U Pskovie ŭ paniadziełak byŭ zabity viadomy pravasłaŭny śviatar Pavieł Adelhiejm. Padazravany ŭ zabojstvie ŭžo zatrymany.

Cieła zabitaha śviatara z nažavymi ranieńniami znajšli kala 20:00 u chramie Kanstancina i Aleny ŭ Krasnahorskim prajeździe.

Supracoŭniki patrulna-pastavoj słužby zatrymali padazravanaha ŭ ździajśnieńni złačynstva — im akazaŭsia žychar Maskvy. Pavodle papiarednich źviestak, złačynstva ŭčyniŭ małady čałaviek 1986 hoda naradžeńnia, paśla čaho nanios sabie dva nažavyja ranieńni. Padazravany znachodziŭsia ŭ nieadekvatnym stanie, ciapier jon špitalizavany.

Pa słovach vidavočcaŭ, napadnik kryčaŭ, što zabić śviatara jamu zahadaŭ satana.

Paŭłu Adelhiejmu 1 žniŭnia spoŭniłasia 75 hadoŭ.

Jahonyja baćki byli represavanyja savietami, baćka — artyst i paet — byŭ rasstralany ŭ 1942 h., rasstralany taksama byŭ dzied. Jon byŭ pachodžańniem z ruskich niemcaŭ, atrymaŭ adukacyju ŭ Bielhii, vałodaŭ majontkam pad Kijevam.

Pavieł paśla aryštu maci vychoŭvaŭsia ŭ dziciačym domie.

U 1969 hodzie śviatar byŭ aryštavany za raspaŭsiud relihijnaha samvydatu.
Adelhiejm byŭ asudžany na try hady łahieraŭ pa abvinavačvańni za «paklop na saviecki ład».

Znachodziačysia ŭ źniavoleńni, straciŭ pravuju nahu.

Z 1976 hoda Pavieł Adelhiejm słužyŭ u Pskoŭskaj jeparchii.

U 2008 hodzie ŭkazam mitrapalita Pskoŭskaha i Vialikałuckaha Jaŭsievija ajciec Pavieł byŭ źniaty z pasady nastajaciela chrama Śviatych Žančyn-Miranosic. Jak raspaviadaŭ sam Adelhiejm, jaho kanflikt ź mitrapalitam praciahvaŭsia 20 hadoŭ, uvieś čas znachodžańnia apošniaha ŭ Pskoŭskaj jeparchii.

Śviatar nieadnarazova vystupaŭ z publičnaj krytykaj dziejnaści RPC, u pryvatnaści, zakona ab abaronie pačućciaŭ viernikaŭ.

«Kali carkoŭny Hłaŭk vyznačyć, jakija pačućci treba abaraniać, na viernikaŭ pačnucca hanieńni za «niapravilnyja» pačućci. Hanieńni buduć horš za raniejšyja. Raspravu nad viernikami nazavuć abaronaj relihijnych pačućciaŭ. Budzie inkvizicyja. Skardzicca budzie niama kamu, jak zaŭsiody" — pisaŭ śviatar u svaim błohu ŭ ŽŽ.

Pskoŭski deputat Leŭ Šłośbierh u intervju Doždiu zajaviŭ, što zabojstva Paŭła Adelhiema -- strata takoha ž maštabu, jak i śmierć viadomaha rasijskaha śviatara Alaksandra Mienia".

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?