Za talerantnuju Biełaruś: pavodle apytańnia 38% biełarusaŭ majuć antysiemickija pohlady

U Biełarusi 38 % paŭnaletnich hramadzian majuć antysiemickija pohlady. Da takoj vysnovy pryjšli śpiecyjalisty z amierykanskaj pravaabarončaj arhanizacyi «Antydyfamacyjnaja liha» pa vynikach praviedzienaha ŭ 2013-2014 hodzie suśvietnaha daśledavańnia « Indeks antysiemityzmu — 2014». Pra heta paviedamlaje aficyjny sajt arhanizacyi.

Apytańnie ŭ Biełarusi prachodziła ad 6 da 27 śniežnia 2013 hoda, było apytana 500 čałaviek. Respandentam prapanoŭvali vykazać svaju zhodu ci niazhodu adnosna 11 samych pašyranych, na dumku aŭtaraŭ, stereatypaŭ pra jaŭrejaŭ. Da ludziej, jakija majuć antysiemickija pohlady, daśledčyki adnosili tych, chto pahadziŭsia z šaściu i bolš vykazvańniami.

Siarod takich stereatypaŭ: «jaŭrei majuć zanadta vialiki ŭpłyŭ u suśvietnaj ekanomicy», «jaŭrei dumajuć, što jany lepšyja za inšych ludziej», «jaŭrei kantralujuć suśvietnyja ŚMI», «jaŭrei adkaznyja za bolšaść vojnaŭ u śviecie» i h.d.

38% ź liku apytanych biełarusaŭ pahadzilisia z šaściu i bolš prapanavanymi stereatypami. Siarod mužčyn ich 41%, siarod žančyn - 31%. Siarod ludziej u vieku ad 18 da 34 hadoŭ ludziej z antysiemickimi pohladami 36 %, ad 35 da 49 hadoŭ — 35 %, starejšych za 50 hadoŭ — 42%.

4% biełarusaŭ ličać, što Chałakost — heta mif; 35 % ličać, što jon mieŭ miesca, ale lik zabitych jaŭrejaŭ mocna pierabolšany; 55 % ličać, što Chałakost mieŭ miesca ŭ historyi i dakładna zafiksavany lik jaho achviar.

Siaredni pakaźnik u śviecie - 26% (u rehijonie Uschodniaja Jeŭropa - 34 %). Najbolšy ŭzrovień antysiemityzmu zafiksavany ŭ Palestynie (93 %), Iraku (92 %), Jemienie (88 %); najmienšy - u Šviecyi (4% ), na Filipinach ( 3 %) i Łaosie (0,2 %).

Dla paraŭnańnia: u Łatvii ŭzrovień antysiemityzmu skłaŭ 28 %, u Rasii - 30 %, va Ukrainie - 38 %, u Polščy - 45%, u Litvie - 36 %, u ZŠA - 9 %, u Niamieččynie - 27%, u Vialikabrytanii - 8%.

Pa dadzienych daślednikaŭ, siarod musulman ŭzrovień ludziej z antysiemickimi pohladami 49 %, siarod chryścijan - 24 %, siarod induistaŭ - 19%, siarod budystaŭ - 17%.

«Antydyfamacyjnaja liha» - amierykanskaja pravaabarončaja hramadska-palityčnaja arhanizacyja, jakaja supraćstaić antysiemityzmu i inšym formam nieciarpimaści ŭ adnosinach da jaŭrejaŭ. Była zasnavana ŭ 1913 hodzie.

• 0
• 0
• 0
• 0
• 0
• 0
• 0
• 0