Znajści
Ałharytmičny łacinski varyjant
13.04.2024 / 12:3533RusŁacBieł

Aktyvist Maksim Čarniaŭski źbiraŭsia stać žančynaj, a ciapier jon — baćka dvajniat u dekrecie. Jak tak?

Maksim Čarniaŭski ŭ 2011 hodzie staŭ viadomy paśla taho, jak źliŭ  kadebešnika, jaki sprabavaŭ jaho vierbavać, apubličyŭšy aŭdyja pieramovaŭ z supracoŭnikam orhanaŭ i jaho zdymak. Paśla hetaha ŭčynku Maksimu, na toj momant studentu žurfaka BDU, administrataru supołki «Nadakučyŭ nam hety Łukašenka» i stvaralniku sajta Gonzo.by, pryjšłosia źjechać ź Biełarusi. U 2021 hodzie Maksim dzialiŭsia tym, što adčuŭ siabie žančynaj i płanuje źmianić poł, ale siońnia jon — baćka dvajniat u dekrecie.

«Ja adčuŭ vialikuju ahidu ad byćcia mužčynam»

Zhadvajučy 2021 hod, Maksim kaža, što na toj momant u roli žančyny jon adčuvaŭ siabie maksimalna aŭtentyčna — nastolki, što prajšoŭ usie psichałahičnyja testy i pačaŭ płanavać apieracyju pa karekcyi połu, atrymaŭšy ŭsie nieabchodnyja leki napiaredadni (estrahien, prahiesteron, błakatary testasteronu). Ale potym jon asensavaŭ, što heta było reakcyjaj psichiki na traŭmatyčnyja padziei ŭ śviecie.

Maksim u momant adčuvańnia siabie žančynaj

«Tady ja pracavaŭ u instahramie jak maderatar ruskamoŭnaha rynku. I tam byŭ zmročny bok: zabojstvy ludziej, katavańni, samahubstvy ŭ navinach… Rasstreł sotni čałaviek u Novaj Ziełandyi, hvałt z maleńkaj dziaŭčynki ŭ anłajnie — usio heta ja musiŭ šmatkroć ahladać i vydalać. I maja psichika nie vytrymała. Ja adčuŭ vialikuju ahidu ad byćcia mužčynam, bo heta mianie jadnała z hvałtaŭnikom, a ja nie chacieŭ mieć ničoha supolnaha z takim złačyncam.

Heta nie było niejkaje racyjanalnaje rašeńnie, prosta ja adčuŭ što mužčynam nie mahu bolš być. A žančynaj — tak, z radaściu. I ja jak by pačaŭ žyćcio nanoŭ», — dzielicca ŭspaminami Maksim.

Usio źmianiłasia, kali Maks paznajomiŭsia z budučaj maci svaich dziaciej Mahdalenaj: dziakujučy joj, jon pryniaŭ svaju «žanockuju mužčynskaść», i patreba być žančynaj pastupova adyšła.

«Ja byŭ paśla razvodu. Byłaja žonka šmatkroć narakała, što ja niedastatkova mužčynski, heta taksama adyhrała peŭnuju rolu ŭ maim transhiendarnym pierachodzie.

Mahdalenka ž pryniała mianie takim, jakim ja jość. Dalikatnym mužčynam. Heta pieršaja žančyna ŭ maim žyćci, jakaja nie patrabavała Mužyka (možacie tut zhadać uvieś nabor stereatypaŭ pra toje, jakim pavinien być Mužyk)», — tłumačyć surazmoŭca.

Svaju rolu adyhrała i toje, što dziaŭčyna advučyłasia na «resacyjalizacyi» i akurat śpiecyjalizujecca na reabilitacyi ludziej, jakija zhubili siabie, dapamahaje intehravać ich u hramadstva.

Pry hetym Maksim adznačaje, što i ciapier vyznačaje siabie jak niebinarnuju piersonu:

«Zašmat stereatypaŭ pra toje, jakimi pavinny być mužčyna i žančyna. Heta ŭžo nie aktualna ŭ sučasnym prahresiŭnym hramadstvie».

@nashaniva Biełarus Maksim źbiraŭsia stać žančynaj, a ŭ vyniku staŭ baćkam bliźniat #biełaruś#novostibiełarusi#biełaruśnovosti#biełorusy#smienapoła#siemja#bliźniaški#dvojniaški#otiec#tradicionnyjeciennosti#roditieli#mužskoježienskoje♬ Solas X Interstellar - Gabriel Albuquerqüe

«Mahdalenka ad pačatku zajaŭlała, što budzie raźvivać karjeru, a ja budu zajmacca dziećmi»

Jašče kali Maksimu tolki vypisvali harmanalnyja preparaty pa karekcyi połu, jaho papiaredžvali, što heta moža pryvieści da biaspłodnaści. Tamu, kali jany zachacieli zavieści dziaciej, nie byli ŭpeŭnienyja ŭ tym, što ŭsio ŭdasca.

«My zrazumieli, što, kab našyja adnosiny mieli budučyniu, važna, kab my mahli mieć dziaciej. My padrychtavalisia surjozna: spačatku ja zrabiŭ test na jakaść śpiermy, jon vyjšaŭ pazityŭny. Potym my ŭstalavali dadatak na telefon, jaki pa cykłu miesiačnych padkazvaŭ, u jaki dzień samaja vialikaja imaviernaść zaciažaryć. U nas udałosia ź pieršaj sproby! Kali praź niekalki tydniaŭ test pakazaŭ dźvie pałoski, my raŭli ad ščaścia. A kali na UHD nam paviedamili, što buduć bliźniaty, my byli prosta ŭ šoku!» — nie chavaje emocyj małady baćka.

Dziaŭčynak-dvajniat nazvali Ruža i Lilija

U ich siamji mienavita Maksim adpraviŭsia ŭ dekret, a jaho dziaŭčyna, jakaja abaraniła mahistarskuju pierad rodami, pajšła pracavać, bo dla jaje važnaje raźvićcio karjery.

«Takoje rašeńnie dałosia lohka: my fieministy, Mahdalenka ad pačatku zajaŭlała, što budzie raźvivać karjeru, dapamahać biednym, biazdomnym, ałkaholikam, a ja budu zajmacca dziećmi. Jana pravieryła, jak ja apiekavaŭsia jaje chamiakom i svaimi kotkami, i zrabiła vysnovu, što ja budu dobrym apiakunom. Dahetul nie rasčaravałasia.

Pry hetym ja na ŭłasnaj skury adčuŭ, jakaja heta ciažkaja praca — hadavać dziaciej. I vielmi prykra, što ŭ hramadstvie jana niedaaceńvajecca. Našmat praściej chadzić na pracu i prynosić dadomu hrošy. A jašče ž žančynam dakidvajuć hatoŭku, pryborku, prańnie i hetak dalej. Ja liču, ich mužčyny za heta pavinny im dapłačvać!»

Maksim raskazvaje, što ŭ Polščy, dzie jany žyvuć, kožny z baćkoŭ moža pajści ŭ dekret, pryčym apłačvany dekret (70% zarobku) — heta 41 tydzień (dla bliźniat krychu bolš). Z hetych dzion adzin baćka moža ŭziać nie bolš čym 32 tydni, a rešta zastajecca druhomu partnioru, i kali jon jaje nie vykarystaje, jana zharyć.

«Pa 15 razoŭ za noč pračynaŭsia mianiać pampiersy»

Svaim samym vialikim vyprabavańniem u roli baćki Maksim nazyvaje pieršyja miesiacy paśla naradžeńnia małych.

«Pamiataju, ja pa 15 razoŭ za noč pračynaŭsia mianiać pampiersy, praz heta nie moh zusim vyspacca, psichika raschistvałasia i ja prymaŭ zaspakajalnyja konskimi dozami. Ciapier užo našmat lahčej — małyški časami tolki raz za noč prosiać źmianić pampiers (tut ja raju nabyć pampiersy z bambukavaha materyjału, jany daražejšyja, ale lepš usmoktvajuć vilhać).

Ale hałoŭnaja parada ad Maksa budučym baćkam: nie achviaravać saboju dzieciam z hałavoj.

«Vielmi istotna nie zabyvać pra svaje patreby. My chodzim da psichijatra i psichaterapieŭta, bo kłapacicca pra psichiku važna. Ja pajšoŭ na muaj-taj, kab vypuskać paru, Mahdalenka zajmajecca z trenierkaj taksama. Vyprabavańnie jość i ŭ zachavańni samich adnosin pamiž baćkami — toj, chto bolš zajmajecca dziećmi, moža złavać na druhoha, tut važna prahavorvać usie momanty».

«Ëść ambicyi pajści ŭ deputaty ŭ volnaj Biełarusi»

U Polščy Maksim skončyŭ bakałaŭryjat pa mižnarodnych adnosinach, mahistraturu pa kiravańni prajektami i hod advučyŭsia na jurydyčnym fakultecie.

«Kali Mahda zaciažaryła, to ja zabraŭ dakumienty, kab pajści ŭ IT — na jurydyčnym treba vučycca piać hod plus try hady licenzija, heta zašmat».

Nie tak daŭno chłopiec skončyŭ kursy teściroŭščykaŭ, a ciapier, kali dzieci śpiać, vyvučaje Java i nie hublaje nadziei ŭvajści ŭ IT.

Niahledziačy na toje, što Maksim užo atrymaŭ polski pašpart, jon praciahvaje adčuvać siabie najpierš biełarusam, sočyć za navinami z radzimy i płanuje vychoŭvać dziaciej u tym liku na biełaruskaj movie.

«U mianie jość ambicyi, kab u volnaj Biełarusi (spadziajusia, u parłamienckaj respublicy) pasprabavać pajści ŭ deputaty. Zrabić našuju krainu troški lepšaj dla ludziej. Heta majo pryznačeńnie: ja ad 2010 hoda adčuvaŭ, što žyvu ŭ dyktatury, što niemahčyma žyć u krainie z takoj uładaj. Chadziŭ na Płošču, «Stop-bienzin», maŭklivyja pratesty.

Pracy treba budzie šmat zrabić, i miarkuju, maja adukacyja i dośvied žyćcia ŭ demakratyčnaj krainie mohuć spatrebicca», — dzielicca chłopiec. «Ja płanuju viarnucca ŭ Biełaruś, kali budu patrebnym. Kali ž (nie daj boža) Biełaruś addaduć Rasii ŭ jakaści suciašalnaha pryza paśla parazy va Ukrainie, ja naŭrad ci pryjedu tudy sa svajoj siamjoj. Inšy varyjant: kali ja budu razumieć, što ŭ palityku tam iduć ludzi bolš abaznanyja i adukavanyja, čym ja, tady, mahčyma, ja taksama zajmusia niečym inšym».

Čytajcie taksama:

KDB zatrymaŭ u Drahičynskim rajonie 12 čałaviek za dapamohu Ukrainie

Išli pa dziaŭčynku, a tut «znoŭ dvojnia». Jak baćki z Baranavičaŭ hadujuć dźvie pary dvajniatak 

Nashaniva.com

Chočaš padzialicca važnaj infarmacyjaj
ananimna i kanfidencyjna?

Клас
75
Панылы сорам
37
Ха-ха
8
Ого
8
Сумна
7
Абуральна
16
0
Maksim Dizajnier/adkazać/
13.04.2024
[Red. vydalena]
0
dočka Maksima Dizajniera/adkazać/
13.04.2024
oho, Dizajnier, vas nie paznać) što na vas najšło? viasna?)
0
Fublanach/adkazać/
14.04.2024
[Red. vydalena]
Pakazać usie kamientary
Kab pakinuć kamientar, kali łaska, aktyvujcie JavaScript u naładach svajho braŭziera
Kab skarystacca kalendarom, kali łaska, aktyvujcie JavaScript u naładach svajho braŭziera
majčervieńlipień
PNSRČCPTSBND
12
3456789
10111213141516
17181920212223
24252627282930