Žančynam va ŭładzie Alaksandr Łukašenka daviaraje bolš, čym mužčynam. Pra heta jon zajaviŭ 17 kastryčnika na pres-kanfierencyi dla rasijskich rehijanalnych ŚMI ŭ Minsku.
«Niachaj na mianie nie kryŭdziacca mužyki, ale žančynam va ŭładzie ja daviaraju bolš: jany bolš akuratnyja, aściarožnyja, mienš avanturnyja. Jany nikoli, pa vialikim košcie, u karupcyju nie ŭviažucca», — skazaŭ kiraŭnik dziaržavy.
Pavodle jaho słoŭ, žančyna va ŭładzie — zvyčajnaja źjava, u biełaruskim parłamiencie ich 37%. «U nas poŭnaja demakratyja, narod vybiraje, kaho choča, ale ŭsialak my padtrymlivajem žančyn. U vybarčuju kampaniju pajści i vyjhrać u mužykoŭ — heta nie prosta, ale ŭ nas za hrošy ŭ parłamient trapić niemahčyma. Harantyju daju, što nijakija hrošy nie adyhryvajuć roli ŭ vybarach. Upłyŭ na vybarčy praces u prezidenta jość. Niehałosnaja kvota dla žančyn 30-35% — heta zakon», — padkreśliŭ Łukašenka.
Šmat žančyn, pavodle jaho słoŭ, pracujuć i ŭ vykanaŭčaj uładzie. «Ale jość i takija pasady, dzie jana prosta hinie — staršyni harvykankama, abłvykankama. U nas tut adny mužyki, tamu što heta niemahčyma, žančyna nie vytrymaje, fizična ciažka. Nu jość adzinki siarod kiraŭnikoŭ vykankamaŭ», — zaznačyŭ Łukašenka.
Pavodle jaho słoŭ, šmat kiraŭnikoŭ-žančyn u sielskaj haspadarcy, mienš — u pramysłovaści. «Na inšych pasadach u nas zasille žančyn. Uličvajučy, što mužyk — hałava, a žančyna — šyja, u nas žančyny vielmi ŭpłyvajuć na palityku», — skazaŭ Łukašenka.
Kamientary