Ekśpierty z amierykanskaha analityčnaha centra Stratfor ličać, što braty Džachar i Tamierłan Carnajevy, jakich padazrajuć va ŭčynieńni teraktu padčas marafona ŭ Bostanie 15 krasavika, naležali da hetak zvanych «nizavych» prychilnikaŭ džychadu i naŭrad ci mieli kantakty z prafiesijnymi terarystyčnymi hrupami nakštałt Al-Kaidy.
Da takoj vysnovy amierykanskich analitykaŭ padvodziać niekatoryja akaličnaści, źviazanyja z vybuchami ŭ Bostanie i zatrymańniem bratoŭ Carnajevych, a mienavita: nieskładany charaktar terarystyčnaj ataki bratoŭ; adsutnaść płana ŭciokaŭ; abrabavańnie bratami kramy niepadalok ad Bostanu 18 krasavika, praz try dni paśla teraktu.
Ale zhadany amierykanski analityčny centr miarkuje, što navat budučy takimi amatarami, «nizavyja» terarysty ujaŭlajuć vialikuju niebiaśpieku: «Hety vypadak pakazvaje, jak u apošnija hady pahroza džychadu pamienšyła svoj uzrovień surjoznaści, ale pašyryła svoj maštab. Hetaja tendencyja, jak miarkujem, budzie praciahvacca. U svabodnym hramadztvie zaŭsiody budzie šmat lohka dastupnych mišeniaŭ, i zabivać ludziej budzie nievierahodna lohka navat dla niepadrychtavanych asobaŭ. U hetym vypadku braty praviali ataku, jakaja była ŭ miežach ichnych mahčymaściaŭ, a nie sprabavali niečaha bolš hrandyjoznaha, dziela čaho mahła spatrebicca dapamohu zvonku, a ź joju źjavicca i niebiaśpieka być vykrytymi ahientami adpaviednych słužbaŭ» — pišuć analityki Stratfor.
Kamientary