«Есць усё, не можа набыць туалетную паперу». Як цяпер жыве Мікола Аўтуховіч — палітвязень з рэкордным палітычным прысудам
Як жыве цяпер у гродзенскай турме ваўкавыскі прадпрымальнік Мікола Аўтуховіч, якому далі 25 гадоў за нібыта «акт тэрарызму» і «жаданне забіць Лукашэнку», даведалася Радыё Свабода.
Мікола Аўтуховіч 20 кастрычніка чарговы раз трапіў у карцар на 7 дзён. У верасні ён ужо правёў 10 дзён у карцары за тое, што падчас ягонага дзяжурства па камеры ў сукамерніка знайшлі забаронены прадмет.
Падобна, што палітвязень амаль цалкам вярнуўся да свайго звычайнага бадзёрага стану пасля працяглага галадавання. Аднак у яго яшчэ здараюцца ацёкі. Цукар у крыві на верхняй мяжы нормы, адразу пасля галадоўкі ён быў моцна падвышаны.
Ягоныя лісты да сваякоў пачалі даходзіць. Мікола агулам не скардзіцца блізкім на здароўе, піша, што адчувае сябе добра. Перадае падзяку ўсім людзям, якія яго падтрымліваюць.
Аўтуховіч досыць хутка вярнуўся да нармальнага харчавання, спажывае ўсе прадукты, часта просіць перадаць сала і цыбулю, перадае, што ўжо не патрэбныя дзіцячыя фруктовыя пюрэ, якія дапамаглі яму выходзіць з галадоўкі. Яму даходзяць пасылкі поштай, перадаюць перадачы.
«Яму заўжды дарэчы дасылаць арэхі, сухафрукты, мясныя чыпсы, сухую і вяленую рыбу, вяленыя мясныя вырабы, цыбулю, часнок, чыстыя паштоўкі», — кажуць блізкія.
Апошнім часам да Аўтуховіча не прыходзіць чалавек з «атаваркі», таму палітвязень сам не мог набыць туалетную паперу і ваду з турэмнай крамы, хоць меў грошы на сваім турэмным рахунку.
Цяпер блізкія збіраюць Аўтуховіча на этап у калонію, плануюць перад этапам забраць непатрэбныя рэчы з СІЗА. Пакуль яму перадалі тэрмабялізну і цёплыя рэчы.
Папулярны тыктокер з Расіі тусіць у дарагіх рэстаранах Мінска: «Быццам бамжу падалі. Жарыце, на здароўе»24
Каментары