ZŠA vydzialajuć Ukrainie apošni pry Bajdenie pakiet vajskovaj dapamohi
Pra vydzialeńnie pakietu vajskovaj dapamohi Ukrainie pamieram u $500 młn paviedamiŭ na pasiadžeńni kantaktnaj hrupy ŭ farmacie «Ramštajn» 9 studzienia ministr abarony ZŠA Łojd Ościn.
09.01.2025 / 16:13
«U pryvatnaści, havorka idzie pra rakiety SPA, bojeprypasy «pavietra-ziamla», abstalavańnie dla absłuhoŭvańnia ŭkrainskich samalotaŭ F-16», — havorycca ŭ paviedamleńni Pientahona.
U im adznačajecca, što dla SPA buduć pieradadzienyja rakiety AIM-7, RIM-7, i AIM-9M. Taksama Vašynhton pieradaść Kijevu braniavanyja inžyniernyja mašyny-mostaŭkładčyki, biaśpiečnyja srodki suviazi, strałkovuju zbroju i bojeprypasy da jaho, a taksama roznyja zapčastki i dadatkovaje abstalavańnie.
Dapamohu pieradaduć Ukrainie ŭ ramkach miechanizmu PDA. Jon praduhledžvaje pieradaču zbroi, jakaja ŭžo zachoŭvajecca na amierykanskich składach, a nie vytvorčaść novaha ŭzbrajeńnia.
Raniej ahienctva Associated Press paviedamiła, što adychodziačaja administracyja Džo Bajden źbirajecca 9 studzienia abviaścić ab svaim apošnim pakiecie vajskovaj dapamohi Ukrainie. Krynicy AP adznačali, što pakiet budzie «značnym», ale naŭrad ci ŭklučyć u siabie ŭsie čatyry młrd dalaraŭ, jakija zastalisia ad sumy, uchvalenaj Kanhresam ZŠA dla dapamohi Ukrainie.
Usiaho administracyja Džo Bajdena z momantu poŭnamaštabnaha ŭvarvańnia Rasii va Ukrainu vydzieliła na dapamohu Kijevu bolš za 63,5 młrd dalaraŭ.
9 studzienia ZŠA abvieściać pra «značny» pakiet vajskovaj dapamohi Ukrainie. Apošni pry Bajdenie
ZŠA «niezaŭvažna» pastavili va Ukrainu šmat zbroi jašče da pačatku kanfliktu z Rasijaj — Blinkien
Bajden paviedamiŭ pra novy pakiet vajskovaj dapamohi Ukrainie