Akaŭnt Kabančuka ŭzłamali — ale ci biełaruskija śpiecsłužby?
9 studzienia telehram-kanał, źviazany ź biełaruskimi siłavikami, paviedamiŭ pra ŭzłom telehram-akaŭnta Vadzima Kabančuka, pradstaŭnika Abjadnanaha pierachodnaha kabinieta i byłoha namieśnika kamandzira pałka Kalinoŭskaha. Pry hetym sam Kabančuk nie zaŭvažyŭ jakoj-niebudź prablemy sa svaim Telegram. Jak takoje mahčyma? «Lusterka» adšukała i vyvučyła danyja, jakija trapili va ŭciečku.
09.01.2025 / 21:57
Vadzim Kabančuk
Uzłom, jaki nie byŭ prykmietny
Infarmacyja pra ŭciečku pierapisak Vadzima Kabančuka trapiła ŭ publičnaje pole 9 studzienia paśla paviedamleńnia ŭ nieaficyjnym telehram-kanale, źviazanym ź siłavikami z HUBAZiKa. Tyja apublikavali niekalki skrynšotaŭ u jakaści dokazu.
Hetyja pierapiski realnyja. Da prykładu, u ich jość zapyt ab intervju, jakoje žurnalistka «Lusterka» adpraŭlała byłomu vajskoŭcu, i hałasavoje paviedamleńnie, jakoje jon dasłaŭ u adkaz. Sama žurnalistka paznała hety dyjałoh (padkreślim, što akaŭnt žurnalistki nie byŭ uzłamany).
U kamientary dla «Lusterka» Kabančuk adznačyŭ, što ź jaho akaŭntam usio dobra. Jon vykazaŭ zdahadku, što ŭzłamali kahości ź jahonych surazmoŭcaŭ. Taksama były vajskoviec adznačyŭ, što na jahonym akaŭncie ŭklučanaja dvuchfaktarnaja aŭtentyfikacyja. Jon upeŭnieny, što ŭ takim vypadku ŭzłom niemahčymy.
«Zmoh atrymać dostup da akaŭntaŭ, mahčyma, kamuści budzie cikava»
«Lusterka» adznačaje: padobna, za ŭzłomam staić zusim nie HUBAZiK.
«Źlityja» pierapiski źjavilisia ŭ adkrytym dostupie značna raniej za paviedamleńnie siłavikoŭ. Tak, 13 śniežnia 2024 hoda karystalnik pad nikam ZeroXploit apublikavaŭ na placoŭcy Pastebin (vykarystoŭvajecca prahramistami dla zachoŭvańnia frahmientaŭ zychodnaha koda abo infarmacyi ab kanfihuracyi. — Zaŭv. red.) paviedamleńnie na anhlijskaj movie: «Dniami ja zmoh atrymać dostup da akaŭntaŭ, mahčyma, kamuści budzie cikava».
Skrynšot paviedamleńnia ad nieviadomaha adpraŭnika na sajcie pastebin.com
Jon dadaŭ spasyłku na archiŭ u 12 hihabajt i instrukcyi ab tym, jak jaho adkryć. Unutry — abjomnaja vyhruzka historyi pierapisak z šaści telehram-akaŭntaŭ. U ich liku — tyja samyja pierapiski Vadzima Kabančuka, skrynšoty jakich publikavali łukašenkaŭskija siłaviki.
Spasyłku na hety archiŭ čytač «Lusterka» dasłaŭ u redakcyju paśla naviny ab uzłomie akaŭnta Kabančuka. Jon zajaviŭ, što hetaja spasyłka «ŭžo bolš za miesiac u ahulnaj sietcy hulaje». I skazaŭ, što bačyŭ jaje ŭ zakrytym śpiecyjalizavanym čacie, pryśviečanym cieniavoj dziejnaści ŭ internecie.
Kaho ŭzłamali?
Usie šeść akaŭntaŭ źviazanyja z ukrainskimi numarami telefonaŭ. Adzin ź ich naležyć byłomu kalinoŭcu Vadzimu Kabančuku. Siarod astatnich — dvoje vajskoŭcaŭ, žurnalistka ź Lvova i nastaŭnica tancaŭ, jakaja ŭ rozny čas cikaviłasia žyćciom u Minsku, Adesie i Łondanie. A jašče — pradprymalnica z Kijeva, dalokaja svajačka zahinułaha ŭ 2022 hodzie bajca pałka Kalinoŭskaha Vadzima Šatrova (pazyŭny Papik).
Składana skazać, chto i pa jakoj pryčynie pierš za ŭsio vyrašyŭ uzłamać akaŭnty hetych ludziej, a taksama navošta infarmacyju vykłali ŭ adkryty dostup. Častku achviar źviazvaje USU: troje tam słužyli, u adnoj zahinuŭ svajak, i jana šukała pra jaho infarmacyju.
Papki ŭ archivie datavanyja 10 i 13 śniežnia 2024 hoda, sami fajły ŭ archivach — 9 śniežnia taho ž hoda. Hetaja ž data fihuruje ŭ «pustych» dyjałohach usich akaŭntaŭ. Vierahodna, vyhruzku pierapisak zrabili mienavita ŭ hety dzień. A voś kali adbyŭsia sam uzłom, nieviadoma.
Cikava, što ŭ adnych achviar byli vydalenyja mnohija dyjałohi i ŭ archiŭ trapiła vialikaja kolkaść pierapisak-«pustyšak». U inšych, naadvarot, zachavałasia najpadrabiaznaja historyja kantaktaŭ z roznymi ludźmi.
Skrynšot pierapisak Vadzima Kabančuka, jakija trapili ŭ adkryty dostup u vyniku ŭciečki
Jak mienavita ŭzłamali hetyja akaŭnty, pa pierapiskach skazać dakładna składana. Minimum dvaim z šaściarych aficyjny akaŭnt Telegram nahadvaŭ, što ŭ ich nie ŭklučanaja dvuchfaktarnaja aŭtaryzacyja (dadatkovy vobłačny parol). Heta značyć, da ich akaŭntaŭ možna atrymać dostup praz SMS. Prychodziła takoje apaviaščeńnie i Vadzimu Kabančuku. Apošni raz — u sakaviku 2023 hoda. Ci paśpieŭ jon pastavić dadatkovy parol da taho, jak złamyśniki trapili ŭ jaho akaŭnt, nieviadoma.
Adna z ukrainak, danyja jakoj trapili ŭ «źliŭ» 25 žniŭnia 2024 hoda, ustupiła ŭ pierapisku z aficyjnym akaŭntam Telegram i paskardziłasia na sprobu ŭzłomu. Da paviedamleńnia jana prykłała skrynšot, dzie adpraviła niejki kod dostupu falšyvaj «słužbie vieryfikacyi».
«Moj rachunak sprabujuć uzłamać. Užo 3-ci dzień ja atrymlivaju niezrazumiełyja paviedamleńni ad botaŭ», — napisała jana.
Skrynšoty pierapiski, jakaja trapiła va ŭciečku
Pry hetym pierapiska z ašukancami nie zachavałasia — vierahodna, tyja ŭ niejki momant vydalili dyjałoh.
Padobnyja paviedamleńni zachavalisia ŭ pierapiskach jak minimum jašče adnaho karystalnika, jaki staŭ achviaraj uzłomu.
Siłaviki pachvalilisia, što ŭzłamali telehram-akaŭnt Kabančuka, i apublikavali dokazy
Jak pravilna pačyścić smartfon pry pierasiačeńni miažy