Nieintelihientnaja hulnia Rady intelihiencyi
Pierad Sańnikavym admoviŭsia ad supracy z Radaj Aleś Michalevič.
26.04.2010 / 10:37
Uładzimir Kołas, kiraŭnik Rady intelihiencyi.
Ad supracy z Radaj intelihiencyi ŭ spravie vybaru adzinaha kandydata rašuča admoviŭsia lider hramadzianskaj kampanii «Jeŭrapiejskaja Biełaruś» Andrej Sańnikaŭ: «Ja nie baču nijakaha sensu ŭdzielničać.
Čamu Sańnikaŭ dazvoliŭ sabie takuju rezkaść? Bo viedaje, što kiraŭnik Rady intelihiencyi vielmi blizki da adnoj z palityčnych hrupovak. I padazraje, što ni pra jakuju praceduru adboru niama havorki. Dumka tolki pra toje, jak prykryć aŭtarytetam intelihiencyi kandydaturu ad hetaj hrupoŭki. Bo viedaje taksama, što Rada intelihiencyi za piać hadoŭ svajoj dziejnaści abmiežavałasia niešmatlikimi pasiedžańniami, nijakaj inšaj dziejnaści jana nie pravodziła. Čamu tady pretenduje na prava vybirać? Nie intelihientna, narešcie, kab arbitražnuju strukturu ŭznačalvaŭ čałaviek, jaki sam niadaŭna mieŭ (dahetul maje?) prezidenckija ambicyi.
Manipulacyi z namaščeńniem kandydata Radaj intelihiencyi nijak nie ŭzmacniać apazicyi, ani arhanizujuć hramadstva. Havorka idzie pra pieratasoŭku, na chutkuju ruku, kartaŭ u apazicyjnym asiarodku. Majem spravu z vykarystańniem u palityčnych metach samoha słova «intelihiencyja».
Pierad Sańnikavym admoviŭsia ad supracy z Radaj Aleś Michalevič. Śledam za Sańnikavym Uładzimira Kołasa adšyje, treba dumać, i apazicyjny lider z najbolšym rejtynham siarod nasielnictva — Alaksandr Milinkievič. Sumniajusia, kab mieła zacikaŭlenaść u takoj supracy Biełaruskaja chryścijanskaja demakratyja ź jaje saprraŭdy aktyŭnymi strukturami. Tak z charošaj hramadzianskaj idei vychodzić namienkłaturny pšyk. A intelihiencyja zastajecca z adpaviednaj reputacyjaj.