Ułady Vieniesueły zatrymali lidarku apazicyi pierad inaŭhuracyjaj Madury. Jaje źbili matacykłam
U Karakasie, paśla pratesnaha mitynhu, ułady Vieniesueły zatrymali adnu ź lidaraŭ apazicyi, 57-hadovuju Maryju Karynu Mačada, jakaja źjaŭlajecca byłym deputatam parłamienta, piša Radyjo Svaboda.
10.01.2025 / 09:14
Maryja Karyna Mačada padčas učorašniaha mitynhu. Fota: Ariana Cubillos / AP
Pavodle infarmacyi haziety El Confidencial, žančynu źbili matacykłam i vyvieźli ŭ nieviadomym kirunku.
Vydańnie adznačaje, što Mačada mahła być zatrymanaja nie aficyjnymi pravaachoŭnymi orhanami, a adnoj z praŭradavych hrupovak. U apieracyi ŭdzielničali ŭzbrojenyja ludzi na matacykłach i džypach, a taksama vykarystoŭvalisia bieśpiłotniki. Sa słoŭ śviedak, pa paplečnikach Mačady, mahčyma, adkryli ahoń. Adzin čałaviek atrymaŭ ranieńni.
Incydent adbyŭsia za dzień da inaŭhuracyi prezidenta Nikałasa Madury, jaki byŭ abvieščany pieramožcam na letnich vybarach. Apazicyja nie pryznała vynikaŭ hałasavańnia, śćviardžajučy, što pieramohu atrymaŭ apazicyjny kandydat Edmunda Hansales. Paśla vybaraŭ Hansales vymušany byŭ pakinuć krainu, adnak zajaŭlaŭ, što prymie prysiahu ŭ Karakasie 10 studzienia.
Hazieta El Confidencial adznačaje, što da hetaha času ŭłady Vieniesueły paźbiahali pramych zatrymańniaŭ klučavych apazicyjanieraŭ, sprabujučy prymusić ich da emihracyi. Mačada žadańnie pakinuć krainu nie vykazvała. Napiaredadni, padčas prysiahi reziervistaŭ pierad inaŭhuracyjaj, Nikałas Madura abvinavaciŭ jaje ŭ arhanizacyi sieryi vybuchaŭ i zamachaŭ na kiraŭnictva krainy.
Edmunda Hansales, jakoha šerah krain pryznali pieramožcam vybaraŭ, zapatrabavaŭ nieadkładnaha vyzvaleńnia Mačada. U svaju čarhu, pradstaŭnik Human Rights Watch Chuan Papje zaklikaŭ mižnarodnuju supolnaść abjadnacca dla vyzvaleńnia apazicyjanierki. Ułady Vieniesueły pakul nie prakamientavali situacyju.