Калі ўрад Беларусі хоча супрацоўнічаць, павінен быць крок насустрач з яго боку
Пра гэта заявіў часовы павераны ў справах ЗША ў Беларусі Майкл Скэнлан падчас фестывалю «Амбасовiшча».
28.07.2010 / 09:41
Злучаныя Штаты не здрадзяць прынцыповай пазіцыі ў адносінах да ацэнкі выканання правоў чалавека ў Беларусі, заявіў журналістам часовы павераны ў справах ЗША ў Беларусі Майкл Скэнлан 27 ліпеня ў Раўбічах падчас фестывалю «Амбасовiшча».
Дыпламат выказаў шкадаванне, што ЗША вымушаныя адмовіцца ад рэзідэнцыі пасла ў Раўбічах. «Два гады дом не заняты, і няма сігналаў, што сітуацыя зменіцца. Не мае сэнсу плаціць за тое, што не выкарыстоўваецца», — сказаў Скэнлан. З сакавіка 2008 года пасольства ЗША ў Беларусі ўзначальвае часовы павераны, пасля таго як Мінск адклікаў свайго пасла з Вашынгтона.
«Крокі больш значныя чым словы, — падкрэсліў Скэнлан. — Калі ўрад Беларусі хоча супрацоўнічаць, павінен быць крок насустрач з яго боку».
«Беларусы разумеюць, што нашы прыярытэты і наша палітыка ў Беларусі не зменяцца», — упэўнены Скэнлан.Паводле яго слоў, пасольства прадоўжыць працу ў Мінску. Дыпламат пацвердзіў зацікаўленасць Вашынгтона ў дыялогу з беларускімі ўладамі, у развіцці адносін з Беларуссю і ў паляпшэнні сітуацыі ў сферах, якія гэтага патрабуюць.