Infarmacyjnuju pradukcyju ŭ Biełarusi płanujecca markiravać znakam uzrostavaj katehoryi
Infarmacyjnuju pradukcyju ŭ Biełarusi płanujecca markiravać znakam uzrostavaj katehoryi. Heta praduhledžana papraŭkami ŭ niekatoryja zakony pa pytańniach abarony dziaciej ad infarmacyi, što nanosić škodu ich zdaroŭju i raźvićciu.
Dakumient pastupiŭ u Pałatu pradstaŭnikoŭ (rychtujecca da razhladu ŭ pieršym čytańni) i apublikavany na Nacyjanalnym pravavym internet-partale, paviedamlaje BIEŁTA.
U zakonaprajekcie adznačajecca: da infarmacyjnaj pradukcyi adnosiacca pradukcyja ŚMI, drukavanaja pradukcyja, aŭdyjavizualnyja tvory, fanahramy, hulni, u tym liku hulni z elektronnym dyspłejem, kampjutarnyja hulni i prahramy na lubych vidach nośbitaŭ, a taksama infarmacyja, što raspaŭsiudžvajecca pry dapamozie masavych mierapryjemstvaŭ abo z vykarystańniem hłabalnaj kampjutarnaj sietki Internet, inšaj sietki elektrasuviazi ahulnaha karystańnia (u tym liku sietki sotavaj ruchomaj elektrasuviazi), vydzielenaj sietki elektrasuviazi.-0-
U zakonaprajekcie, u pryvatnaści, havorycca, što dzicia maje prava na abaronu ad infarmacyi, jakaja nanosić škodu jaho zdaroŭju i raźvićciu. U suviazi z hetym «zakanadaŭstvam ustanaŭlivajucca patrabavańni da raspaŭsiudžvańnia siarod dziaciej infarmacyi, u tym liku patrabavańni da ažyćciaŭleńnia kłasifikacyi infarmacyjnaj pradukcyi, jaje ekśpiertyzy, dziaržaŭnaha kantrolu i nahladu za vykanańniem zakanadaŭstva» ŭ hetaj śfiery. Pierš za ŭsio, heta nieabchodna dla abarony niepaŭnaletnich ad prapahandy parnahrafii, nasilla i žorstkaści, užyvańnia ałkaholnych napitkaŭ, spažyvańnia narkotykaŭ i psichatropaŭ, tytuniovych vyrabaŭ i h.d.
Niekatoryja papraŭki zakranajuć zakon «Ab rekłamie», adzin z artykułaŭ jakoha płanujecca dapoŭnić abzacam «znak uzrostavaj katehoryi infarmacyjnaj pradukcyi». U zakon Biełarusi «Ab srodkach masavaj infarmacyi» taksama buduć uniesieny dapaŭnieńni - jany abaviažuć jurydyčnuju asobu, na jakuju ŭskładzieny funkcyi redakcyi ŚMI, i (abo) raspaŭsiudžvalnika miedyjapradukcyi pa vynikach kłasifikacyi abaznačać jaje znakam uzrostavaj katehoryi.
Takim čynam, raspaŭsiudžvańnie miedyjapradukcyi biez markiroŭki znakam uzrostavaj katehoryi dapuskacca nie budzie, za vyklučeńniem pradukcyi radyjoviaščalnych ŚMI; telepieradač, što tranślirujucca ŭ pramym efiry; telepieradač infarmacyjna-analityčnaha, infarmacyjnaha, kulturna-aśvietnaha, spartyŭnaha i duchoŭna-aśvietnaha charaktaru. Abmiežavańni nie buduć zakranać taksama drukavanyja maśmiedyja, jakija śpiecyjalizujucca na raspaŭsiudžvańni infarmacyi ahulnapalityčnaha, navukovaha, vytvorča-praktyčnaha, narmatyŭnaha, masava-palityčnaha, aficyjnaha, duchoŭna-aśvietnaha, daviedačnaha, refieratyŭnaha i statystyčnaha charaktaru.
U zakonaprajekcie nazvany kryteryi, pa jakich vyznačajecca zabaronienaja dla raspaŭsiudžvańnia siarod dziaciej infarmacyja. Naprykład, heta infarmacyja, jakaja pabudžaje da dziejańniaŭ, patencyjalna niebiaśpiečnych dla ich žyćcia i zdaroŭja, abo schilaje da samazabojstva, a taksama infarmacyja, što vyklikaje ŭ dziaciej žadańnie ŭžyć ałkaholnyja napitki, pasprabavać narkotyki, psichatropy, ich anałahi, taksičnyja abo inšyja adurmańvajučyja rečyvy, pryniać udzieł u azartnych hulniach i h.d. Akramia taho, tut majecca na ŭvazie infarmacyja, jakaja pravakuje dziaciej na antyhramadskija i procipraŭnyja dziejańni, dyskredytuje instytut siamji abo źmiaščaje nienarmatyŭnuju leksiku, prapahanduje parnahrafiju.
Da infarmacyi, abmiežavanaj dla raspaŭsiudžvańnia siarod dziaciej peŭnaha ŭzrostu, płanujecca adnieści infarmacyju, jakaja pradstaŭlajecca ŭ vyhladzie apisańnia žorstkaści i nasilla; vyklikaje ŭ dziaciej žach abo paniku; źmiaščaje elemienty erotyki i inš.
Paśla taho jak papraŭki ŭ niekatoryja zakony ŭstupiać u siłu, vytvorca i (abo) raspaŭsiudžvalnik infarmacyjnaj pradukcyi, pryznačanaj dla raspaŭsiudžvańnia na terytoryi Biełarusi abo za jaje miežami (za vyklučeńniem rekłamy i filmaŭ), buduć zahadzia samastojna jaje kłasifikavać. Markiroŭka budzie pravodzicca ŭ zaležnaści ad najaŭnaści abo adsutnaści infarmacyi, jakaja nanosić škodu zdaroŭju i raźvićciu dziaciej. Znak uzrostavaj katehoryi ŭjaŭlaje saboj hrafičnaje abo tekstavaje abaznačeńnie.
Raźmiaščeńnie abo raspaŭsiudžvańnie rekłamy budzie ažyćciaŭlacca ŭ paradku, vyznačanym zakanadaŭstvam ab rekłamie. Što datyčycca kłasifikacyi filmaŭ, jakija taksama padpadajuć pad nieabchodnaść markiroŭki, jana budzie ažyćciaŭlacca ŭ adpaviednaści z zakanadaŭstvam ab kultury.
Kamientary