Dziaržynski rajonny sud (Minskaja vobłaść) 11 krasavika spyniŭ administracyjnuju spravu ŭ dačynieńni da Vitala Hančara i Siarhieja Chačaturiana, jakich abvinavačvali pavodle artykuła 17.1 KoAP Biełarusi (drobnaje chulihanstva). Pra heta paviedamili ŭ pryvatnaj kulturna-aśvietnickaj ustanovie «Płatform inaviejšn».
Nahadajem, UUS Minabłvykankama infarmavała raniej, što apoŭnačy z 17 na 18 sakavika dvoje žycharoŭ Dziaržynska, jakija adpačyvali ŭ miascovym restaranie, vyjšli na vulicu ŭ supravadžeńni znajomych dziaŭčat. Zaŭvažyŭšy niepadaloku narad PPSM, maładyja ludzi stali śvistać i niecenzurna łajacca na adras milicyjanieraŭ. Na patrabavańnie pravaachoŭnikaŭ pradjavić dakumienty jany adkazali niecenzurnaj łajankaj i pahrozami raspravy. Pry zatrymańni akazali supraciŭleńnie, a padčas bojki milicyjanieram byli naniesieny cialesnyja paškodžańni, padrana forma. Ahlad, pavodle danych milicyi, pakazaŭ, što zatrymanyja byli mocna pjanyja.
Adnak paźniej na pravaabarončym sajcie platformarb.com źjaviłasia historyja zatrymanych Chačaturana i Hančara, jakaja šmat u čym razychodziłasia z aficyjnaj viersijaj milicyi.Pavodle słoŭ maładych ludziej, supracoŭniki PPSM pradjaŭlali pretenzii nieabhruntavana, admaŭlali ŭ mahčymaści patelefanavać, a paśla pry zatrymańni, pavodle słoŭ vypadkovych śviedak, źbivali rukami, nahami, dubinkami ŭžo zakavanych u naručniki maładych ludziej. Śviedki śćviardžali, što pry hetym milicyjaniery pavodzili siabie ahresiŭna, brydkasłovili. Chačaturian skazaŭ, što supracoŭniki milicyi abražali jaho i praciahvali źbivać i ŭ RAUS. Hančar śćviardžaŭ, što paśla zatrymańnia siła da jaho nie ŭžyvałasia.
Jak adznačajuć pravaabaroncy, na sudovym pasiadžeńni 11 krasavika śviedkami pravaparušeńniaŭ vystupili supracoŭniki PPSM Vital Klimašeŭski i Dźmitryj Kaścievič, jakija i zatrymali maładych ludziej u noč z 17 na 18 sakavika niedaloka ad restarana «Dziaržynski». Padčas razboru vyjaviłasia šmat supiarečnaściaŭ u pakazańniach śviedak z pratakołami zatrymańnia, jakija prymusili sud papraknuć ich u tym, što jany «nie znajšli čas navat pačytać ułasnyja raparty».
Tak, supracoŭniki milicyi, zabłytaŭšysia ŭ svaich pakazańniach, paćvierdzili sudu, što pratakoły byli składzieny biez zatrymanych, u toj čas jak paznaki «ad podpisu admaŭlajusia» ad imia Hančara i Chačaturiana na dakumientach prysutničali.
Sudu taksama niezrazumieła, u čym vyjaŭlałasia niepadparadkavańnie milicyjanieram, kali na patrabavańnie pradjavić dakumienty Hančar, u jakoha nie było z saboj pašparta, nazvaŭ svajo imia, proźvišča i adras pražyvańnia, jakija byli zapisany supracoŭnikami PPSM. Śviedki taksama pakazali, što maładyja ludzi "parušali hramadski paradak i niecenzurna łajalisia, čym abražali pačućci hramadzian", ale na pytańnie sudździ adkazali, što na miescy zatrymańnia nie było inšych hramadzianskich asob.
Sud spyniŭ razhlad i pakinuŭ zału pasiadžeńnia, navat nie vysłuchaŭšy pakazańniaŭ śviedak abarony.
Ciapier Chačaturan abskardzić raspačatuju ŭ dačynieńni da jaho administracyjnuju vytvorčaść pa častcy 1 artykuła 17.3 KoAP RB (raśpivańnie ałkaholnych, słabaałkaholnych napojaŭ ci piva ŭ hramadskim miescy abo źjaŭleńnie ŭ hramadskim miescy ci na pracy ŭ stanie apjanieńnia). Akramia taho, Dziaržynskim rajonnym adździełam Śledčaha kamiteta ŭ dačynieńni da maładych ludziej była raspačata sprava pavodle č. 2 art. 363 KK (supraciŭleńnie supracoŭniku orhanaŭ unutranych spraŭ ci inšaj asobie, jakaja achoŭvaje hramadski paradak). Pravodzicca pravierka.
Vyjšła na svabodu Antanina Kanavałava, davieranaja asoba Cichanoŭskaj u 2020 hodzie1
Kamientary