Hleb i da Hleba

13 žniŭnia startavaŭ čempijanat anhielskaje premjer-lihi. Sioleta ŭvaha da jaho ŭ biełarusaŭ asablivaja. U zornym i mahutnym «Arsenale» debiutavaŭ paŭabaronca nacyjanalnaj futbolnaj zbornaj Alaksandar Hleb. A telekanał «Ład» damoviŭsia pra tranślacyi matčaŭ premjer-lihi. Pryjarytet «Arsenału».

Futbolnyja ramantyki

Čempijanat Anhlii — najstarejšaje ŭ śviecie pieršynstvo, što viadzie svaju historyju ad 1889 h. Kluby ž pačali stvaracca kudy raniej. Bolšaść kamandaŭ vyšejšaha dyvizijonu, što sioleta ŭziali start ŭ čempijanacie, byli zasnavanyja ŭ 1870—1880-ja hady — čas, kali ajcy biełaruskaj dziaržaŭnaści hralisia ŭ paŭstancaŭ u parkach pry šlachieckich siadzibach.

Za sto ź liškam hod na brytanskich vyspach šmat čaho źmianiłasia. Tak, čempijon Anhlii ŭ 1979 i 1980 h., koliś słaŭny «Notynhem Forest» cielapajecca ciapier u trecim dyvizijonie. Zvaliłasia ŭ druhi dyvizijon i najstarejšaja kamanda Anhlii — «Šefiłd Junajted» (zasnavanaja ŭ 1848).

Va ŭsim śviecie anhielski futboł lubiać pieradusim za toje, što tut hulnia idzie da samaj apošniaj chviliny. Kamanda moža za piatnaccać chvilin da kanca sustrečy sastupać try miačy, potym chucieńka mabilizavacca, za dziesiać chvilin zraŭniać lik, ale potym prapuścić jašče paru miačoŭ. Pra hłuchuju abaronu, jakoj tak słaviacca kamandy poŭnačy Italii, i havorki niama.

My i jany

Škaduju, što nia trapiŭ na pieršy matč u čempijanacie «Arsenału» — na Hleba pahladzieć. «Kananiry» (tak zavuć «Arsenał») 14 žniŭnia na rodnym «Chajbery» prymali «Ńjukasł Junajted». Ale ranicaj taho dnia ja ŭžo adlataŭ z poststrajkavaha Chitroŭ. Zvolnienyja supracoŭniki byli adnoŭlenyja na pracy, i samalociki raźlacielisia z najbujniejšaha lotnišča kantynentu va ŭsie baki. Paśpieŭ navat na tranślacyju matču na «Ładzie».

Tamu daviałosia zadavolicca prahladam adnaho z subotnich matčaŭ u londanskim bary. Dylemy pierada mnoj nie stajała. Adzin sa šmatlikich irlandzkich pabaŭ na poŭnačy Londanu prapanoŭvaŭ hulniu majho ŭlubionaha «Mančesteru Junajted» ź liverpulskim «Evertanam».

Tolki pa darozie ŭ pab niepakoiła adno pytańnie: ci nie ździaruć irlandcy hrošy za ŭvachod?

Miesiacy try tamu mnie zakarcieła pahladzieć u adnym ź mienskich baraŭ-klubaŭ niejki futbolny matč. Ja patelefanavaŭ u hety klub i zapytaŭ: kolki kaštuje ŭvachod? «Biaspłatna, — badziora adrapartavali mnie na tym kancy drotu. Tolki vy musicie zamović sabie piva i ježy na… 14 tys. rubloŭ». Amal pavodle Hileviča: «Oj, jak daloka nam jašče da Eŭropy!»

Irlandcy hrošaj za ŭvachod nie ŭziali. A chto ž sam admovicca ad pary pintaŭ dobraha «Hinesu»?

Pokul nie pačałasia hulnia, ja razhladaŭ interjer pamiaškańnia: partrety prezydentaŭ Irlandyi, fatazdymki krajavidaŭ, mapa ŭsioj krainy, a paasobnyja, stylizavanyja pad Siaredniaviečča, — histaryčnych abłaściej. Ja b nie ździviŭsia, kab tut źbiralisia achviaravańni na dziejnaść «Šyn fejn». Achviaravaŭ by adzin-dva funty.

Mini-Londan

Stalica Anhlii pry kancy XX stahodździa stała sapraŭdnym polietničnym horadam. Składvajecca ŭražańnie, što na vulicach Londanu biełaskurych londancaŭ i vychadcaŭ ź Indyi, Banhladeš, Kitaju dy Afryki stała prykładna paroŭnu. Takaja samaja praporcyja zaŭvažnaja i ŭ pabie.

Bar naležyć irlandcam, matč hladzieli dzieści piaciora brytancaŭ, dvoje biełarusaŭ i kitajskaja hramada z čatyroch čałaviek. Pry kancy pieršaha tajmu padciahnułasia kupka maładzionaŭ — indusy, mułaty, italjaniec. Ale ŭsich jadnała luboŭ da futbołu i «Mančester Junajted», jaki kolki miesiacaŭ tamu nabyŭ amerykanski miljarder Malkalm Hłejzer.

Vydzialaŭsia na ahulnym tle chiba karenny brytaniec, jaki hučna chvareŭ za «cukieračak» — takaja mianuška ŭ «Evertanu». Hetym matčam na «Hudysan-parku» i adkryvaŭsia ŭvieś čempijanat. Kinuli manetku — hulnia pačałasia.

Najbolš dastavałasia 20-hadovamu vunderkindu Ŭejnu Runi. Uejn pakinuŭ «Evertan» hod tamu, pierajšoŭšy jakraz u «MIU». I kožny jahony dotyk da miača stadyjon sustrakaŭ śvistam. A kali «byčok» atrymlivaŭ pa nahach ci dobraha kuchtala ad byłych tavaryšaŭ pa kamandzie, stadyjon dachodziŭ da ekstazu. Ščyra radavaŭsia kožnamu padzieńniu hulca nacyjanalnaj zbornaj Anhlii i kaleha-zaŭziatar za majoj śpinaj.

Brat suprać brata

Matč byŭ cikavy pa niekalkich parametrach. Letaś «MIU» finišavaŭ trecim, «Evertan» — čaćviortym, dyj abodva harady znachodziacca pobač, tamu navat vypadaje kazać pra derbi paŭnočna-zachodniaj Anhlii.

Raniej vizytoŭkaj «MIU» byli braty Hary i Fił Nevił. Jany choć i nie bliźniaty, ale zdavalisia adnym cełym. Ale ŭletku mankunijancy ŭziali i pradali Fiła za 3,5 miljona funtaŭ u «Everton». I ŭ minułuju subotu F.Nevił byŭ samy zaŭvažny ŭ šerahach «cukieračak». To ź levaha flanhu padydzie, to z pravaha prarviecca, a to i z centru padkradziecca. I tušyŭ takija pažary ŭ varot navička «MIU» Edvina van der Sara akurat abaronca Hary Nevił. Praŭda, da niepasrednych sutyčak pamiž bratami nie dachodziła.

U «Mančestery» vyłučaŭsia Runi, a taksama dva zamiežniki — halandziec van Nistelroj i adkryćcio čempiainatu śvietu-2002 karejeiec Džyj-Suń Pak.

Tut naprošvajecca jašče adno paraŭnańnie ź Biełaruśsiu. Što robiać našy futbalisty ŭ nacyjanalnym pieršynstvie za piać chvilin da śvistka na pierapynak? Pravilna! Aščadžajuć siły, kab ich chapiła na marš-kidok da raspranalni.

U Anhlii ŭsio pa-inšamu. Kamandy pry kancy pieršaha tajmu rezka dadali ŭ chutkaściach, i van Nistelroj na 43-j chvilinie zabiŭ pieršy hoł čempijanatu 2005/06. A ŭ pačatku druhoha tajmu druhi raz varoty «Evertanu» paraziŭ Runi. Ale, da honaru liverpulskaha klubu, jon praciahvaŭ uparta zmahacca da apošniaj sekundy. Trener Devid Mojes rabiŭ zamieny, navat vypuściŭ adnafamilca «koŭča» «MIU» sera Aleksa Ferhiusana — hulca zbornaj Šatlandyi Dunkana Ferhiusana. Nie damahło. Abarona «Mančesteru» była nieprystupnaj.

Klub biełarusaŭ

U nastupnym tury 21 žniŭnia (niadziela) usich čakaje londanskaje superderbi. Žyvy eter na «Ładzie». «Arsenał» naviedajecca ŭ hości da čempijona krainy «Čełsi» i pasprabuje ŭziać revanš za parazu 7 žniŭnia ŭ matčy za superkubak Anhlii.

Cikavyja nastupnyja paraleli. «Arsenał» — klub poŭnačy Londanu. Špacyrujučy vulicami paŭnočnaha Londanu, pastajanna sustrakaŭ maładzionaŭ u sakołkach «Arsenału», aŭtamabili z symbolikaj «kananiraŭ», navat ściahi klubu ŭ voknach chataŭ-katedžaŭ.

Mienavita na poŭnačy brytanskaj stalicy znachodzicca najbujniejšy asiarodak prysutnaści biełarusaŭ na Tumannym Albijonie — u rajonie Finčli mieścicca kompleks biełaruskich budynkaŭ — Biełaruskaja biblijateka-muzej imia F.Skaryny, biełaruski internat dy «Marjan-Chaŭz». A «Biełaruski dom» Zhurtavańnia biełarusaŭ Vialikaj Brytanii naahuł znachodzicca za niekalki sotniaŭ metraŭ ad stadyjonu «Chajbery». I ciapier Alaksandar Hleb z šaści londanskich klubaŭ spyniŭ vybar na «kananirach». Voś takija novyja formy biełaruskaj prysutnaści ŭ Londanie.

• 0
• 0
• 0
• 0
• 0
• 0