Kazachstan adnaviŭ abmiežavańni dla pieravozak pa schiemie pierahruzki i pieračepki
Kazachstan z 1 studzienia 2025 hoda adnaviŭ abmiežavańni pry vykanańni pieravozak pa terytoryi krainy ź pierahruzkaj abo pieračepkaj. Pra heta papiaredziła Biełaruskaja asacyjacyja mižnarodnych aŭtapieravozčykaŭ.
09.01.2025 / 22:20
Fota ilustracyjnaje
Amal hod tamu, u lutym 2024 hoda, paviedamlałasia, što Ministerstva transpartu Kazachstana dazvoliła pieravozčykam z krain Jeŭrazijskaha ekanamičnaha sajuza (JEAES) pieravozić tavary ź pieračepkaj abo pierahruzkaj na terytoryi krainy.
U zahadzie kiraŭnika viedamstva adznačałasia, što punkty «praviłaŭ prymianieńnia dazvolnaj sistemy aŭtamabilnych pieravozak» nie raspaŭsiudžvajucca na pieravozčykaŭ, zarehistravanych u krainach JEAES pry vykanańni peŭnych umoŭ. U pryvatnaści pieravozka hruzu pa terytoryi Kazachstana pavinna vykonvacca «paśladoŭna niekalkimi pieravozčykami ź pierahruzkaj (pahruzkaj/vyhruzkaj) i (abo) zamienaj ciahača pry najaŭnaści ajčynnych dazvołaŭ papiaredniaha pieravozčyka».
Adpaviedny zahad profilnaha ministra dziejničaŭ da 1 studzienia 2025 hoda.
Uvohule ž prablema ŭźnikła ŭ 2022 hodzie paśla ŭviadzieńnia Jeŭrasajuzam abmiežavańniaŭ na ŭjezd biełaruskich i rasijskich pieravozčykaŭ. U Biełarusi tady pryniali miery ŭ adkaz, uvioŭšy padobnuju zabaronu dla jeŭrapiejskich hruzavikoŭ. Jeŭrapiejskim pieravozčykam dazvolena było ruchacca ŭ Biełaruś tolki da punkta pierahruzki i pieračepki, dzie hruzy zabirajucca biełaruskimi kampanijami.
Takaja schiema, adnak, nie adpaviadaje praviłam pieravozak, pryniatym u Kazachstanie, tamu biełaruskim dalnabojščykam pahražali štrafy i zatrymańni mašyn. U vyniku situacyja była ŭrehulavana: u Kazachstanie prypynili dla partnioraŭ pa JEAES dziejańnie punktaŭ praviłaŭ, jakija abmiažoŭvali pieravozki pa schiemie pieračepki i pierahruzki.
U kancy minułaha hoda ŭ Kazachstanie abmiarkoŭvaŭsia zahad ab praciahu dziejańnia hetaj normy, termin jakoj minaŭ naprykancy 2024 hoda, adnak pakul jon tak i nie pryniaty. U vyniku abmiežavańni znoŭ pačali dziejničać z 1 studzienia.
Jak paviedamili ŭ BAMAP, biełaruski Mintrans nakiravaŭ adpaviedny zapyt kazachstanskim kaleham, jakija adkazali, što prajekt zahada pakul znachodzicca na ŭzhadnieńni ŭ dziaržorhanach Kazachstana, a pra jaho vyniki budzie paviedamlena dadatkova.
Čamu rastuć čerhi z fur na miažy? Pryčyna nie tolki ŭ navahodnich śviatach
Biełarus-dalnabojščyk znajšoŭ u svaim refryžaratary dvuch nielehalnych mihrantaŭ