Biełaruski turyst zabłudziŭ u Karpatach, jaho šukaje miascovy avaryjna-ratavalny atrad.

Jak paviedamlaje ŭpraŭleńnie dziaržaŭnaj słužby Ukrainy pa nadzvyčajnych situacyjach pa Ivana-Frankoŭskaj vobłaści, 6 maja ŭ 17.15 u apieratyŭna-kaardynacyjny centr pastupiła paviedamleńnie, što na hary Pop-Ivan znachodziacca dvoje turystaŭ ź Minska — 1992 i 1981 hadoŭ naradžeńnia, jakija prosiać ab dapamozie ŭ pošukach ich tavaryša — 1984 hoda naradžeńnia. Małady čałaviek u niejki momant adyšoŭ ad hrupy i nie viarnuŭsia.

U 19.53 dla praviadzieńnia pošukava-ratavalnych rabot u napramku pahraničnaj zastavy vioski Šybienie Vierchavinskaha rajona vyjechali piać ratavalnikaŭ. U 20.35 z boku Zakarpackaj vobłaści šukać biełarusa vyjechaŭ jašče adzin atrad ź piaci čałaviek pošukava-ratavalnaha adździaleńnia horada Rachaŭ.

U 4 hadziny ranicy 7 maja pablizu viaršyni hary Pop-Ivan ratavalniki znajšli dvuch biełaruskich turystaŭ, ale miescaraźmiaščeńnie treciaha ŭsio jašče nieviadomaje.

Jak paviedamili ŭ UHSNS pa Ivana-Frankoŭskaj vobłaści, turysty išli pa Čarnahorskim chrybcie z hary Pop-Ivan u bok hary Havierła — samaha vysokaha punkta Ukrainy. Ciapier pošuki biełarusa viaducca tolki rachaŭskim pošukava-ratavalnym adździaleńniem, bo jaho siabry paviedamili, što, chutčej za ŭsio, jon zabłudziŭ na terytoryi Zakarpackaj vobłaści.

Viadoma, što mabilnaha telefona ŭ źnikłaha biełarusa niama.
U toj ža čas va ŭpraŭleńni adznačajuć, što źnikły — vopytny turyst i pakaraŭ Himałai. Jaho siabry byli taksama dobra padrychtavanyja, u ich byli z saboj pałatki, spalnyja miaški, pradukty charčavańnia.
Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?