ekran mienš za 8 calaŭ, atrymaje adnu adaptavanuju viersiju «dziasiatki». Jana budzie hatovaja da testavańnia ŭ chutkim časie.
Apaviaščeńni, jak i historyja braŭziera i kalandar, buduć sinchranizavanyja miž mabilnymi i nastolnymi pryładami na «dziasiatcy». Jak pisałasia vyšej, mahazin prahram budzie adziny z «nastolnaj» viersijaj, varta čakać «krospłatformiennych» prahram.
Z navinak mabilnaj «dziasiatki» — mahčymaść stavić fonavyja špalery na rabočy stoł, novaje mieniu naładaŭ, novaja kłavijatura (jakuju možna pieramiaščać pa ekranie), prasunuty hałasavy ŭvod teksta.
Mabilny Office nablizicca pa mahčymaściach da nastolnaha. Navat interfiejs Word, Excel i PowerPoint budzie vizualna nabližany, ale, viadoma, adaptavany da małych ekranaŭ.
Abnoviacca kalandar, pošta, płejer, karty, fotaalbom (ciapier z mahčymaściu aŭtamatyčnaha palapšeńnia fota).
Braŭzier Spartan
Internet Explorer maje vielmi kurjoznuju reputacyju. Niekatoryja ličać jaho niepaŭnavartasnym, hetkaj «prahramaj dla spampoŭvańnia braŭzieraŭ». Navat niahledziačy na toje, što novyja viersii «ekspłorera» niamnohim sastupajuć Chrome ci Firefox.
Microsoft nie advažyłasia «zabić» Internet Explorer, ale pradstaviła jaho kampańjona, lohki i chutki braŭzier Spartan. Jon źjavicca ŭ chutkim časie jak dla nastolnych kampjutaraŭ, tak i dla mabilnych pryład.
Spartan maje zručny režym čytańnia i śpis staronak, adkładzienych dla paźniejšaha čytańnia. U im možna rabić natatki adrazu na skrynšocie staronki, źjavicca knopka «padzialicca» (pieravažna ŭ sacsietkach). Jon padtrymlivaje i hałasavoha asistenta Cortana.
Akulary HoloLens
Microsoft pradstaviła svajo bačańnie akularaŭ Google Glass i šlema Oculus Rift. Niešta siaredniaje miž imi budzie zvacca HoloLens. Hadžet budzie mieć ułasnyja pracesar, videakartu i hałahrafičnuju kartu, adhukacca na hałasavyja kamandy i vydaje abjomny huk. Ich dyzajn nahadvaje akulary ź filma «Nazad u budučyniu 2».
Vyjava na HoloLens budzie dapaŭniać realnaść vakoł. Naprykład, na svaim realnym stale možna raspačać virtualnuju budoŭlu ŭ hulni Minecraft ci prajektavańnie 3D-madeli.
Data vychadu i cana nie nazyvajucca.
Na zimu zapłanavanyja masavyja zatrymańni, składzienyja «pieršy i druhi śpisy»29
Kamientary