Minčanin sprabavaŭ pradać bilety na chakiej za $1600

Supracoŭniki milicyi spynili fakty niezakonnaj realizacyi za valutu biletaŭ na matčy čempijanatu śvietu pa chakiei ŭ Minsku.

Jak paviedamiŭ staršy opierupaŭnavažany pa asabliva važnych spravach hałoŭnaha ŭpraŭleńnia pa baraćbie z ekanamičnymi złačynstvami MUS Vieranika Paśmiećjeva, 19 maja supracoŭniki milicyi na terytoryi spartyŭnaha kompleksu «Minsk-Arena» vyjavili fakt realizacyi 42-hadovym minčaninam 138 biletaŭ na matč Kazachstan — Finlandyja za 1.600 dołaraŭ ZŠA. 

Mienavita ŭ momant realizacyi biletaŭ za zamiežnuju valutu rasijaninu raspaŭsiudžvalnik byŭ zatrymany apieratyŭnikami staličnaha ABEZ. Užo paśla administracyjnaha zatrymańnia jon dobraachvotna vydaŭ vartaŭnikam paradku jašče 108 biletaŭ na matč Kazachstan — Finlandyja, 40 biletaŭ na matč Danija — Francyja, 16 biletaŭ na matč Italija — Šviecyja i čatyry bilety na matč Danija — Słavakija.

U toj ža dzień u dačynieńni da pravaparušalnika supracoŭnikami ABEZ byŭ składzieny administracyjny pratakoł za niezakonnaje pryniaćcie zamiežnaj valuty ŭ jakaści płaciežnaha srodku (art. 11.1 KoAP). Heta ciahnie nakładańnie štrafu ŭ pamiery ad 10 da 50 bazavyja vieličyń (ad 1,5 da 7,5 młn. biełaruskich rubloŭ).

Materyjał pravierki pieradadzieny va ŭpraŭleńnie pa baraćbie z ekanamičnymi złačynstvami HUUS Minharvykankama, jakim pravodzicca pravierka z metaj ustanaŭleńnia kanała pastupleńnia biletaŭ i nastupnaha pryciahnieńnia vinavatych asob da administracyjnaj abo kryminalnaj adkaznaści za niezakonnuju pradprymalnickuju dziejnaść i ŭchileńnie ad vypłaty padatkaŭ. 

Pieršapačatkovymi pravieračnymi mierapryjemstvami ŭstanoŭlena, što bilety mieli nulavy košt. U staličnym upraŭleńni pa baraćbie z ekanamičnymi złačynstvami jość viersija, što bilety vydzialalisia nieŭstanoŭlenaj ustanovie biaspłatna dla dalejšaha raspaŭsiudžvańnia siarod rabotnikaŭ.

Pryviedzieny vypadak nie adzinkavy. 17 maja padčas sumiesnych rejdavych mierapryjemstvaŭ supracoŭnikami milicyi na terytoryi «Minsk-Areny» byli vyjaŭleny anałahičnyja fakty realizacyi biletaŭ tryma hramadzianami Rasii. Jany prapanoŭvali adzin bilet na matč Rasija — Finlandyja za 100 dołaraŭ ZŠA, adzin bilet pa canie 70 jeŭra i dva bilety za 300 dołaraŭ ZŠA na matč Rasija — Łatvija. 

U dačynieńni da pravaparušalnikaŭ za niezakonnaje pryniaćcie zamiežnaj valuty ŭ jakaści płaciežnaha srodku składzieny administracyjnyja pratakoły (art. 11.1 KoAP).

• 0
• 0
• 0
• 0
• 0
• 0
• 0
• 0