Chto čakaje: Łukašenka ci Eŭropa?
Kropki nad "i"
Jość versija, što Brusel paraiŭ Kijevu nia hnać koniej. Maŭlaŭ, pabačym, ci abydziecca Dzień Voli biez dručkoŭ. Inšaja versija palahaje ŭ tym, što vizit u Kijeŭ prytarmaziŭ biełaruski bok. Piša ŭ svaim błohu Alaksandar Kłaskoŭski.
16.03.2007 / 13:55
Juščanka ŭ Danii skazaŭ, što maje sustrecca z Łukašenkam ciaham 10-15 dzion. Vizyt biełaruskaha kiraŭnika ŭ Kijeŭ užo tak daŭno ssoŭvajecca, što i hety termin padajecca niapeŭnym.
Va ŭsiakim razie, sustreča adbudziecca peŭna paśla Dnia Voli. Jość versija, što Brusel tamu i paraiŭ Kijevu nia hnać koniej. Maŭlaŭ, pabačym, ci abydziecca impreza biełaruskaj apazycyi biez dručkoŭ.
Inšaja versija palahaje ŭ tym, što vizit u Kijeŭ prytarmaziŭ biełaruski bok. Maŭlaŭ, zalacańni da Zachadu adsunutyja ŭbok i ciapier Miensku treba znoŭ niejak padłaščycca da Kramla. Bo biaz tannaj nafty i kredytu — kiepska. Maskoŭski analityk Andrej Suzdalcaŭ miarkuje, što i ŭ Sočy Alaksandar Łukašenka palacieŭ najpierš kab "padpilnavać" Pucina.
Badaj, nivodnaja z hetych krajnich traktovak nie adpaviadaje iścinie całkam.
Naŭrad ci Juščanku tak užo naŭprost, by praz selektar:), zahadvajuć z "bruselskaha abkamu": ty tam, bracie, pierajhraj terminy! Bolej imavierna, što na hrafik i pryjarytety ŭkrainskaha prezydenta ŭpłyvaje palityčnaja tuzanina ŭ samim Kijevie.
Ź inšaha boku, rana rabić vysnovu, što Miensk zharnuŭ hulniu na zachodnim kirunku. Tak ličyć, u pryvatnaści, analityk Valer Karbalevič, ź jakim my tolki što abmianialisia dumkami.
Sapraŭdy, mienavita tamu, što ŭ stasunkach z Maskvoju i ŭ ekanamičnych perspektyvach panuje niapeŭnaść, lahična doŭžyć "šmatvektarnuju imitacyju".
Voś seminar z udziełam Uty Capf naładzili. Abodva baki zabiaśpiečyli sabie jak minimum pijar. Tutejšamu elektaratu pakažuć, što Eŭropa nie curajecca. Eŭropa, u dadzienym vypadku praz ABSE, demanstruje dobruju volu dyj prosta zanduje hlebu. A raptam niešta skraniecca?
"Dyjaloh faktyčna idzie, i apazycyja spaźniłasia", — kaža Valer Karbalevič. Jon maje na ŭvazie zajavy Salany, Brazaŭskasa, apošnija vizyty eŭrapiejskich emisaraŭ u Miensk.
Lidery ADS (kali hetaja abrevijatura jašče niešta abaznačaje de-fakta) sprabujuć nahadać, što ich zabyli ŭziać na ciahnik.
Zrešty, pakul što jon pychkaje la peronu, i ci kraniecca — vialikaje pytańnie.
Zaraz dyjaloh u toj nieprasunutaj stadyi, kali, jak pakručasta vykazaŭsia Juščanka, "Biełaruś musić dać syhnał suśvietnaj supolnaści, što jana reahuje na sfarmavanyja eŭrapejskaj demakratyjaj syhnały" :)
Va ŭsiakim razie, Zachad vidavočna nie śpiašajecca kuplać apazycyi kvitki za svoj košt.
Miž tym ułasnaha palityčnaha kapitału ŭ strukturavanych apanentaŭ ułady, musić, małavata, kab užo siońnia pretendavać na status paŭnapraŭnaha treciaha boku.