Vielikodny stoł

Karavaj, śvinina ŭ cieście, zapiakanka z ryby dy inš.

22.04.2011 / 15:50

Tradycyjnyja stravy, što padajucca na vielikodny stoł.

Karavaj

4 šklanki muki, 3/4 šklanki cukru, 1/2 šklanki viarškoŭ, 5 žaŭtkoŭ, pałova bruska masła, 70 h draždžej, vanilin, 50 h razynak, žaŭtok i viarški dla hłazuravańnia karavaju.

Raščynić droždžy z łyžkaj małaka i łyžkaj muki. Žaŭtki pieracierci z cukram, rastapić masła. Muku źmiašać z roščynaj, žaŭtkami i ciopłymi viarškami. Vyrabić ciesta i pad kaniec dadać toplenaje masła i vanilin. Schavać ciesta ŭ ciopłym miescy i pakinuć padrastać.

Sfarmavać karavaj, azdobić jaho reštaju ciesta, palić žaŭtkom, źmiašanym ź viarškami. Vypiakać 20—30 chv. pry temperatury 140 hradusaŭ.

Śvinina ŭ cieście

500 h śvininy (kumpiak), 100 h zdoru abo aleju, 100 h muki, 0,5 šklanki małaka, 1 jajka, sol, pierac, časnyk.

Śvininu tonka narezać upopierak vałoknaŭ, mocna adbić, pasypajučy kožny kavałak sollu, piercam i drobna narezanym časnykam. Z muki, jajka i małaka pryhatavać vadkaje ciesta, dadać troški soli. Apuskać kavałki padrychtavanaha miasa ŭ ciesta i smažyć z abodvuch bakoŭ u vialikaj kolkaści tłušču.

Śvinina, zapiečanaja z bulbaj

800 h śvininy, 2 st. łyžki tłušču, 2 cybuliny, 12 bulbin, sol, kmien.

Miasa (adnym kavałkam) pasypać sollu, piercam, absmažyć z usich bakoŭ na mocna razahretym tłuščy. Pierakłaści na blachu, ulić tłušč, što zastaŭsia ad smažańnia, pasypać kmienam, dadać narezanuju kružkami cybulu, 3—4 st. łyžki vady i pastavić u duchoŭku. Zapiakać, palivajučy sokam, jaki ŭtvaryŭsia (kali treba, dadać vadu), da taho času, pakul miasa dojdzie da napaŭhatoŭnaści.

Bulbiny prykładna adnolkavaj vieličyni ababrać, pamyć, pasypać sollu i pakłaści na blachu razam ź miasam i, praciahvajučy palivać, zapiakać da hatoŭnaści.

Hatovaje miasa tonka narezać, abkłaści zapiečanaj bulbaj. Padać z kisłaj kapustaj.

Zapiakanka z ryby

500 h ryby (karp, liń), 500 h bulby, 3—4 st. łyžki aleju, 0,5 šklanki śmiatany, 1 cybulina, 1 st. łyžka muki, sol, pierac, zielanina.

Padrychtavanuju rybu parezać na kavałki, pasypać sollu, piercam, ukačać u muku i absmažyć na alei z abodvuch bakoŭ. Pamytuju bulbu zvaryć, ababrać, źmialčyć na bujnoj tarcy. Asobna absmažyć drobna narezanuju cybulu.

U žaroŭniu, zmazanuju alejem, pakłaści pałovu padrychtavanaj bulby, na jaje — kavałki ryby, pasypać jaje cybulaj, źvierchu — znoŭ słoj bulby. Usio palić śmiatanaj i reštaj aleju. Zapiakać u duchoŭcy 30 chvilin.

Pry padačy na stoł zapiakanku parezać na kavałki, pasypać drobna narezanym kropam.

Biarozavik

5 ł biarozavaha soku, 30 h jačmieniu.

Biarozavy sok zalić u draŭlanuju bočačku, pastavić u ciomnaje chaładnavataje miesca. Praz 2—3 dni, kali sok troški zakiśnie, dadać jačmień, padpražany na blasie, abo žytnija suchary, dać pastajać jašče sutki, pracadzić.

Anałahičnym čynam hatujecca i klanovy kvas — klanovik.

Miedavucha

5 ł vady, 300 h miodu, 10 h draždžej.

Miod razam z sotami raźvieści achałodžanaj hatavanaj vadoj, zalić u nievialikuju draŭlanuju bočačku. Dadać droždžy, raźviedzienyja ŭ ciopłaj vadzie, pieramiašać. Vytrymlivać u chaładnavatym miescy 6—8 dzion.

I viadoma ž, chren

Pieraciortyja na drobnuju tarku karani chrenu źmiešvajuć z syrym ciortym burakom. Burak daje koler, chren — siłu. Heta najpieršaja vielikodnaja pryprava da miasnych stravaŭ.

Dla studenckaha śviata — kaŭbasa ŭ cieście

500 h varanaj kaŭbasy, 2 jajki, 150 h muki, 0,75 šklanki małaka, alej dla smažańnia, sol.

Muku, žaŭtki raźmiašać z małakom, dadać sol i ŭźbityja białki. Kaŭbasu narezać kružkami taŭščynioj 1 sm. Kružki apuskać u ciesta i smažyć z abodvuch bakoŭ na alei.

Padać z sałatkaj z harodniny abo tamatnym soŭsam.