Suprać  hiendyrektara «Pinskdreva» Aryniča raspačali kryminalnuju spravu

24.02.2011 / 11:22

Hienieralnaja prakuratura Biełarusi raspačała kryminalnuju spravu ŭ dačynieńni da hiendyrektara ZAT «Chołdynhavaja kampanija «Pinskdreŭ» Łarana Aryniča. Ab hetym paviedamiŭ žurnalistam 24 lutaha namieśnik hienieralnaha prakurora Viktar Konan.

Nahadajem, 25 kastryčnika 2010 hoda na zavodzie «Pinskdreŭ-DSP» (Pinsk, Bresckaja vobłaść) adbyŭsia vybuch, u vyniku jakoha zahinuli 14 čałaviek, 7 atrymali cialesnyja paškodžańni.

Konan admoviŭsia paviedamić, pa jakim kankretna artykule raspačata sprava. «Sprava raspačata pa adpaviednym artykule Kryminalnaha kodeksa, jon dastatkova surovy. U najbližejšy čas Aryniču budzie pradjaŭlena abvinavačańnie», — skazaŭ jon.

Pavodle słoŭ namieśnika hienprakurora, Arynič ciapier nie znachodzicca pad vartaj. Pry hetym jon admoviŭsia adkazać na pytańnie, ci abrana ŭ dačynieńni da padazronaha niejkaja inšaja miera strymańnia.

Zaraz, paviedamiŭ Konan, pravodziacca śledčyja dziejańni, pryznačany šerah składanych ekśpiertyz. Spravy ab parušeńni praviłaŭ achovy pracy i techniki biaśpieki adnosiacca da katehoryi vielmi składanych, adznačyŭ namieśnik hienprakurora. Ekśpiertyzy naceleny na ŭstanaŭleńnie pieršapryčyn trahiedyi, dadaŭ jon.

Konan taksama paviedamiŭ, što praciahvajecca rasśledavańnie pa pieršaj kryminalnaj spravie, jakaja była raspačata pa artykule 302 KK pa fakcie vybuchu na zavodzie «Pinskdreŭ-DSP». Jaho rasśleduje Hienprakuratura.

Pavodle słoŭ namieśnika hienprakurora, prablemy na pradpryjemstvie pačalisia jašče ŭ 2005 hodzie. «Bačna, što hałoŭnaje było — hrošy. Tyja ludzi, jakija dapuścili parušeńni, buduć pryciahnuty da adkaznaści», — zajaviŭ Viktar Konan.