Знайсці
05.04.2024 / 22:18РусŁacБел

Колькі сапраўды зарабляюць беларускія дактары? Спыталі ў іх

Падчас нядаўняга візіту ў Гродна Аляксандр Лукашэнка заявіў, што дактары ў Беларусі зарабляюць да дзесяці тысяч рублёў і параўнаў іх заробак з прэзідэнцкім. А міністр аховы здароўя агучыў, што сярэдні заробак у галіне складае 2800 рублёў. «Наша Ніва» пагутарыла з медыкамі пра тое, колькі яны атрымліваюць насамрэч.

2800 рублёў, кажуць суразмоўцы, доктар агульнай практыкі можа атрымаць, калі працаваць на паўтары стаўкі. Фота: «Наша Ніва»

Вузкія спецыялісты зарабляюць менш

Апытаныя намі медыкі называюць наступныя лічбы. Доктар агульнай практыкі (былыя тэрапеўты) у паліклініцы атрымлівае каля 2000 рублёў на рукі, калі працуе на поўную стаўку.

Калі браць 1,5 стаўкі, то выходзіць у раёне 2800 рублёў. Доктар з вялікім стажам, які працуе на паўтары стаўкі і бярэ дзяжурствы, разам з прэміяй можа зарабіць і 3 тысячы.

Куды менш зарабляюць медсёстры. На стаўку маладыя спецыялісты атрымліваюць каля 800-900 рублёў на рукі. Медсястра, якая працуе ў кабінеце фізіятэрапіі, зарабляе 1200 рублёў, паколькі атрымлівае кампенсацыю за шкодныя ўмовы працы.

Вузкія спецыялісты ў паліклініках атрымліваюць крыху менш, чым дактары агульнай практыкі — каля 1800-1900 рублёў «чыстымі», калі працаваць на адну стаўку.

Медсёстры і іншы персанал паліклінік і бальніц традыцыйна зарабляюць меней. Фота: «Наша Ніва»

Заробкі па 4-5 тысяч рублёў маюць загадчыкі аддзяленняў, галоўныя дактары або дасведчаныя хірургі, якія шмат працуюць і бяруць дадатковыя дзяжурствы.

Зрэдку сустракаюцца і больш высокія зарплаты. Напрыклад, медыцынскі цэнтр «Ладэ» шукае галоўнага доктара, які будзе загадваць медцэнтрам. Такому спецыялісту прыватная медустанова гатовая плаціць ад 6 тысяч рублёў на рукі.

Фота: скрыншот з сайта rabota.by

«Заробкі сапраўды выраслі»

Як растлумачыў «Нашай Ніве» адзін з медыкаў, заробкі дактароў у Беларусі апошнім часам сапраўды павялічыліся. Спецыяліст звязвае гэта з двума фактарамі:

«Па-першае ў нас існуе адчувальны недахоп кадраў, паколькі за апошнія некалькі гадоў шмат дактароў з'ехалі за мяжу. Таму выглядае, што Міністэрства аховы здароўя сапраўды намагаецца трымаць заробкі на больш-менш годным узроўні, каб менш лекараў задумвалася пра ад'езд за мяжу.

Цяпер, калі доктар можа зарабляць пад 1000 даляраў у Беларусі, то ахвотных з'ехаць з эканамічных меркаванняў становіцца менш», — тлумачыць суразмоўца.

Пры гэтым спецыяліст адзначае, што на недахоп кадраў у пэўнай ступені паўплывалі і палітычныя рэпрэсіі.

«З эканамічных меркаванняў з'язджалі ў асноўным маладыя спецыялісты, не старэйшыя за 40 гадоў. Але пасля 2020 года работу згубілі і спецыялісты з вялікім стажам, бо ў такіх выпадках (калі заўважаны ў пратэснай дзейнасці. — НН) ніхто не глядзіць на ўзрост, пасаду, кваліфікацыю і досвед працы».

Дзякуй пандэміі?

Іншы чыннік, які на думку доктара паўплываў на рост заробкаў у медыкаў, — кавідныя надбаўкі, якія выплачвалі каля двух гадоў.

Кавідныя надбаўкі да заробкаў медыкаў былі адчувальныя. Фота: «Наша Ніва»

«Нават у тых, хто не працаваў непасрэдна ў «чырвоных зонах», былі пэўныя даплаты, бо тыя ж тэрапеўты мелі шмат кантактаў з хворымі на кавід, таму ў іх таксама ў той час былі вельмі годныя па беларускіх мерках заробкі.

Выглядае, што ўлады зразумелі, што могуць дазволіць сабе плаціць больш, таму і пашлі на такі крок. У выніку павышэнне заробкаў пасля адмены кавідных надбавак дапамагло нівеліраваць розніцу ў зарплатах.

Лекары падчас пандэміі ўжо прызвычаіліся нармальна зарабляць, таму вяртанне на папярэдні ўзровень выклікала б вялікую незадаволенасць», — мяркуе суразмоўца.

Пры гэтым, па яго словах, разам з павышэннем заробкаў падрасла і нагрузка. Ад медыкаў пачалі патрабаваць больш, значна пачасціліся рознага роду праверкі.

Яшчэ адна магчымасць зарабляць годна — браць дадатковыя гадзіны прыёму ў прыватных медыцынскіх цэнтрах. Многія запатрабаваныя спецыялісты так і робяць. Працуюць на 0,5 стаўкі ў дзяржаўнай установе і дабіраюць нагрузку ў прыватных, бо гадзіна працы там аплачваецца лепей.

Чытайце таксама:

«Да 10 тысяч рублёў. Прэзідэнцкі заробак». Лукашэнка расказаў, колькі зарабляюць медыкі

«Краіна губляе людзей з высокімі даходамі». Што адбываецца ў беларускай айцішцы

Бальніцы ў Беларусі закрываюцца, але лекараў стала больш

Nashaniva.com

Хочаш падзяліцца важнай інфармацыяй
ананімна і канфідэнцыйна?

Клас
25
Панылы сорам
11
Ха-ха
20
Ого
20
Сумна
25
Абуральна
47
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера
майчэрвеньліпень
ПНАЎСРЧЦПТСБНД
12
3456789
10111213141516
17181920212223
24252627282930