Mastacki ŭzrovień luboha fiestyvalu vyznačajuć filmy-pieramožcy.

Sioleta absalutnym lidaram minskaha «Listapada» stała stužka «Ida» (Polšča – Danija), jakuju źniaŭ režysior Pavieł Paŭlikoŭski.

Na rachunku «Idy» čatyry ŭznaharody. Hran-pry za najlepšy film («Zołata «Listapada»), pieramohi ŭ naminacyjach «Film jak źjava mastactva» («Srebra «Listapada»), «Za najlepšuju žanočuju rolu druhoha płanu» (aktrysa Ahata Kuleša) i «Za najlepšuju apieratarskuju pracu imia Juryja Maruchina» (apieratary Łukaš Žal i Ryšard Lenčeŭski).

Dziejańnie filma pačynajecca ŭ 1962 hodzie. 18-hadovaja palačka Hanna rychtujecca stać manaškaj u sirockim prytułku, dzie žyvie. Adnojčy jana daviedvajecca, što maje ciotku Vandu, siastru maci. Ź joj jana musić ubačycca pierad postryham. U razmovie Hanna daviedvajecca, što jaje sapraŭdnaje imia – Ida, i jana habrejka. Dziaŭčyna pačynaje šukać svaje karani…

Uvaha palakaŭ da temy Chałakostu i jaŭrejskaj temy nievypadkovaja. Padčas Druhoj suśvietnaj vajny ŭ krainie zahinuła 2,8 miljonaŭ jaŭrejaŭ, abo 85% usich.

A voś pa vynikach hałasavańnia hledačoŭ pieramahła stužka «Pa kole» (Sierbija — Hiermanija — Słavienija — Charvatyja — Francyja), jakuju źniaŭ režysior Srdan Hałubavič. Jana taksama ŭzdymaje prablemy adkaznaści za minułaje.

Dziejańnie adbyvajecca ŭ 1993 hodzie ŭ Bośnii padčas vajny, jakuju viali pamiž saboj respubliki byłoj Juhasłavii. Try sierbskija sałdaty napadajuć miascovaha musulmanina Charysa. Ich sasłužyviec Marka, jaki stanovicca vypadkovym śviedkam zdareńnia, umiešvajecca i ratuje niaščasnaha. Ale raźjušanyja vajskoŭcy zabivajuć da śmierci jaho samoha.

Dalejšaje padziej razhortvajucca ŭ 2008 hodzie. Baćka Marki, jaki zajmajecca pierabudovaj carkvy, atrymlivaje prapanovu ad dapamozie ad adnaho z zabojcaŭ svajho syna. A najlepšy siabar sałdata vymušany apieravać čałavieka, jaki taksama ŭdzielničaŭ u złačynstvie…

Čym možna patłumačyć takoje rašeńnie hledačoŭ? Zrazumieła, vysokim mastackim uzroŭniem stužki. Ale jašče i ŭskosnym faktaram.

Jak ličać historyki i palitołahi, kali b nie padpisańnie Biełaviežskich pahadnieńniaŭ, raźvićcio byłych savieckich respublik mahło pajści pa juhasłaŭskamu varyjantu. Tamu dziakujučy filmu biełarusy mohuć ubačyć varyjant raźvićcia padziej, jaki b moh čakać našu krainu.

Što jadnaje dva filmy? Ich stvaralniki nie bajacca svajho minułaha i naŭmysna vynosiać najbolš sprečnyja pytańni na šyrokaje abmierkavańnie. Jaki kantrast z pradukcyjaj «Biełaruśfilma», jakaja staranna abychodzić usio, što nie ŭkładajecca ŭ prakrustava łoža tak zvanaj «dziaržaŭnaj ideałohii».

Uvaha našych suajčyńnikaŭ da abiedźviuch stužak pakazalnaja. Biełarusy dahetul nie atrymali ad kiniematohrafa adkazy na balučyja temy ŭłasnaj historyi.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?