Paśla abnarodavańnia ŭ efiry tok-šou ANT «Adkryty farmat» 6 maja infarmacyi pra Volhu Sukora, jakaja ŭžo kala siami miesiacaŭ znachodzicca ŭ stanie komy paśla płastyčnaj apieracyi, žančynu dazvolili pakinuć u balnicy, choć raniej ź siam`ioj miedyki abmiarkoŭvali pytańnie ab vypiscy. Ab hetym paviedamiła stryječnaja siastra žančyny Volha Sizova.

33-hadovaja žycharka Minska znachodzicca ŭ Minskaj abłasnoj kliničnaj balnicy. Płastyčnaja apieracyja była praviedziena 10 kastryčnika 2012 hoda ŭ Minskaj abłasnoj dziciačaj kliničnaj balnicy.

«Kali my jechali z zapisu prahramy, nam paviedamili, što jana zastajecca ŭ balnicy. Biezumoŭna, maci Volhi tam praściej dahladać jaje: miedpiersanał moža ŭ vypadku nieabchodnaści dapamahčy», — skazała Sizova.

Zaznačym, što načalnik hałoŭnaha ŭpraŭleńnia arhanizacyi miedycynskaj dapamohi Ministerstva achovy zdaroŭja Ivan Ryžko rastłumačyŭ padčas tok-šou, što vypiska źviazana z tym, što pacyjentka nie maje patreby ŭ miedycynskaj dapamozie, joj patrebny tolki dohlad. Centraŭ komy, dzie ŭ niekatorych krainach nazirajucca takija pacyjenty, jak Volha Sukora, u Biełarusi niama.

Sizova skazała, što Volha advažyłasia na płastyčnuju apieracyju, kab vypravić prykus. Uračy kazali, što apieracyja pakazana, a z časam prablema budzie ŭzmacniacca. U žančyny taksama było žadańnie vyhladać lepš. «Jana zrabiła apieracyju nie raptam, a hadami vynošvała svajo rašeńnie, vybirała čas. Staranna rychtavałasia: prachodziła roznyja abśledavańni, zdavała analizy. Alerhii ŭ jaje nie było», — skazała stryječnaja siastra. Pavodle jaje słoŭ, pra toje, jak prachodziła apieracyja, svajaki faktyčna ničoha nie viedajuć dahetul. «Jość vypiska z balnicy, ale ŭ joj ab pryčynie stanu Volhi kankretna nie skazana. Jak zaraz ni ciažka, my vierym, što jana aprytomnieje. My nie chočam vieryć u horšaje. My spadziajomsia, što joj mohuć pryznačyć niejkaje lačeńnie, ale pakul jaje tolki dahladajuć», — skazała Sizova.

Hałoŭny ŭrač Minskaj abłasnoj kliničnaj balnicy, dzie zaraz znachodzicca Sukora, Juryj Budźko paviedamiŭ, što pieravodzić jaje ŭ inšuju kliniku ci vypisvać dadomu nie płanujuć. «Terminy znachodžańnia pacyjentaŭ u komie ŭ miedycynskich ustanovach nie rehłamientujucca nijakimi narmatyŭnymi aktami.
Heta pytańnie vyrašajecca kansiliumam uračoŭ z ulikam volevyjaŭleńnia svajakoŭ», — skazaŭ jon. Razam z tym hałoŭny ŭrač zaznačyŭ, što Volha Sukora dychaje samastojna, častkova ŭ jaje zachavany hłytalny refleks.
Havoračy ab prahnozie dla pacyjentki, doktar zaznačyŭ: «Usio byvaje. Miedycyna — heta nie matematyka. U nas dva plus dva nie zaŭsiody čatyry. Nadzieja dla ludziej heta taksama važna.
Na siońnia ŭ jaje ź`iaŭlajucca ruchalnyja refleksy, jana reahuje na huk. Jość prahres». Havoračy ab pryčynie ŭskładnieńniaŭ paśla apieracyjnaha ŭmiašańnia, Budźko paviedamiŭ, što, zhodna ź mižnarodnaj statystykaj, adzin vypadak komy prypadaje na 5 tysiač narkozaŭ niezaležna ad taho, jakaja apieracyja pravodzicca. Pry hetym jon padkreśliŭ, što ŭ abłasnoj balnicy ŭ hod prachodziać kala 15 tysiač apieracyj, «vypadkaŭ komy nie było».
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?